1 Zizan nganyi, imiri vayi ki wa no yi to kya riwa dindi ti Izhi ti ri wa hu Izhi ri gbu Makidoniya. 2 Wa so yaa bran ritu yaa riwa wa gra rimi wan, ritu kinklan sron mba bran a ngiji ye ri dindi ti bran ritu riwa wa no wari, ka hu ri riwa wa he rimi nchon yaa. 3 Me to ri wa de tsra ri gbengbren mba nga ran bran han riwa wa de ri sron riri, a ran ritu wa vu wa no wa de ran. 4 Wa ibreta ri ki no wawa nkon no wa dzon ta tindu, ritu no wawa ngawen no wa fe nkon gra rimi wawa wa dzon wawa wa he Tsitsri rimi meme Yahuda. 5 Wa de han kya riwa ki yo sron ri wa de. Rimi wan wa ka tu mba no Bachi, rimba waka katu mba no ta ngawen, ritu bibi riwa Izhi wa. 6 Ri to ngamba, ki ka ibre Titus ri no tindu-a ran hi ri vu kpi riwa wa de ri sron riri ran kɨshuti ri bubu riri, tunde wawu nye gbuchi. 7 Ritu ko ngye biyi bi he kusi ko ri yosron mbi rimi Kristo ko rimi tre, ka rimi to kpunji, ko ri nyɨme tindu, nga nyɨme riwa bi he riwa rita. Ritu ngamba ki wa no yi ran ti ndindi ti rimi de ri sron riri.

8 Me ran ri vu yi ri gbengbren no dzon ran tsede me tsro yi bibi riwa wari wa yosron mba. Rinyi ri tsra bibi nyɨme riwa bi he ri wu ngbron nji. 9 Bi to bibi dindi ti Bachi mbu Yeso Kristo, ko ri riwa a he ri kongye, ka hu ri ngamba a kɨma he ka nji ri yaa ritu mbu, ritu yaa wan nye ki fe kongye ri kusi Izhi.

10 Ikya riwa me layi a he riwa no yi kre kya riwa bi gbuchi ti ri se riwa a vu yɨba, bi ran de kuklu ka kre ran, a he ritu bi yo sron mbi ri bi ti-u. 11 Zizan bi kre ndu ri bibi sron riwa bi gbuchi riwu, bi ti-u tsra ri senkpa mbi. 12 Ka nji he ri sron ri de, Bachi ri ngɨri ritu kya riwa bi no, ka bi de tsra ri senkpa mbi Izhi ran ri wa no yi ti kya riwa isenkpa mbi ran ke ran.

13 Me ran ri wa me ri no wari kya ri huri nga me ri no wari mbi ri wa a he ri yaa ran, me ti kongye tsra ri ko ngaa. 14 Ama ritu no wa ga ndu nji tsra bibi riwa a bi. Bi ka dzon wa zizan riwa bi he ri nkon ri dzon nga biyi ri vi riwa bi ran he ri kyari ran nga wawa wa he ri kyari, wawa ngawen no wa dzon yi ngawen. Ri ngamba ko ngye ri tsra. 15 Bibi riwa itre Izhi tre rimi ngan,<<Nji riwa a he ri kpi kigbu, a ran ri bran ri wu ran, nji riwa a he ri kpi fiwen, rimba ran he fiwen ri wu ran.>>

16 Me ngiri ri Izhi riwa a no Titus no yosron riwa ari dzon yi, bibi riwa me wa. 17 Aran ra riwa a nyɨme riwa ari hi ri yi bibi riwa ki bre wu ri no ti ran, ama a wa ran ye bibi riwa a yosron ri wawu ri ye ri yi. 18 Ki ti vayi mbu ri nga Titus ndu ri wa a ti nde rimi dɨbu tre ri ro ri wa hu Izhi wawu. 19 Aran ngamba ka kre ran, nji wa hu Izhi wa chu wu no ran hu ta ritu ndu dindi nyi riwa ki ti ritu tsro Mkpen Bachi nga ki ri tsro ri ki he ri sron ri dzon. 20 Ki klu ri ritu no njo no ran kra ta tu ran ritu bibi riwa wa ngɨzhi de nyi riwa wa no ta ri sron riri. 21 Isu mbu he riwa ki ti kongye riwa a tsra, a ran ri kusi Bachi ka kre ran, ama nga ri kusi nji ngawen.

22 Ngha ki ti vayi mbu ndu ri wa riwa nkpa kigbu ki si tsra-u, nga ki ri to sron wan ritu kyawa kankankan zizan a yosron bran ritu nyɨme riwa a he ri wu ritu mbi. 23 Taka iri Titus he kpan ndu won nye, ri ame nga wawu ki ti ndu nyi ritu mbi nye, ngbron miri vayi mbu wawa wa he iwawa nji wa hu Izhi nye wa ti wa ndu, ndu mba ri ngɨzhi Mkpen ye ri Kristo. 24 Bi tsro nji wa nyi bibi nyɨme mbi nji wa hu Izhi wawa wa ti wa ndu wa wo kya riwa bi ti, rinyi ri tsro wa ri ikpo ngambu riwa ki ti ritu mbi he kpunji.