1 Ame me ran sontu won ran? Me ran he nji rindu Izhi nga me to Yeso Bachi mbu? Biyi bi he sii won rimi ndu won riwa Bachi. 2 Ko wari wa tre ri ame me ran he nji rindu Izhi ran, biyi bi to! Ritu son mbi ri kabru tu ri Izhi, biyi kyumbi bi to bi ri nyɨme ri me he nji ri ndu Izhi.

3 Inde nji wa shɨma wen ri nganyi nye me kpa ngawon chuwo. 4 Ashe, ki ran he ri gbengbren riwa wa no ta ri ri so ritu ndu wan ran? 5 Kiran he riwa ki ngɨzhi wa hu Izhi ye ri ta bibi riwa mgbron wa ndu Izhi nga miri vayi Bachi wa ti nga bibi riwa Kefas a ti ran? 6 Ko ka ara Banaba nga ame ri kankshe nye riwa ki tindu ki ri ri ri ngambu?

7 Ingan ri tindu wa lokpa ran ri ri ngawan? Ingan ri sen konkron ri rɨma wan ran ran kyen klo wan ri ran? Ingan ri ho gɨzhi lando ran ran so ima sisan mba ran? 8 Bi ya risi mbi me la tre nyi ri tre ri nne kuklu? Itsro Musa ran la nganyi ran? 9 Ritu riwa wa ngan ri mbe doka Musa ri,<<Ran ka nyu lando ri bubu riwa ari jo wɨlo kpu ran.<<Ara lando nye Izhi ri tre ritu mba? 10 Aran he ki ta nye ari tre rita ran? Een, a he rita nye a ngan. Ai, a bi riwa nji ri ron ri nji ri joo no wa yo sron rimi fe san wamba rimi kpi wa zhu. 11 Inde ki yo tre riwa Yuu rimi sron mbi, to, a he kya ri kinklan sron no ta ki fe rimi kya riwa biyi bi fe ki yo nyu. 12 Inde wari wa fe zon nyi ri yi, ashe a ran he riwa kita ki fe ri yi han ran?

Ama ki ran tindu ri gbengbren nyi ran, ama ki vu sron ri ko ngye ritu riwa no ran kukri ri ndu tre tre Yeso Kristo ran. 13 Ashe bi ran to ri wawa wa ti ndu ri tra Izhi wa fe ri mba riwa wa ri ran? wawa wa kri ri bubu kri ri bla tre Izhi, ri bubu wan nye wa fe wamba ran. 14 Ri ngamba Bachi tre ti wawa wa bla tre Izhi no wa fe ri mba ri bubu wan.

15 Ama me ran miyen kya riwa me ri fe riyi ran, ko ka me ngan rinyi zizan ritu me ri kpa kyawa ka ti wamo ran. Me gbuchi kuu ri njo ran kɨma kpo ngawon yo rimi kya ri kuklu ran. 16 Inde me tre tre Izhi, rimba ran no wen me kpo ngawon ran. A he dole me bla tre Izhi inde me kawon me to yaa! 17 Inde me ti ndu nyi ri su sron won me fe lada, ama inde a ran he ri nyɨme sron won ran, wa ka ngan wen riwo nye mba. 18 Ingye nye ri he fe won: Rimi tre tre Izhi won me tre kuklu, me ran wa no wa no wen kya rimi ndu bla tre Izhi ran.

19 Ko riwa me ran he gran ko njo ran, ama me kɨma ngawon ti gran ko ngan ritu riwa me ngɨzhi nji kigbu ye. 20 Me kɨma he ka nji Yahuda ritu riwa me ri vu tu mba wawa wa ri ndoza doka Musa, me he ka wawa wa he rimi doka Musa ama me ran he rimi doka ran, me tre ngamba ritu me ri ngɨzhi wa ye ri Kristo. 21 Ri ngamba, riwa me ti ndu ri wawa wana to Izhi ran, me he ka wawa, ku gran doka wawa wana to Izhi ran ritu meri ngɨzhi wa ye ri Izhi, rinyi ran he ri me ka won ri huu doka Izhi ran, ama me he ri ndoza doka riwa Kristo. 22 Ri tsutsu wawa ikpa nyɨme mba ran senkpa ran, me he ka wawa ritu riwa me ri ngɨzhi wa ye nkon Izhi imba me he kyawa wawu ri nji bibi riwa me to kpa wari mba chuwo. 23 Kyawa wanyi wawu me ti wa ritu tre Izhi, riwa me fe ndindi ti.

24 Kpunji, bi to ri nji kigbu wa rinɨran tsutsu ama nji riwa a gbuchi wawu nye ri rii? Nghamba a wu tsutsu bibi riwa wu rii. 25 Wawa wa wa wari roro ri rinɨran wa yo tu mba ri ti-u bla vi ritu wari fe kya ri mgbumgburume, ama ki ta ki wa kya riwa Izhi nye ri de riwa a ran ri time ran. 26 To ame me ran ri rinɨran won ndandan ran ama me rinɨran riwa me fe kya rimi wan. 27 Me wuu kpa won ritu me ri kpa wari chuwo ritu no ran ye chachu wan waka kawen taga ran.