1 Zizan biyi miri vayi won wa hu Izhi, me wa meri la yi tre raro, riwa bi kpa nga riwa iyo sron mbi kri ritu wan mgbemgben. 2 Ritu bibi tre riwa me layi nyi nye riwa bi fe kpa chuwo, inde bi mɨlan-u ngɨzhi bibi riwa bi wo, inde a ran he ngamba ran ikpanyime bi he kuklu nye.

3 Me no yi kya riwa me kpa, riwa a bi hari riwa a he rimi ngan: ri Kristo kuu ritu meme ti mbu, 4 Nga wa ban wu no yibi nga ka ta shɨme ri kugon vi tra bibi riwa a he rimi ngan, 5 Riwa a zhu ri Kefas nga wa ndu Izhi wuru don hari. 6 Kugon rimba a zhu ri miri vayi wawa wa han gbigba ton riwa wa he hari ye riwa ama wa ri mba wa kuu. 7 Ri mba ka zhu ri vayi wan riwa wa yo-u ri Yakubu nga mgbron wa ndu Izhi. 8 Ri kre wan wawu, a zhu rimo ngawen, ko riwa me ran ke riwa me to-u ran. 9 Ame nye me he kremkpen rimi wa ndu Izhi riwa me ran tsra riwa wa yo wen ri me he nji ri ndu Izhi ran, ritu riwa me no wa hu Izhi yaa. 10 Ama ritu ndindi ti riwa Izhi me he kya riwa me he nga ndindi riwa a ti ri mon a ran he kukulu ran, hari me han ko ngan rimi ndu Izhi, ama a ran he ame nye ran ama ritu ndindi ti Izhi riwa a he rimi sron won. 11 Ko ame, ko a he wawa riwa ki la tre Izhi wawu nye kya riwa bi kpanyɨme.

12 Zizan riwa ki tre tre ta shɨme ingye ti ko wari mbi wa kamba ri tre ri itashɨme ran ri he ran? 13 Inde bi tre ri itashɨme ran he ran, a tsro ri Kristo ran tashɨme ran nye mba. 14 Wari tre ri Kristo ran tashɨme ran, tre tre Izhi mbu he kuklu nga kpanyime mbi ri Izhi he kukulu. 15 Ari he che ritu wandu Izhi, ritu ki tre ri Izhi ta Kristo shime ri bubu gru, ama rimba ran he kpunji ran inde itashɨme ri kuu ran he ran. 16 Inde wari tre ri wa ran ta wa kuu shɨme ran, Yeso ran ran kuu ran ta shɨme ran. 17 Inde Kristo ran tashɨme ran, ikpa nyɨme mbi ran he kuklu, hari zizan bi ri he rimi meme ti mbi. 18 Wari tre ri itashɨme ran he ran, wawa wa kuu rimi yo sron ri Kristo wari gra ri ko wuru nye. 19 Inde yosron mbu ri Kristo ran he ritu sonmbu ri mgbumgbrume nyi ri kankshe, ki ri he kya ri lo sron han mgbron nji.

20 Ama rinyi nye ri no nji no wa kpa nyɨme ri wawa wa kuu rimi Yeso wa tashɨme. 21 Bi to, riwa ikuu ye zhu ri nji riri ngamba nye itashɨme ri zhu ri nji riri. 22 Ko ngan kuu ritu ki he gɨzhi Adamu, ngamba nye ri tashɨme ritu Kristo. 23 Igba hu tre ri wa ki hu rimi tashɨme Kristo nye a he riwa a gbuchi tashme, imba wawa wa he wa Krisro wa tashɨme chachu riwa a ye. 24 Kugon rimba ikre vi ri ye, Kristo ri han gbengbren wawa wa ri kpanchi nga wa doka ri gbengbren. 25 Wawu Kristo ri son ri kpanchi son wan, ran to ri wawu no wa kpan fu wan shan ran ko wa rega. 26 Wa kpanfu wawa wa wuu wa ri krenmkpen nye he kuu. 27 Mbe Izhi tre ri,<<Izhi kɨma kon ngye yo ri ndoza kpanchi son wan.>> Ran tre ri,<<Inde a tre ri ko ngye he ri ndoza gbengbren wan,>>Rimba ran nyaan Izhi kyuwan riwa a no Kristo gbengbren ritu ko ngye ran. 28 Inde Izhi kɨma ko ngye yo ri ndoza wan, wawu Yeso ngawen he ri ndoza Izhi riwa a kɨma ko ngye yo ri ndoza wan, ritu no A ti Izhi no to ri wawu he ko ngye.

