Marcos 11

Jiso sʉ̀ʉnə mu Jɛlosalɛŋ ndə məsɛ́ʼ ŋgʉʼʉ

1 Ndʉʉ ndə Jiso ghɔŋbə vâafɔʼɔ-bi gɛ̀ tə kə́ kə́ŋhə Jɛlosalɛŋ, mbʉə Befe ghɔŋbə Bɛtani ndə i kə bɛ mbʉə Kwɔŋ-bəTyʉ-Oli, Jiso tə́ŋ vâafɔʼɔ-bi bəbûu, 2 ghɔ̀ŋ tʉ bɔŋ mbɔ, "B̈ii gɛ̀ mu lɔʼɔ-fīi bəshʉ bii le, haʼ ndə bii tʉʼ sʉ́ʉ nɔ, bii bu nyíɛ vaaŋgwɔŋ-jakashi ndə bə chyúu ɔ, təmə wo nɔʼ nə kóʼ ndəŋ ɔŋ fɛ. B̈ii yɔ̀ʼ ɔ gwè nə nɔŋ. 3 Kaʼ wo bíʼtə tʉ bii mbɔ, ‘Bii tʉʼ yɔ̀ʼ ɔ bʉʼka ka?’ B̈ii ghɔ̀ŋ mbɔ, ‘Mbʉ Tiekətʉ nɔ kie fɔʼɔ nə yɔŋ, bɔŋ-bu-leʼ byʉ̀hə kɔ́ fɛ̄ŋ haʼ ndʉʉ ndə ɔ liʼ.’ " 4 Bɔ̂ŋ lɔ̀ gɛ̀, gɛ̀ nyíɛ vaaŋgwɔŋ-jakashi ndə bə chyúu ɔ mbʉə chusiibɛʼ kəmbia fia, bɔ̂ŋ yɔ̀ʼ ɔ. 5 Bʉəbɛʼbə ndə bɔ̂ŋ kə́ nyíɛ bɔŋ ghɔ̀ŋ tʉ bɔŋ mbɔ, "Bii tʉʼ yì ka, bii tʉʼ yɔ̀ʼ bə mbʉ vaaŋgwɔŋ-jakashi mɛ?" 6 Bɔ̂ŋ shyíi bɔŋ nə nukə ndə mbʉ Jiso kə ghɔŋ, bɔ̂ŋ mɛ̀ʼtə bɔŋ, mbɔ b̈ɔ̂ŋ gɛ̀ nə yɔŋ. 7 Bɔ̂ŋ gwè nə mbʉ vaaŋgwɔŋ-jakashi tʉ Jiso, gwè shùɔ ndyi-fəʼə-hə-ʉə sɛ̀nə ndəŋ mbʉ jakashi, ɔ kóʼ dùʼ ndəŋ ghɔ. 8 Bʉə buŋmbi kə́ sɛ̀nə ndyi-fəʼə-hə-ʉə sêfia, bəbɛʼbə sɛ̀nə yuu-tɛ́ŋ-bə sêfia ndə bɔ̂ŋ bə́ʼtə muŋkɔ. 9 Bʉə ndə bɔ̂ŋ kə́ gɛ̀ hə bəshʉ ghɔŋbə bʉə ndə bɔ̂ŋ kə́ gwè hə bɔ̌ŋ kə́ tòʼ tíitə ghɔ̀ŋ mbɔ,

"Osana!*11:9 "Osana" nɔ bɛ ŋgie-Hibulu-kə ndə i bɛ mbɔ, "N̈yii kwáa baʼa nduɔ," bɔŋ ndə mbi kə kwɛ̀ʼtə gɛ̀ bɛ mbɔ "Bʉʼʉ lə̀ʼtə Nyii."

Tə Nyii bìʼ wo ndə ɔ gwè yie-Tiekətʉ!*11:9 Ŋwɔʼnə-təLyuu 118:25-26.

10 N̈yii bìʼ sɔ́ʼ-tie-yʉʼʉ-Dɛbi ndə i tʉʼ gwè!

B̈ə kɔ́ kuŋhə tʉ Nyii gɛ̀ tə dàa liʼ yuo!"

11 Ɔ ŋíi mu Jɛlosalɛŋ gɛ̀ ŋíi mu chunjaafɛ̀ʼndɛŋNyii. Ndʉʉ ndə ɔ nɔʼ lɛ́nə fɔbə inchəŋ, bʉʼka mbi nɔʼ kə gɛ̀ dàa, ɔ fyú gɛ̀ Bɛtani ghɔŋbə vâafɔʼɔ-bi njuɔ bûu nə wuŋ.