1 Yɔ̄ŋ-yə kʉ̂ʉ tíŋ, Jiso dàa taanə-kəghəŋ-Galili-kə, ndə bə kə́ tíi ghɔ nə taanə-kəghəŋ-Tibelia-kə. 2 Nuɔ-bʉə-buŋmbi kə́ gɛ̀ hə bɔ̌ŋ ɔŋ bʉʼka bɔ̂ŋ nɔʼ kə́ nyíɛ cheʼbə ndə ɔ kə́ chìi ndəŋ bʉə-bəyɔʼ. 3 Jiso kóʼ gɛ̀ ndəŋ kwɔŋ, kʉ̂ʉ gɛ̀ dàa chɔ, shíʼ dùʼ sê ghɔŋbə vâafɔʼɔ-bi. 4 Tʉ ndʉʉ ndə bʉə-Juu yú nchəŋtə-Yíɛʼsii chɔ nɔʼ kə́ kʉ̀ʼnə gwè. 5 Jiso kʉ̂ʉ kə chɔ̀ʼhə shʉ-i, nyíɛ nuɔ-bʉə-buŋmbi kə́ kə́ŋhə gwè mbʉə-ɔ, Jiso bíʼtə tʉ Fili mbɔ, "Bʉʼʉ bu nyúɔ bəbele fa fɛ̄ŋ, ndə məyúʼ bʉə-bɔ̄ŋ chɔ?"Jiso yúʼ ŋkɔŋ-bʉə-hə itaa 6 Ɔ nɔ nə gìe yɔ̄ŋ-yə ndə məyúotə ɔŋ, bʉʼka ɔ nɔ nə kínə nə mbəŋ-ɛŋ nukə ndə ɔ bu chìi.

7 Fili bə̀ŋhə tʉ ɔŋ mbɔ, "Kyʉə ndə bəkɔ bə fɔ̀ʼ ndə bəchi fɔ̂ŋ * mə kʉ̀ʼnə ndə mənyúɔ bele ndə bəkɔ mbyu wo-imɔʼ mu bɔŋ kwó vaadyʉʼʉ-i fɛ." 8 Mbyu vaafɔ̀ʼ-ɛ, Andolo liŋ-Samu-Bita, gìe tʉ ɔŋ mbɔ, 9 "Mbyu vaabələŋbɛʼ nɔ bɛ fɛ̄ŋ ndə ɔ kie mbyu-bele-hə itaa ndə bə chìi nə ntɔŋ-bali-mə leʼnə mbyu-mbɔʼ-hə ibûu, bɔŋ maa-yɔ̄ŋ mə chìi ka tʉ bʉə buŋmbi?" 10 Jiso ghɔ̀ŋ mbɔ, "B̈ii téʼ tʉ mbʉ bʉə b̈ɔ̂ŋ dùʼtə sê." Ndʉʉmɛ, ŋkɔ nɔ nə bɛ kəyəŋ-ghɔ̄ buŋmbi, mbʉ bʉə dùʼtə sê, bələŋ kə bɛ chɔ tə gɛ̀ ŋkɔŋ-bələŋ-hə bətaa. 11 Ndʉʉmɛ, Jiso lʉ̀ mbʉ mbyu-bele-hə, ndʉʉ ndə ɔ kɔ́ ndɔ, ɔ gyʉ̀ətə tʉ mbʉ bʉə ndə bɔ̂ŋ dùʼtə sê. Ɔ chìi haʼ nɔ nə mbʉ mbɔʼ, b̈ɔ̂ŋ yú ghʉə ndə bɔ̂ŋ kʉ̀ʉ. 12 Ndʉʉ ndə b̈ɔ̂ŋ yú tə yuo, ɔ ghɔ̀ŋ tʉ vâafɔʼɔ-bi mbɔ, "B̈ii chə̀ŋtə kwuʼkwuʼ-i, kə fɔkə mə bɛ́ fɛ." 13 Ndʉʉghɔfii, bɔ̂ŋ chə̀ŋtə mbʉ bəbəʼ bele itaa ndə bɔ̂ŋ kə yú le, i lə́ŋ shyiibə njuɔ bûu nə wuŋ.

14 Ndʉʉ ndə mbʉ bʉə nyíɛ cheʼkə ndə ɔ chìi, bɔ̂ŋ ghɔ̀ŋ mbɔ, "Nɔ bɛ mbʉ yʉkəŋgieNyii leʼ shʉəŋ ndə ɔ kə bɛ ndə məgwè kəwʉʉnəmbi!" 15 Jiso kʉ̂ʉ nyíɛ mbɔ bɔ̂ŋ bu gwè yá ɔ nə ghʉəʼkə gɛ̀ chìi ɔ ndə fɔŋ, ɔ bìʼ shùʼ ŋwɔŋ-ɛŋ bɔ̌ŋ kóʼ gɛ̀ ndəŋ kwɔŋ.

