1 Tiefɛ̀ʼndɛŋkwɛʼtəŋNyii təmiyɔŋ, b̃ə nɔ séʼ ɔ hə mu yi-yə bʉə, dùʼhə ɔŋ ndə məfɔ̀ʼ tʉ Nyii yie-bɔŋ, ndə məkɔ́ kɔkə-ʉə tʉ Nyii bɔŋleʼ fɛ̀ʼndɛŋ bʉʼka bʉ̂ʼtə-ʉə. 2 Bʉʼka mbəŋ-ɛŋ bɛ woməsʉʉ təmə bəkɔ ɔ mə byúu mɔ̀ʼmbɛ mu məchimbi-ɔ fɛ, ɔ nɔ kínə ndə bəkɔ ɔ yá fyii-i te bʉə ndə bɔ̂ŋ tʉʼ chìi mɔ̀ʼmbɛ bʉʼka bɔ̂ŋ kínə mbɔ bɛ mɔ̀ʼmbɛ fɛ. 3 Bʉʼka yɔ̄ŋ-yə, ɔ nɔ kie ndə yaʼ fɛ̀ʼndɛŋ ndəŋ yi-yə bʉ̂ʼtə haʼ ndə ɔ tʉʼ fɛ̀ʼndɛŋ ndəŋ yi-bəbɛʼbʉə-yə. 4 Wo mə bɛ tiefɛ̀ʼndɛŋNyii haʼ bʉʼka mbɔ ɔ kʉ̀ʉ ntɛ kuŋhə-ɔ̄ŋ fɛ. Nɔ kie Nyii ndə mətíi ɔ ndə fɔʼɔ-ɔ̄, haʼ ndə ɔ kə tíi Alo.

5 Nɔ bɛ haʼ nɔ ghɔ, Klai kə chìi ŋwɔŋ-ɛŋ ndə məbɛ tiefɛ̀ʼndɛŋkwɛʼtəŋNyii mbɔ ɔ chʉʼ kie kuŋhə fɛ bɔŋ nɔ nə dùʼhə Nyii dùʼhə ɔŋ ndə ɔ kə ghɔ̀ŋ tʉ ɔŋ mbɔ,

"A nɔ bɛ Vaa-ɔŋ,

laa mɔ nɔ kɛŋ bɛ Tie-a."*

6 Haʼ ndə ɔ ghɔ̀ŋ ndə ibɛʼ-yə yəŋkə mu ŋwɔʼnə-i mbɔ,

"A nɔ bɛ wofɛ̀ʼndɛŋNyii təmə liʼ-i ghɔ fɛ,

haʼ nə Mɛkisɛdɛ kə bɛ."*

7 Vɛʼ Jiso ndə ɔ kə bɛ kəwʉʉnəmbi fɛ̄ŋ, ɔ nɔ kə́ gháaNyii bɔŋleʼ gwía nubə-i tʉ ɔŋ nə gyʉʉ dədə leʼnə shʉmə, ndə bəkɔ ɔ kwáa ɔ ndəŋ kwú. Nyii yʉ́ gwia-ɛ bʉʼka mbɔ ɔ kə kɔ́ ŋwɔŋ-ɛŋ ndə məfɔ̀ʼ tʉ Nyii jyujyu. 8 Buŋ ndə ɔ kə bɛ VaaNyii, ɔ nɔ nə yétə ndə məyʉ́ chu-Nyii tíŋ hə bɔ̌ŋ ŋgʉəʼ ndə ɔ kə tíŋ hə muŋgɔ. 9 Nɔ bɛ nukə ndə i chìi N̈yii lʉ̀ ɔ ndə məbɛ tiefɛ̀ʼndɛŋkwɛʼtəŋ təmə kwɔtəkə mbʉə-ɔ fɛ, bə chìi ɔ, ɔ̈ bɛ fia ndə mətíŋ hə chɔ kie ŋkwaaNyii təmə liʼ-i ghɔ fɛ, tʉ bʉə bənchəŋ ndə bɔŋ yʉ́ chu-i. 10 Yɔ̄ŋ-yə nɔ bɛ bʉʼka ndə Nyii kə dùʼhə ɔŋ ndə məbɛ tiefɛ̀ʼndɛŋkwɛʼtəŋNyii nə Mɛkisɛdɛ kə bɛ.

11 Nubə nɔ bɛ ghɔ buŋmbi ndə məgìe te nukə-ɔ̄ŋ, i bɔŋ shʉ́ə ndə məfʉ̀ʼtə tʉ bii kínə, bʉʼka mu-kətʉ-hə-ii nɔʼ chíe daa ndə məyʉ́ nukə. 12 Bʉʼka bii nɔʼ kə kie ŋgwɔʼmbi yɔ́ŋyɔ́ŋ ndə i kʉ̀ʼnə tʉ bii ndə bii kə kie ndə mə-kə́-dàhə bəbɛʼbʉə dàhə. Bɔŋ nduɔ, bii kə́ bíe kʉ̀ʉ haʼ mbɔ b̈ə kə́ bìʼ dàhə bii nə fəŋ-bənu-tə ndə bii kə yʉ́ ndə ntəŋ Nyii ndə i kə gwè tʉ bii. Tʉ bii ndə mə-kə́-yú fɔ-shʉ́əshʉ́ə-bə nduɔ, bii kə́ bíe nyúu haʼ ŋwɔ̂ŋ. 13 Wo ndə ɔ tʉʼ nyúu ŋwɔ̂ŋ nɔ bíe vaambuɔ, ɔ kínə nubə ndə Nyii tʉʼ dàhə te mə bɛ ndyʉndyʉ fɛ. 14 Fɔyu-shʉ́əshʉ́ə-bə nɔ bɛ tʉ bʉə ghəŋ, ndə bɔ̂ŋ nɔʼ bɔ́ ndaahə-ʉə ndə məyétə jyujyu ndə mətúhə nu-jyujyu-bə ndə nu-bʉəbʉə-bə.