1 Imbe nyi zhu ri me Bulus ivren ndu Izhi nga vayi mbu Timoti, hi ri wawa wa hu Izhi ri Tsitsri ri gbu Korantus nga Akaya:

2 No dindi ti riwa A ti mbu Izhi nga Bachi Yeso Kristo no he ri yi.

3 Ki gbre Izhi nga A ti mbu riwa a he Ti Bachi mbu Yeso Kristo, wawu riwa a he A ti riwa ari lo sron, Izhi riwa ari no ta sisron. 4 A no ta sisron bibi riwa kita ngawen ki no wari sisron inde wari wa he ri shnji sron, kita ki no wa sisron bibi riwa Izhi no ta. 5 Bibi riwa iya Kristo shan gra ta ri kpa, ngamba nye ki fe sisron Izhi dzu ri wo Kristo. 6 Inde ki so yaa, rimba he sisron nye wa no ta, inde a he sisron nye wa no ta, biyi ngawen bi fe sisron nye mba, riwa bi vu sron bibi yaa riwa kita ngawen ki so. 7 Bibi yaa riwa bi so ka kita, ngamba nye biyi bi fe sisron riwa Izhi ri no ta. 8 Imiri vayi wa hu Izhi, ki ran ri wa no yi hon to bibi yaa riwa ki so ri meme Asiya ran. Iyaa nyi a bran mgbazhi ran, ki ran to ri ki nawo ran. 9 Kpunji tre ki yonga wa bla yo rita ri ki kuu. Ama rinyi he nganyi ritu ki ran yosron ri ngambu ran, tsede ki ka yo sron ri Izhi riwa ari ta wawa wa kuu shime. 10 Izhi riwa a kpata chuwo rimi meme kuu ki yo sron ri wu ritu riwa ari sondu kpata ran chuwo, 11 riwa bi zon ta rimi bre, ngamba nye ikpa nji wa ngiri ri Izhi ritu mbu ritu dindi ti riwa ki fe ritu kpa nyime bre mbu wa kigbu.

12 Ikya riwa ari no ta chonkpon wan nye he rimɨren sron mbu ri la ta ri ki sonson ri Tsitsri ri mgbumgblume ri sron riri, a zizan iki riwa kpunji tre bibi riwa Izhi, ritu dindi ti Izhi nye a ran he ritu wiwiri riwa mgbumgblume ngaran. 13 Ki ran ngan mbe nyi no yi bibi riwa bi ran hon to-u ran ko bi ri hon kra-u ran. Me yo sron ri chachu ri bi to ta kre, 14 ko bi ran to ta kre zizan ran. Ritu chachu riwa Bachi mbu Yeso ri ye, bi tankpon ritu mbu, bibi riwa kita ngawen ki tankpon ritu mbi.

15 Ri bibi nyɨme nyi, me yosron riwa me gbuchi ye ri yi, ritu bi ri fe tilɨbu ti mkpa hari. 16 Me yosron ri me ye ri yi ka me hi ri meme Makidoniya me bru dzu ri yi nga inde me bru ye me bru hu ri yi inde me bru ri ye, ritu me fe dzon mbi ritu izren won hi ri Yudiya. 17 Bi to ri me ti kya wa nyi a ran ri me ran to kya riwa me ti ran? Ka, bi to ri me ti kya nyi rimi kpa nye, ritu me ri tre, een,<<Me ri bru tre, onhon<<?

18 Bibi riwa a he kpunji Izhi he ri kpa nyɨme nye, ngambame itre riwa ki tre ri yi a ran he,<<Een>>Ngha <<Onhon ran.>> 19 Ritu ivren Izhi Yeso Kristo, riwa ame ri Sila nga Timoti, ki bla tre wan ri yi, a ran he,<<Een>>Nga,<<Onhon ran>>Ama ri wu a he,<<Een nye bla vi.>> 20 Ritu wan nye Izhi ka tre wan dzi riwa a ti. Ritu Yeso Kristo nye ki tre ri,<<No he ngamba>>Ritu mkpen Izhi. 21 Zizan Izhi nye ri nyɨme ta, ri kita ri biyi wawu, ife vri rimi Kristo wawu nye kɨma ta dzi, 22 a no ta nkpen riwa a tsro ri kita ki he wa ma, nga ran no ta wu wan ri sron mbu ritu ran no ta ki to kya riwa ari ti-u kusi. 23 Izhi nye he shada won, inde a he che nye me ti riwa me tre ikya riwa a ti meri ran bru ye ri Korantu ran ritu me ran bru no yi yaa ran. 24 A ran ritu ki wa ki ri samgbren ritu wanyi nye ran, ritu bi ri ti kinklan sron, ritu bi ki mgbemgben ritu yosron mbi.