16 Kʉ̂ʉ bɛ ndʉʉbuumbi, vâafɔʼɔ-bi shíʼ gɛ̀ ŋgwuu taanə-kəghəŋ-kə, 17 kóʼ mu kəbuu kə́ dàa gɛ̀ Kabanu. Mbi nɔ nɔʼ kə fʉ́əŋ, təmə Jiso nɔʼ gwè bìatə bɔŋ fɛ. 18 Muu chʉ́ʉhə kə́ bə̀ŋtə bʉʼka fʉʉ-shʉ́əshʉ́ə-kə ndə i kə́ tíŋ. 19 Ndʉʉ ndə bɔ̂ŋ nɔʼ té tə kə gɛ̀ nə ŋkɔŋ-bəghǔu-hə ibûu nə təghyʉʉ tətaa byuunɔ ŋkɔŋ-bəghǔu-hə itia, bɔ̂ŋ nyíɛ Jiso, ɔ kə́ tòʼ ndəŋ muu gwè mbʉə kəbuu, i fɛ̀ŋhə bɔŋ. 20 Bɔŋ ɔ ghɔ̀ŋ tʉ bɔŋ mbɔ, "Nɔ bɛ mɔ, kə bii mə leʼ fàa fɛ." 21 Tʉʉ-yʉə bʉ̀ʉ ndə məlʉ̀ ɔ kóʼhə mu mbʉ kəbuu, haʼ ndʉʉmɛ, mbʉ kəbuu dàa njəŋmbi kəyəŋ ndə bɔ̂ŋ kə́ gɛ̀ chɔ.

22 Kʉ̂ʉ bɛ ndə biitə-kəchî-kə nuɔ-bʉə ndə bɔ̂ŋ kə káa ndə ibɛʼ-yə via-kətaanə-kəghəŋ-kə nyíɛ mbɔ nɔ nə bɛ haʼ mbyu kəbuu imɔʼ chɔ, təmə Jiso bɔŋ kə kóʼ ghɔŋbə vâafɔʼɔ-bi mu kəbuu fɛ, gɛ̀ haʼ vâafɔʼɔ-bi tətɛʼ bɔŋ. 23 Bəbɛʼbə buubə gwè hə Tibelia gwè dàa mbʉə kəyəŋ ndə bɔ̂ŋ kə kwó bele chɔ ndə Tiekətʉ nɔʼ kə kɔ́ ndɔ chɔ le. 24 Ndʉʉ ndə mbʉ nuɔ-bʉə kə nyíɛ mbɔ Jiso kə bíe chɔ fɛ, təkɔmə vâafɔʼɔ-bi, bɔŋ kóʼ mu mbʉ bəbuu gɛ̀ Kabanu kə́ kʉ́ʉ Jiso. 25 Ndʉʉ ndə bɔ̂ŋ kə nyíɛ Jiso ndə ibɛʼ-yə via-kətaanə-kəghəŋ-kə, bɔ̂ŋ ghɔ̀ŋ tʉ ɔŋ mbɔ, "Chicha, a gwè fɛ̄ŋ ndʉʉka?"

26 Jiso bə̀ŋhə tʉ bɔŋ mbɔ, "M̈ɔ kɛŋ shyíi bii nə shʉəŋ mbɔ, bii tʉʼ kʉ́ʉ mɔ bə bʉʼka mbɔ b̈ii nyíɛ nubəcheʼbə ndə mɔ fɔ̀ʼ fɛ, bii nɔ tʉʼ kʉ́ʉ mɔ bʉʼka bii nɔ kə kwó mbʉ bəbele tə yuo. 27 Kə bii mə kə́ nyíɛ ŋgʉəʼ bʉʼka fɔyubə ndə i bu byʉ́ʼ fɛ, b̈ii bɔŋ kə́ nyíɛ ŋgʉəʼ bə ndə fɔyubə ndə i bu chí, kɔ́ məchímbi təmə liʼ-i ghɔ fɛ ndə Vaa-Woməsʉʉ bu kɔ́ tʉ bii. Bʉʼka Nyii mbʉ Tie nɔʼ kɔ́ ghʉəʼkə tʉ ɔŋ." 28 Bɔ̂ŋ bíʼtə tʉ ɔŋ mbɔ, "Baʼa kie ndə məchìi ka ndə mə-kə́-fɔ̀ʼ fɔʼɔ tʉ Nyii le?" 29 Jiso bə̀ŋhə tʉ bɔŋ mbɔ, "Nɔ bɛ fɔʼɔ-Nyii nɔ, mbɔ ä bɛ́ŋ wo ndə ɔ tə́ŋ ɔŋ."

