1 Nduɔ, te nu-kyʉə-kə ndə məmɔ̀ʼ kwáa bʉə-Nyii nə yɔŋ ndə bɔ̂ŋ bɛ Jɛlosalɛŋ, b̈ii fɔ̀ʼ haʼ ndə mɔ gìe tʉ bəchɔshi ndə bɔ̂ŋ bɛ Galatia. 2 Ndəŋ fəŋ kəchî mu vyii mbi təmiyɔŋ, wotəmiyɔŋ mu bii, nɔ kie ndə mələ̀ŋ fɔkə, kə́ chə̀ŋtə haʼ ghʉə ndə Nyii bìʼ ɔ, mbɔ bə mə kə́ mɔ̀ʼ fɔbə bə ndʉʉ ndə mɔ gwè fɛ. 3 Ndʉʉ ndə mɔ bu dàa nɔ, mɔ nyɔ̀ʼ ŋwɔʼnə tə́ŋ bʉə nə yɔŋ, ndə bɔ̂ŋ kʉ̀ʼnə tʉ bii ndə məbɛ̀ʼ mbʉ kəkɔ, gɛ̀ nə yɔŋ Jɛlosalɛŋ. 4 Kaʼ bʉ̀ʉ mbɔ m̈bəŋ-ɔŋ gɛ̀ ghɔ, baʼa bɔŋ gɛ̀ mɔʼɔ.

5 Mɔ bu gwè tʉ bii ndʉʉ ndə mɔ tíŋ hə Masɛdonia, bʉʼka mɔ nɔ kie ndə mətíŋ hə Masɛdonia. 6 Ndʉʉbɛʼ mɔ bu chí bʉʼʉ mɔʼɔ, tə buŋ mìʼtə shyʉʉ-fəʼə inchəŋ, mbɔ bii chʉʼ kwáa mɔ, mɔ gɛ̀ ndə yəŋkə təmiyɔŋ ndə mɔ bu gɛ̀ chɔ. 7 Bʉʼka mɔ tʉʼ kʉ́ʉ ndə məgwè bɛ bʉʼʉ ndə yɔ̄ŋ-yə vɛʼ haʼ məniʼ fɛ. Mɔ nɔ tʉʼ kʉ́ʉ ndə mə-yi-gwè bɛ bʉʼʉ tə kwìhə kaʼ Tiekətʉ bɛ́ŋ. 8 Mɔ bɔŋ bu chí Ɛfɛso tə chî-Bɛŋntaku-kə dàa, 9 bʉʼka fia nɔʼ ŋɔ́ʼnə tʉ mɔ yɔ́ŋyɔ́ŋ ndə fɔ̀ʼ yɔ́ŋyɔ́ŋ, buŋ ndə bʉə-mbyuutə bɛ ghɔ yɔ́ŋyɔ́ŋ.

10 Kaʼ Timɔti gwè, b̈ii lʉ̀ ɔ nə yii-yə wo, bʉʼka ɔ nɔ tʉʼ fɔ̀ʼ fɔʼɔ-Tiekətʉ haʼ ndə yɔŋ mbəŋ tʉʼ fɔ̀ʼ ghɔ. 11 Kə wo mə lʉ̀ ɔ ndə vaambuɔ fɛ, b̈ii kwáa ɔ, ɔ̈ gɛ̀ kəyəŋ ndə ɔ kie ndə məgɛ̀ chɔ nə fyiighʉ́ənə, mbɔ ɔ chʉʼ bʉ̀nə gwè tʉ mɔ, bʉʼka mɔ nɔ tʉʼ kʉ̀ʼ ɔ ghɔŋbə bəbɛʼbəliŋ-bʉʼʉ ndə bɔ̂ŋ nɔʼ bɛ́ŋ Nyii.

