1 Ritu ngamba, tunde ki he ri ndu nyi ri bibi losron Izhi ki ran chu sron mbu zho ran. 2 Ki kambu ri ya wa yayibi bibi ri meme ti riwa wa he kya ri shan ki kambu ri gyuru nga tiche ri tre Izhi ran, ama ki la kpunji ri ra. Ri nganyi nye ko ri de nyɨme rita ri kusi Izhi rimi sron wan. 3 Inde itre ri ro nyi riwa ki wo a he ri yayɨbi, a he ri yayɨbi ri wawa wa he rimi meme ti. 4 Wawa wa ran kpanyɨme ran, ritu meme nji riwa a he zhi ri nzan nyi a ka sron mba suu a dzu wa ri to kpan riwa ari kpan wa, ikpan nyi riwa ari zhu rimi tre ri ro riwa ari gbre Kristo riwa wawu nye he ka Izhi. 5 Ritu a ran tre Izhi ri tu mbu nye ki la ran, tsede riwa Yeso Kristo, iri wawu nye he Bachi kita ki he ka gran mbi ritu Yeso. 6 Izhi he riri,<<No kpan no kpan ri bu,>>Wawu nye ri no kpan wan no kpan rimi sron mbu, ritu no wa kpa nji no wa to gbre Izhi ri kusi Yeso Kristo.

7 Ri ngamba kita wawa ki he ri wo riwa Yuu, ki he ka wa vaja riwa wa mme ri meme. Kita ki he ngamba ritu no wa tsro ri gbengbren riwa a he wa Izhi nye, a ran he ri ta ran. 8 Wa no ta yaa ri nkon kankankan, ri ngamba me ran ri wa no ta ki kambu ri ndu-a ran. Ri vi wari ki si kambu ri kpanyɨme, ama ki ran chu sron mbu zho ran; 9 Wari wa no ta yaa ri ko kutan, ri ngamba Izhi ran kata chuwo ran ri vi wari wa tsi ta yo ri meme, kau ri ngamba wa ran wuu ta ran. 10 Bla vi ki he ri nyu nkon kuu bibi riwa wa ti ri Yeso ritu no tsro son Yeso rimi ngamba nye riwa ari kuu. 11 Wawu vi mbu ri mgbumgblume, ki he nyu kuu ritu Yeso, ritu no nji no wa to bibi son Yeso ri kpa mbu nyi riwa ari kuu. 12 Ritu wan nye ki to kuu ritu bi ri fe vri riwa a ran kre ran.

13 Mbe Izhi tre ri,<<Me kpanyɨme, ritu ngamba me tre.>>Tunde ki he ri Yuu kpanyɨme bibi riri, to kita ngawen ki kpanyɨme, ritu ngamba nye ngawen ki tre. 14 Ki to ri Izhi riwa a ta Bachi Yeso shɨme ri kuu, ari tata shɨme iwawa Yeso, nga ran kata de ri ku si wan iwayi. 15 Ikya wanyi wawu wa he ritu no dzon yi ritu riwa dindi ti Izhi sondu ri shan ri nji kigbu, ari he kya riwa ki ran ngɨri ri Izhi, ritu no wa gbre wu. 16 Ritu ngamba ki ran chu sron mbu zho ran ko ri wa ikpa mbu sondu ri time, ka hu ri ngamba wa kɨma wu mbu no he sisa bla vi. 17 Bibi yaa riwa ki so nyi a ran ri ban vi bran ran ari ngɨzhi gbre ye ri ta bran riwa a han kya riwa ki to, nga a ri he hi a ran kre ran. 18 A ran kya riwa isi ri to nye ki ya ran, tsede kya riwa ki ran ri to ran ikya riwa ki to wa wa chichi vuyɨba, ama ikya riwa ki ran ri to wa ran wa ran kre ran.