30 Ndʉʉmɛ, bɔ̂ŋ ghɔ̀ŋ tʉ ɔŋ mbɔ, "Bɛ yɔ̂ŋ-yə ntɛ kəcheʼ ndə a bu fɔ̀ʼ, baʼa chʉʼ nyíɛ bɛ́ŋ aŋ? Bɛ ntɛ fɔʼɔ ka ndə a bu fɔ̀ʼ? 31 Bətie-baʼa nɔ nə yú fɔbə ndə bə tíi nə mana mu kwɔŋkəyəŋnə, haʼ ndə bə kə nyɔ̀ʼ mu ŋwɔʼnə-Nyii mbɔ, ‘Ɔ kə kɔ́ bele tʉ bɔŋ hə yuo ndə məkwó.’ "

32 Jiso ghɔ̀ŋ tʉ bɔŋ ndʉʉmɛ mbɔ, "M̈ɔ kɛŋ shyíi bii nə shʉəŋ mbɔ nə kaa Mushi ndə ɔ kə kɔ́ bele tʉ bii ndə i kə lɔ̀ hə yuo fɛ, nɔ bɛ Tie-ɔ ndə ɔ̃ kɔ́ ŋkɛŋ bele tʉ bii ndə i lɔ̀ hə yuo. 33 Bʉʼka bele Nyii nɔ bɛ wo ndə ɔ gwè hə yuo bɔŋ-kə́-leʼ kɔ́ məchímbi tʉ wʉʉnəmbikə."

34 Bɔ̂ŋ ghɔ̀ŋ tʉ ɔŋ mbɔ, "Tie-yaʼ, kə́ kɔ́ bele-ɔ̄ tʉ baʼa təvɛʼtəvɛʼ."

35 Jiso bə̀ŋhə tʉ bɔŋ mbɔ, "Mɔ nɔ bɛ bele ndə ĩ kɔ́ məchímbi, wotəmiyɔŋ ndə ɔ gwè tʉ mɔ jyʉʉ bieleʼ nə yɔ́ʼ ɔ fɛ, wotəmiyɔŋ ndə ɔ bɛ́ŋ mɔ, fyii-i bieleʼ nə yə́ŋ fɛ. 36 Mɔ bɔŋ kə shyíi bii mbɔ bii nɔʼ nyíɛ mɔ təmə bɔŋ bɛ́ŋ mɔ fɛ. 37 Wotəmiyɔŋ ndə Tie-ɔ kɔ́ tʉ mɔ bu gwè tʉ mɔ, bɔŋ wotəmiyɔŋ ndə ɔ gwè tʉ mɔ, mɔ kʉʉ nə jə̀ŋ ɔŋ fɛ. 38 Bʉʼka mɔ kə gwè hə yuo ndə məfɔ̀ʼ yɔŋ-yə ŋkʉʉnə tʉʉ fɛ, bɔŋ ndə məfɔ̀ʼ ŋkʉʉnə-tʉʉ-wo ndə ɔ tə́ŋ mɔ. 39 Nɔ ŋkʉʉnə-tʉʉ-wo ndə ɔ tə́ŋ mɔ nɔ, mbɔ nchəŋnchəŋ bʉə ndə ɔ kɔ́ tʉ mɔ, mbyu imɔʼ mə yi bɛ́ fɛ, bɔŋ mbɔ mɔ yi leʼ kóʼhə bɔŋ ndəŋ ndyiʼtə-kəchî-kə. 40 Nɔ bɛ ŋkʉʉnə-tʉʉ-Tie-ɔ nɔ mbɔ wotəmiyɔŋ ndə ɔ nyíɛ mbʉ Vaa bɔŋleʼ bɛ́ŋ ɔŋ nɔ kie ndə məkie məchímbi təmə liʼ-i ghɔ fɛ, mɔ bɔŋ bu bʉ̀nə kóʼhə ɔŋ ndəŋ ndyiʼtə-kəchî-kə."