12 Nduɔ, te liŋ-yʉʼʉ Abolo, mɔ nɔʼ kwèʼhə ɔŋ shʉ́əshʉ́ə mbɔ ɔ̈ gwè mətòʼ tʉ bii ghɔŋbə bəbɛʼbəliŋ-bʉʼʉ ndə bɔ̂ŋ nɔʼ bɛ́ŋ Nyii təmə ɔ bɔŋ buŋ kʉ̀ʉ məniʼ ndə məgwè nduɔ fɛ. Ɔ bu gwè ndʉʉ ndə ɔ kie saa ndə məgwè.

13 B̈ii láa, b̈ii mɔ̀ʼfyiihə-ii ndəŋ Nyii shʉ́əshʉ́ə, bɛ nə bələŋ, tə́nə shʉ́əshʉ́ə. 14 B̈ii kə́ fɔ̀ʼ nubə inchəŋ nə ŋkʉ̂ʉ.

15 Bii le kínə mbɔ nɔ bɛ nchinjaa-Shitifanu ndə bɔ̂ŋ kə fəŋ bɛ́ŋ Nyii mu Akia bɔŋleʼ kɔ́ ŋwɔŋ-yʉə ndə məfɔ̀ʼ tʉ bʉə-Nyii. Nduɔ, mɔ nɔ tʉʼ fʉ̀ʉtə bii 16 mbɔ b̈ii kə́ yʉ́ hə kəghɔ ntɛ bʉə nə yɔ̄ŋ-yə leʼnə bəbɛʼbʉə nə bɔŋ ndə bɔ̂ŋ nɔʼ kɔ́ ŋwɔŋtə-ʉə ndə ntɛ fɔʼɔ-maa-ɔ̄ŋ bii bɔŋ fɔ̀ʼ shʉ́əshʉ́ə. 17 Tʉʉ-ɔ nɔ kə bʉ̀ʉ ndʉʉ ndə Shitifanu ghɔŋbə Fɔtunatu leʼnə Achaku kə gwè dàa, bʉʼka bɔ̂ŋ nɔ kə fɔ̀ʼ nukə ndə bii kə gòʼ təmə bɛ fɛ̄ŋ ndə məfɔ̀ʼ fɛ. 18 Bʉʼka bɔ̂ŋ nɔ kə chìi tʉʉ-ɔ bʉ̀ʉ haʼ ndə bɔ̂ŋ kə kɔ́ tʉʉjyu tʉ bii. B̈ii kɔ́ kuŋhə tʉ ntɛ bʉə-maa-bɔ̄ŋ.

19 Bəchɔshi ndə i bɛ mu Esia nɔ tə́ŋ nchaʼtə-yʉə tʉ bii. Akwila ghɔŋ Bilisika leʼnə chɔshi ndə i tʉʼ fə́nə mu njaa-bɔŋ nɔ tə́ŋ nchaʼtə shʉ́əshʉ́ə tʉ bii yie-Tiekətʉ. 20 Bəliŋ-bʉʼʉ bənchəŋ ndə bɔ̂ŋ nɔʼ bɛ́ŋ Nyii nɔ tə́ŋ nchaʼtə tʉ bii. B̈ii gìetə tʉ ŋwɔŋtə-ii nə nchaʼtə ndə i bɛ ŋkʉʉ.

21 Nɔ nyɔ̀ʼ mbəŋ-ɔŋ Bɔɔ nyɔ̀ʼ nchaʼtə-ɔ̄ŋ nə yɔŋ-yə ghɔkə.

22 Tə ndɔŋ bɛ kətʉ wo ndə ɔ gòʼ təmə kʉ̀ʉ Tiekətʉ fɛ. Tiekətʉ-yaʼ, gwè!

23 Tə Jiso Tiekətʉ dʉ̀ʼ buuŋjyu-i tʉ bii.

24 Ŋkʉ̂ʉ-ɔ bɛ tʉ bii bənchəŋ ndə bii bɛ mu Klai Jiso. Ï bɛ haʼ nɔ.