1 ABulus tse a ta ne aDerbe nɛ aListira. Afi ikuus akak kin se azɔng fi ba ku yes aTimoti, nggon angas baYahuda akak fɛ́ a kin yet afi ikuus, atek kun yet afɛ́ aGirik. 2 Ngma bafi ikuus fɛ́ ba se na aListira nɛ aIkoniyum nyes kucɛɛt kutek natoon wu. 3 ABulus kin shim aTimoti na tseng gung ni wu, nek anɔng, a ku ya katse, nek baYahuda fɛ́ ba se na narɔ me yɔng, nek ngma ba ba rēn fok ada wu yet afɛ́ aGirik. 4 Ni izen fɛ́ ba teng ba kat ni nwɔp zizɛɛt-zizɛɛt, ba ka ba nesek ikyɛng fɛ́ batom-aYeso nɛ bashɔn ikuus fɛ́ ba se na aRushelima fɛ́ na ba ras. 5 Nek anɔng, itusung bafi ikuus e bang sɛ agap abik, kudot ba di barasa nninom.Kutseet ishara ifɛ́ itek aBulus kufɛ afaa

6 Wat ba teng ba kat ni mben aFirijiya nɛ aGalati, nek Kabik aJɛrɛ mi ka ba ro mo ishara ifɛ̀ ni mben Asiya. 7 Ni izen fɛ́ ba mi tse ba ta ni mben aMeshia, ba tsɛt ba nɔ ni mben aBitiniya, awɛt Kabik aYeso ka ba ro mo inɔ. 8 Nek anɔng, ba got ni fam aMeshia ba tisik sak ni wɔp aTorowas. 9 Wat ba tonong aBulus e na nabos abik natuk, a di anet aMasedoniya ni nyeseng, na tsot akabɔk ni wu ye, <<Bɛ sak azeng na aMasedoniya, bɛ́ ki sɛ yit mo.>> 10 Nkum fɛ́ ba tarak ayisi aBulus e, in kpa tsɛt yit irèn sak na aMasedoniya, in mi sok yit na ayɛ yit fok Adakunom shim ni in tsin shara yit ifɛ̀ wu sak ni ba.

11 In won yit aTorowas, in kpa wɔk yit ayɛt kukyɛ ashi, in di berem yit tabat sak na aSamutares, akatson e in tsin ta yit na aNiyapolis. 12 In won yit azɔng sak na aFilipi, agbat iwɔp na aMasedoniya fɛ́ banet iwɔp e yet bafɛ́ aRoma. In nye yit nkɔs nkak azɔng.

13 Atuk aSabat, in wuruk yit atisi iwɔp e sak ni ifam ikyɛk, in yes yit fok gyan in sɛ yit karɔ awon. In sonong yit, in kpa cɛɛt yit ne banyining fɛ́ ba kana tusung azɔng. 14 Azining ayɛt banyining fɛ́ ba ki fok yit e kin yet aLidiya, fɛ́ a ne ni wɔp aTayatira. A yet anet irɛɛs ares agyigyɛl, anet ikuus Adakunom. ATisa tarak iyɛ wu nɔng a di te nhwyɛ ni ifɛ̀ fɛ́ aBulus se ni icɛɛt e. 15 Ni izen fɛ́ ba ku ra abatisma ni ishɛrɛp bafɛ́ ari wu, a fɛ̀ ni iyit, <<Ki iyin mi di sok yin tɛ afi ikuus aTisa, bɛ da sonong yin ari hom.>> A di ban ni yit.

16 Atuk akak, in kin se yit ni itseng sak narɔ awon, in wat in nyim yit ne kanamang kakak kasam e fɛ́ ka bɛ̀ kabik kubok iyɛrɛ, na anɔng, batèk ka di sɛs ijik makiyi nek kubok fɛ́ ka ras. 17 Ka di kuus aBulus nɛ bakak yit, na ka tang kukun ye, <<Banet bang yet basam Adakunom Azɔk-Bazɔk, fɛ́ ba tsin ki shara yin ifɛ̀ irèn isɛ isheshek.>> 18 Ka woso i di ban anɔng, nnom dot. Izen fi ikyɛng e tsi ibeseng aBulus iyɛ makiyi, a tirik, a fɛ̀ ne kabik e, <<Imi fɛ̀ ni ngɔn ayit iyerek aYeso Kristi, wuruk ayɛt ka.>> Ka wat ka wuruk ayit izen e yɔng.

