1 Aran tse me ngan riyi ritu dzon nyi ritu wa wa hu Izhi ri Urushelima ran. 2 Ritu me to sron mbi, me wuru wo ri gbobre ritu mbi ri wa nji Makidoniya, ritu ngamba me la yi ri bi yi nji Akaya bi milan son tu ri se riwa a vu yɨba, bibi tsi kpa nyi riwa bi he ri wu a no wa wulunde kuki ri nde ngawen. 3 Zizan ingye ngaan me ti miri vayi mbu wa nyi ndu ritu no wuru wo ri gbobre riwa ki wuru ritu mbi ri ndu nyi no he tre ri kuklu gyen ran. Ama me wa bi ri milan son, bibi riwa me ran tre ri sen ri bi ti. 4 Ritu ka me ye ri wa hu Izhi wari ri Makidoniya, me ran ri wa no wa ye fe yi bi ran milan de mbi ki ri ran. Ka a ti ngamba, Ishan ri ti wen ritu wuru wo ri gbobre riwa me wuru ritu mbi, a ran ame ri nkankshe won ran, nga biyi ngawen. 5 Ri ngamba me to ri a bi me bre wa miri vayi won wa wa ye ko ama me hu wa, ritu no wa kishu kya wa riwa bi tre ri bi de ritu no milan wa ki. Rinyi ri tsro ri bi de wa ri sron riri, a ran ritu wa vu yi no yi de ran.

6 Taka nji riwa a chu bi kpi tsawen ari sren kpi tsawen, ama nji riwa a chu bi kpi bran ari sren kpi bran. 7 Ko nga no de ri sron riri bibi riwa a yo sron, a ran ri kpa sron time, ko wa vu no de ran, ritu Izhi ri nyɨme nji riwa ari de ri ngɨri sron. 8 Izhi ri to no yi kyawa kigbu han kya riwa bi wa ritu ri ko shitan bi fe kya riwa bi wa riwa ari han ngamba ritu bi ri ti ndu ri dindi. 9 Bibi riwa a he ri ngan mbe Izhi,

<<Ari to no wa yaa ri wo hwri dindi ti wan ri he;

ri wa a ran kre ran.>>

10 Izhi nye ri de bi kpi no nji chu, nga ran no ri kigbu. Ritu ngamba Izhi ri no yi bi kpi riwa bi wa nga ran no no gbron ran ti wɨlo kigbu bibi riwa bi fon no wa nji. 11 Ko shitan ari tilɨbu sro ri yi rimi ko ngye ritu ko ngye riwa bi de ri sron riri bla vi. Ri nganyi nji kigbu wa ngiri ri Izhi ritu de riwa no wa hu rita.

12 Ritu ndu nyi ri dindi ti riwa bi ti a ran ritu han ri wa tsitsri ka kre ran ari to ngɨzhi ngiri ye ri Izhi. 13 Ngha ritu kya riwa ari tsro riwa ndu nyi ri ngɨzhi ye ritu mbi, nji kigbu wa gbre Izhi ritu rerembi riwa a hu gon nyɨme riwa bi ti ritu tre ri ro riwa Kristo, nga ritu dzon de ri wo hwri riwa bi ti riwa, nga ngbron nji wawu. 14 Wawa wa bre Izhi ri yi, wari ri tika mbi ri sron mba ritu dindi ti nyi riwa a han gbengbren to riwa Izhi ti ri yi. 15 Ki ngɨri ri Izhi ritu de riwa a no ta, ide riwa a han gbengbren riwa ki bla!