41 Ndʉʉmɛ, bʉə-Juu kə́ luŋtə te ɔ, bʉʼka ɔ nɔ nə ghɔ̀ŋ mbɔ, "Mɔ nɔ bɛ bele ndə i shíʼ gwè hə yuo." 42 Bɔ̂ŋ ghɔ̀ŋ mbɔ, "Kaa Jiso nɔ fe, vaa-Jɔsɛ, ndə bʉʼʉ kínə tie-e ghɔŋbə ŋkwê-i fe? Chìi ka ɔ ghɔ̀ŋ nduɔ mbɔ, ‘Mɔ nɔ gwè hə yuo?’ "

43 Jiso bə̀ŋhə tʉ bɔŋ mbɔ, "Kə bii mə kə́ luŋtə mu bii fɛ. 44 Wo mə gwè tʉ mɔ fɛ yaʼkɛŋ mbɔ mbʉ Tie ndə ɔ tə́ŋ mɔ dùu ɔ, gwè nə nɔŋ. Mɔ bu bʉ̀nə kóʼhə ɔŋ ndəŋ ndyiʼtə-kəchî-kə. 45 BʉəyʉkəŋgieNyii nɔ nə nyɔ̀ʼ mbɔ, ‘Nyii bu dàhə bɔŋ bənchəŋ.’ Wotəmiyɔŋ ndə ɔ nɔʼ yʉ́ bɔŋleʼ yétə hə kəghɔ mbʉ Tie nɔ bu gwè tʉ mɔ. 46 Kaa mbɔ wotəmiyɔŋ nɔʼ nyíɛ mbʉ Tie fɛ, yaʼkɛŋ mbəŋ-ɛŋ ndə ɔ gwè hə bəshʉ-Nyii, ɔ nɔʼ nyíɛ mbʉ Tie. 47 M̈ɔ kɛŋ shyíi bii nə shʉəŋ mbɔ wotəmiyɔŋ ndə ɔ bɛ́ŋ mɔ nɔʼ kie məchímbi təmə liʼ-i ghɔ fɛ. 48 Mɔ nɔ bɛ bele ndə ĩ kɔ́ məchímbi. 49 Bətie-bii nɔ nə yú fɔbə ndə bə kə́ tíi nə mana mu kwɔŋkəyəŋnə bɔŋ kwú haʼ kwú. 50 Bɔŋ bele ndə i shíʼ hə yuo, nɔ bɛ ntɛ yi-yə ndə kaʼ wo kwó, ɔ leʼnə kwú fɛ. 51 Mɔ nɔ bɛ bele ndə i kie məchímbi ndə i shíʼ hə yuo. Kaʼ wo kwó bele-ɔ̄, ɔ chí mbi təmə liʼ-i ghɔ fɛ. Bɔŋ ntɛ bele ndə mɔ bu leʼ kɔ́ tʉ wʉʉnəmbikə ndə məkie məchímbi nɔ bɛ mbɔʼ-mbʉə-ɔ."

52 Bʉə-Juu kə́ túŋ bəŋʉʉ mu bɔŋ ghɔ̀ŋ mbɔ, "Bəkɔ wo-ɔ̄ kɔ́ mbɔʼ-mbʉə-e tʉ bʉʼʉ mbɔ b̈ʉʼʉ kwó təka?"

53 Ndʉʉmɛ, Jiso ghɔ̀ŋ tʉ bɔŋ mbɔ, "M̈ɔ kɛŋ shyíi bii nə shʉəŋ mbɔ kaʼ bii gòʼ təmə kwó mbɔʼ-Vaa-Woməsʉʉ, bɔŋleʼ nú fɔbʉəkə-i fɛ, bii mə kie məchímbi mu mbʉə-bii fɛ. 54 Wotəmiyɔŋ ndə ɔ yúʼ ŋwɔŋ-ɛŋ nə mbɔʼ-mbʉə-ɔ bɔŋleʼ nú fɔbʉəkə-ɔŋ nɔʼ kie məchímbi təmə liʼ-i ghɔ fɛ, mɔ bu bʉ̀nə kóʼhə ɔŋ ndəŋ ndyiʼtə-kəchî-kə. 55 Bʉʼka mbɔʼ-mbʉə-ɔ nɔ bɛ ŋkɛŋ bəfɔyu, fɔbʉəkə-ɔŋ kə́ bɛ ŋkɛŋ kəfɔ ndə mənú. 56 Wotəmiyɔŋ ndə ɔ yúʼ ŋwɔŋ-ɛŋ nə mbɔʼ-mbʉə-ɔ, nú fɔbʉəkə-ɔŋ nɔ bu káa mu mɔ, mbəŋ-ɔŋ kaa mu ɔŋ. 57 Haʼ ndə mbʉ Tie ndə ɔ kie məchímbi hə kəghɔ-ɔ tə́ŋ mɔ, mɔ kə́ chí mbi bʉʼka ɔ, wotəmiyɔŋ ndə ɔ tʉʼ yúʼ ŋwɔŋ-ɛŋ nə mbɔʼ-mbʉə-ɔ, mbəŋ-ɛŋ bu kie məchímbi kəghɔ-mɔ. 58 Nɔ bɛ bele nɔ ndə i shíʼ hə yuo, kaa ntɛ yi-yə ndə bətie-bii kə yú kwútə le fɛ. Wotəmiyɔŋ ndə ɔ yúʼ ŋwɔŋ-ɛŋ nə yɔ̄ŋ-yə bu kie məchímbi təmə liʼ-i ghɔ fɛ."

