Atos 3

ABitrus te kyang amɛrɛk anet

1 Atuk akak, aBitrus nɛ aYohana, ba kin tsin tseng sak ni kutu iya Adakunom ntong, ni izen ira awon, kpaf itsɔm bɔk itaat ifɛ́ ahwyɛ. 2 Azɔng atisi me yɔng fɛ́ ba yes ika Katisi Katek, amɛrɛk akak di se, fi nggɔ wu ku tes anɔng, fɛ́ ba tse na ba ku saas azɔng, nek awon itsɔm na bayɔng fɛ́ ba nɔɔs ni itu iya Adakunom ntong e. 3 Ni izen fɛ́ a di aBitrus nɛ aYohana shim ba nɔ, a ra awon itsɔm ni ba. 4 ABitrus di sak ayisi ting ni wu, ngma na aYohana. ABitrus da ma fɛ̀ ni wu, <<Ki yɛrɛk yit!>> 5 Wat anet e di sak kuhwyɛ ni ba, a yes nyan a da sɛ ikikak ni ba.

6 ABitrus ma fɛ̀ ni wu, <<Imi bi itsɔm awo, nkum ikyɛng fi in bɛ̀, in da ka nɔk ide. Ni iyerek aYeso Kristi anet aNazaret, dorok da tseng.>> 7 A ku tekap kubɔk iyak, a ku sɛ mo idorok, ni izen izining, atak nɛ agbirik wu wat a te gbagba. 8 A furuk lot, a kpa kutseet. A ka ba kuus mo sak atasa kutu iya Adakunom ntong e, a tseng na furu, na woso itere Adakunom. 9 Ni izen fɛ́ banet ku di, a tsin tseng na tere Adakunom, 10 ba rēn fok iwu wu fɛ́ a sosok, na ras awon, atisi kutu iya Adakunom ntong fɛ́ ba yes ika Katek, ngma ba, ayɔɔt, nɛ akpɔrɔk ka ba yit naton ikyɛng fi ite.