19 Awɛt izen fɛ́ batèk ka di fok irèn isɛs ijik ba mi tseng, ba tekap aBulus nɛ aSilas, ba kpa ka ba kɔk sak ashon batek azumung narɔ ijik. 20 Ni izen fɛ́ ba tse ba ta ashon batek azumung e, ba fɛ̀, <<Banet bang yet baYahuda, ba doro nhwyɛ iwɔp yit gyet awo. 21 Ba ki tees yit nggɔn fi da in se gyat iyit bafɛ́ aRoma ni in ra yit awo.>>

22 Kudyɛng banet e ka ba sɛ mo idoro fulul naton ba, batek azumung e, ama fɛ́ ba mi ka ba sarak ares, ba sak na ba ka ba tsot ni íshɛn. 23 Ama fɛ́ ba mi ka ba nye aduk itsot, ba ka ba barak ari inyang, ba kɔrɔk anet itosok kari inyang e kuto fok, da a won na ba hwyet awo. 24 Wat iwu nek ishan ifɛ̀ kuri idɔng, a ka ba sok a barak nitu kufɛ́ ayɛt e, a rosom atak bá ni kum.

25 Abak katite atuk, aBulus nɛ aSilas se ni ira awon nɛ abom sak na Adakunom, ishɛrɛp bafi inyang e se ni i ka ba foos, 26 ni izen izining mben kpa zuut, fi in sak itis kari inyang e kpa to. Izen izining natitu ari inyang e wat na tarak, anyang akaangan wat a ibis na. 27 Ni izen fɛ́ anet itosok kari inyang e shemeng, a di natitu piyot, a kɔrɔk awal wu, nɔng a di ki fɛt ice wu, a yes gyan bafi inyang e mi hwyesek. 28 Awɛt aBulus ta kutɔ a fɛ̀ ni wu, <<I bi man ice ngɔn awo! Iyit bang mo azeng ngma yit!>>

29 Anet itosok kari inyang e sak na ba ku bɛ́ ni kurong, a di berem ayɛt e, ni itiim irɔm ni nnyim, a kpa ashon aBulus nɛ aSilas. 30 Ama anɔng, a ka ba tun amatse, a fɛ̀ ni iba, <<Bátisa, akyɛ fi in da nye, nɔng in di ki sɛ isheshek ɛ?>>

31 Ba fɛ̀ ni wu, <<Shan atsak ne aTisa aYeso, i da sɛ isheshek, ngɔn nɛ kasa ngɔn kusum.>> 32 Ama anɔng, ba ku taas ifɛ̀ aTisa ni ishɛrɛp banet fɛ́ ba kin se azɔng ari wu. 33 Ayɛt atuk e, a ka ba sok, a ka ba kusu nfot e, ba wat ba ku ra abatisma iwu nɛ bafɛ́ ari wu ngma kusum. 34 Ama anɔng, a ka ba sok sak ari wu, a ka ba nɔk nayak. Iwu nɛ bafɛ́ ari wu ngma kusum ba nye iyɛ ikan nek iwu mi nɔɔk atsak ne Adakunom.

35 Awɛt fɛ́ kadiding nye, batek azumung e tom nnon-íshɛn, ye, <<Tsi fɛ̀ yin na ba won banet e na ba tsɛng.>> 36 Anet itosok kari inyang e tak aBulus itom e, ye, <<Batek azumung e mi te itom fok na ba ki won yin ni i tsɛng yin. Nek anɔng, wuruk yin, da tsɛng yin kyang.>>

37 Awɛt aBulus fɛ̀ ni iba, <<Ba mi ki tsot yit na yisi banet, dang ba ki tak yit inɛn yit, ngma ni kusot yit tɛ nnon mben aRoma, ba mi ki barak yit ari inyang. Wat yɔkɔnɔng ba shim ba ki tun yit ni nɛt ɛ? Awey yo! Won na ba bɛ́ ba ki tun yit ice bá.>>

38 Nnon-íshɛn e tɛ na bun ni ifɛ̀ me sak na batek azumung e, wat nnyim ka ba yit fɛ́ ba fok fok ba yet nnon mben aRoma. 39 Nek anɔng, ba bɛ́ ba tsot akabɔk ni ba. Ama fɛ́ ba mi ka ba tun, ba fɛ̀ ni iba na ba won kuwɔp e. 40 Ama fɛ́ ba wuruk ari inyang e, ba tse ari aLidiya, ama fɛ́ ba nyim ne bafi ikuus, ba te bafi ikuus e agap iyɛ, ba da ne ba tseng.