29 Inde a ran he ngamba ran, nji wa nyi wa ti ngye, wawa wa son wa ri ima ri nyu wawa wa kuu? Inde wana ta wawa wa kuu shɨme ran ko ngye ti ko wa son nji tu ri ima ri nyu mba? 30 Ngye ti ko ki yo ngambu ri yaa bla vi? 31 Me shizhi imiri vayi, me sondu to kuu bla vi, a he ri rira bibi kpongawon ritu kya riwa Bachi Yeso Kristo ti ri yii. 32 Inde me taku ri wa nji Afisa wawa wa he ka nɨma ji, ri bibi rimɨren nji riba won ri he ngye? Inde hari wa ran ta wawa wa kuu shɨme ran,

<<Ba tse kika son ndu gra ri ri ri so ba,

tunde imibreki kuu.>>

33 Ran no wa gyuru yi ran: Ritu<<Memeti ri kpa ndindi ti time.>> 34 Milan taka ritu kya riwa a tsra bi ri ka ti meme ti chuwo, me tre rinyi ritu no shan tiyi, ritu wari mbi wana to Izhi ran.

35 Ama injo ri miyen,<<Ikɨmo ri tise ran wurunde? ikpa bibi tan nye wa wurunde ri wu?>> 36 Imiyen ri mkpran bibi tan! Inde wu chu wɨlo bikpi ri meme a ran ri zhu mbe ran tsede a kuu ri ka zhu mbe. 37 Nga kya riwa wu chu ri meme a ran he wawu mba nye ri zhu mbe ri mkpomkpon ran, iwɨlo wan nye ri zhu mbe ko inde a he alikama ko bibi bi ri nkan. 38 Izhi ri no kpa riwa a wa no he, ari no ko wɨlo ritan bibi kpaa riwa a he. 39 Inɨma kpa wana he bibi riri ran: Inji wa he ri bibi wamba nkan, inɨma ji wa he ri bibi wamba, chenchen ri bibi wamba nga lambe wa he ri bibi wamba nkan. 40 Ikpa wari wa he ri shu nga wari wa he ri meme, ama imkpen riwa kpa ri shu a he nkan ri bibi kpa ri meme. 41 Igbɨreriwa ji he nkan nga riwa hwa he nkan, iwa wa ntsen wa he nkan, ikpan mba wa he kankan kan. 42 Nghamba nye ari he ri tashɨme ri kuu, wa no ta yɨwi ri kpa mbu ri meme ama wa ta wa shɨme wa ki ba yii tu. 43 Inde wa no kpa yɨwi, ari meme ran ran sen kpa ran, ama inde a tashɨme ari bi ran senkpa; 44 inde wa no kpa yɨwi ari he kpa nji ama inde ari wurunde ari wuru rimi Yuu, inde ikpa riwa ki to-u ri he, ngamba ngawen ikpa ri Yuu ri he. 45 Imbe tre Izhi tre ri,<<Adamu nji ri gbuchi wa ti-u a he nji riwa ari vɨri.>>Wawu Adamu ri kremkpen a he Kristo. Adamu ri krenkpen he Yuu ri de vɨri. 46 Ikya riwa a gbuchi ye a he kpa, nga kpa ri Yuu ka ye kugon. 47 Adamu ri gbuchi riwa wa ti-u ri meme, Kristo nji ri hari zhu ri shu. 48 Wawa wa ti wa ri meme wa he ka Adamu wawa wati wa ri meme, wawa wa zhu ri shu wa he ka wawa wa zhu ri shu. 49 Bibi riwa ki he ka wawa wa he ri meme ngamba nye ki he ka nji riwa a zhu ri shu-a. 50 Ikya riwa me tre ri yi miri vayi, ki ran hi ri shu ri kpa mbu ran, ritu ki kuu ri kpa mbu nyi nga ari gla. 51 Ama de me ngaran tre nyi riwa a tre ri a ran wawu mbu nye ki kuu ran tsede wawu mbu wa sran ta kpa. 52 Wawa wa ku ari vi riri riwa i wa mvɨri rangan ri kremkpen wawa wa kuu wa wa tawa shɨme ri sii nga kita wawa ki he ri sii wa sran ta kpa ngawen. 53 Ritu ikɨmon wawa wa kuu wa tawa shɨme ri sii riwa wana kuu ngaran, ikpa mbu riwa kiran kuu ran wa sran wa. 54 Ka ikpa nyi riwa wa gla a sran ngawan ti kpa ri wa a ran gla ran, nga kpa riwa a kuu nyi a ri kɨma ti kpa riwa a ran ku ngaran, mba tre ri wa a he ri nga a ri zhu ra Izhi ri ban kuu zho ri ta, ikuu ran he ri mgbenbren ri tu mbu nga ran.>>

55 <<Ikuu, ikpande wen ri he ri mi yin?

gbengbren wen he ri mi nyi.>>

56 Ritu meme ti mbu nye ki kuu, nga ritu doka Izhi nye ki to ri ki ti meme ti. 57 Ama ki ngiri ri Izhi riwa a no ta ki kpa nde ritu meme ti nga kuu dzu riwo Bachi mbu Yeso Kristo. 58 Biyi miri vayi won wa hu Izhi, vu sron mgbemgben, sondu ran tindu ri Bachi mbi tunde bi to ri indu riwa bi ti ri Bachi ran he kuklu ran.