Salmos 24

Mndewa Mkulu

(Zabuli ya Daudi.)

1 Isi na vyeng’ha viwele mgati mwake ndo vya heye Mkulu Nguluwi,

isi na weng’ha walingikala mgati mwake ndo vya heye.

2 Kwa vila heye nakawika misisi ja isi mchanya mwa bahali,

nakajiwika nzinzili mchanya mwa nzanda za mazi.

3 Whaani yokwina kuli chidunda cha Mkulu Nguluwi?

Whaani yochikala kuli ng’handa ya heye yelile?

4 Munhu yawele na madito ganojile na nhumbula nzelu,

yohambe yauwiche muhe wa heye kuli kudeta,

ne kilaha kwa udesi.

5 Munhu ayo kobochela utambichizo kulawa kwa Mkulu Nguluwi

na hachi ya heye kulawa kwa Nguluwi wa ulohozi wa heye.

6 Ndo vyoluwele lulelo lwa walingumpala heye,

ena, wanhu walingumpala Nguluwi wa Yakobo.

7 Mchumuche hemwe lwizi,

mchumuche, hemwe lwizi lwa katali,

mndewa mkulu yaweze kwinjila.

8 Whaani ayo Mndewa mkulu?

Ndo Mkulu Nguluwi Yawele na Mong’ho na ludali,

Mkulu Nguluwi Yawele na Ludali kuli ngondo.

9 Mchumuche hemwe lwizi

mchumuche, hemwe lwizi lwa katali,

mndewa mkulu yaweze kwinjila.

10 Whaani ayo Mndewa mkulu?

Ndo Mkulu Nguluwi Yawele na Mong’ho,

heye ndo Mndewa wa ukulu.