59 Jiso nɔ nə gìe nubə-ɔ̄ŋ mu njaagháaNyii ndʉʉ ndə ɔ kə́ dàhə Kabanu.

60 Ndʉʉ ndə vâafɔʼɔ-bi buŋmbi kə yʉ́ yɔ̄ŋ-yə, bɔ̂ŋ ghɔ̀ŋ mbɔ, "Nubə-ɔ̄ŋ nɔ shʉ́ə daa bəkɔ bɛ́ŋ nda?"

61 Bɔŋ Jiso kʉ̂ʉ kínə mu fyii-ɔ mbɔ vâafɔʼɔ-bi tʉʼ luŋtə te nubə-ɔ̄ŋ, ɔ bíʼtə tʉ bɔŋ mbɔ, "Yɔ̄ŋ-yə tʉʼ shùɔ shʉtə-ii mɛ? 62 I bu bɛ təka ndʉʉghɔfii, kaʼ b̈ii nyíɛ Vaa-Woməsʉʉ kə́ bʉ̀nə kóʼ gɛ̀ kəyəŋ ndə ɔ kə fəŋ bɛ chɔ? 63 Nɔ bɛ Lyʉʉhəkə ndə ĩ kɔ́ məchímbi, mbɔʼ-mbʉə məkɔ́ fɛ. Ŋgiebə ndə mɔ nɔʼ gìe tʉ bii nɔ bɛ bəyihə ghɔŋbə məchímbi. 64 Bɔŋ bəbɛʼbʉə nɔ mu bii ndə bɔ̂ŋ gòʼ təmə bɛ́ŋ fɛ." (Bʉʼka Jiso nɔ nə kínə hə bəshʉ nə bʉə ndə bɔ̂ŋ bu yi bɛ́ŋ ɔŋ fɛ leʼnə wo ndə ɔ bu fɛ̀ŋ ɔŋ.) 65 Jiso ghɔ̀ŋ tʉ bɔŋ mbɔ, "Nɔ bɛ nukə nɔ ndə mɔ kə ghɔ̀ŋ tʉ bii mbɔ mbyu wo mə gwè tʉ mɔ fɛ yaʼkɛŋ mbɔ mbʉ Tie chìi ɔ̈ gwè."

66 Yɔ̄ŋ-yə kʉ̂ʉ tíŋ, buŋmbi vâafɔʼɔ-bi bʉ̀nə gɛ̀ nə wʉə təmə leʼ tòʼ ghɔŋbə Jiso fɛ. 67 Ndʉʉmɛ, Jiso ghɔ̀ŋ tʉ mbʉ vâafɔʼɔ-bi njuɔ bûu nə wuŋ mbɔ, "Bii kʉ̀ʉ ndə məbʉ̀nə ghɔ mɛ?" 68 Samu Bita bə̀ŋhə tʉ ɔŋ mbɔ, "Tiekətʉ, baʼa bu gɛ̀ tʉ nda? A nɔ kie ŋgiebə ndə ĩ kɔ́ məchímbi təmə liʼ-i ghɔ fɛ, 69 baʼa bɔŋ-nɔʼ-leʼ bɛ́ŋ, bɔŋleʼ kínə mbɔ, a nɔ bɛ mbʉ Wo Tʉʉnə ndə ɔ lɔ̀ hə bəshʉ-Nyii." 70 Jiso bə̀ŋhə tʉ bɔŋ mbɔ, "Kə séʼ mɔ séʼ bii njuɔ bûu nə wuŋ fe? Bɔŋ mbyu wo mu bii nɔ bɛ debulu." 71 Ɔ nɔ kə́ kwə́ʼ te Juda vaa-Samu Iskalo bʉʼka ɔ nɔ nə bɛ mbyu vaafɔ̀ʼ mu vâafɔʼɔ-bi njuɔ bûu nə wuŋ, ndə ɔ bu fɛ̀ŋ ɔŋ.