1 Biyi miri vayi wawa me nyɨme yi, tunde wa ka tre dzi ri ta-e no ta ki tsri tumbu ri ko ngye riwa ari no kpa mbu nga sron mbu no zuu. No ta ki son rimi Tsitsri rimi sisiri Izhi.

2 Biyi tsro ri bi nyɨme ta. Ai, ki ran ti meme ti ri njo ri ran, ko ka ki kpa njo time ka ki ri sen njo ran. 3 Me ran tre ri nyi ritu me ri vu yi ri meme ti ran, bibi riwa me gbuchi la yi-e, ikya ri ran ri to ga yi ri nyɨme ta ran, ko ri kuu ko ri son si. 4 Me nyɨme ri yi branbran, nga me ri ri kpongawon ri yi; Isron won he ri tre ri de senkpa bran. Wawu yaa riwa ki so-a, me he ri kinklan sron bran.

5 Ka hu ri riwa ki ye ri meme Makidoniya ki ran fe son vri ran ko kutan ki kɨma iwanyu ri he, ri iwanyu nga sisiri ka sho rita ri sron. 6 Ama Izhi riwa ari de senkpa ri nji riwa a zhu ri sron, ran no ta senkpa ri ye Titus. 7 A ran ritu ye wan nye ka kre ki ngɨri ran, ama itre riwa a la ta me nyɨme ri bi no senkpa. A la ta bibi riwa bi wa bi ri to wen bran, nga bibi riwa bi ti shnji sron ritu kya riwa a ti nga bibi yosron ri shogon won. Rinyi nye no wen sisron bran bran. 8 Ko imbe won riwa me ngan a kpa sron mbi time, a ran suu wen sron ran. Ri sen me ti shnji sron ritu imbe won a kpa sron mbi time, ko riwa a he ri vi hari nye kakre. 9 To bibi riwa kyawa wa he zizan me ti kinklan sron. Ko ri riwa me ri ngɨri riwa me kpa sron mbi time ran, ka meme ti mbi chuwo bi ri sran son mbi, shnji sron mbi he bi. bi wa ti Izhi, ritu ngamba bi ran hon fe kya rita ran. 10 Ritu shnji sron bibi riwa ti Izhi nye ri no nji no ka meme ti wan chuwo, ran kɨma ye ri Izhi, ri ngamba nye ari fe kpa chuwo nga a ran no no tre ri wawu ran to ran-ran ti ran, ama shnji sron riwa mgbumgblume nye ri ngiji nji hi ri kuu. 11 Biyi ya kya riwa shnji sron nyi bibi riwa ti Izhi riwa a ka dzi ri sron mbi a ngɨzhi ye ri yi. A no yi mbiye ri ti-u ran tre ri bi yɨbasi. A no yi bi ti fu, nga bi ri ti sisiri. A no yi bi yo sron nga bi ri he ri tichukpa. A no yi bi milan ki bi ri to bibi de yaa riwa wa de tsra ritu kya nyi, lele ko ri nkon ritan bi tsro ri bi ran ti meme ti ran. 12 Ri vi riwa me ngan mbe ri mu, me ran yosron ri nji riwa a ti meme ti ran, ko nji riwa wa ti meme ti ri wu. Tsede me ngan me ri milan bu tre-a riyi iri Izhi to ri bi nyɨme ta bran. 13 Ritu wan nye ki fe tre ri de senkpa ri sron mbu. A ran tre de senkpa ri sron mbu ka kre ran, ye luwa ki ti kinklan sron bran ritu bibi kinklan sron riwa Titus he riwu, ritu wawu mbi bi dzon wu ritu tre de senkpa riwa Titus fe. 14 Ko me ri la-u ri me kpongawon riyi, ishan ran ti wen ran bibi riwa ikya riwa ki layi a he kpunji, ngambame ikpo ngambu ritu mbi a he kpunji ri kusi Titus. 15 Ngha inyɨme riwa Titus he ri wu ri yi a sondu ri gbron bran riwa a taka ri rerembi wawu, nga bibi de mkpen riwa bi ti riwu ri vi riwa bi kpaa. 16 Me ti kinklan sron zizan ritu me nyɨme ri yi bran.