1 Nie Paulo mtumigwa wa Kilisito Yesu kwa ubwedo wa Mulungu, na ndugu Timoteo.

Chikuwaandikileni mweye watogozi wa Mulungu mwili uko Kolinto, na want'hu wose wa Mulungu wa kila hant'hu weli kudibululu dya Akaya. 2 Chikumulomba Mulungu Tati yetu na Mndewa wetu Yesu Kilisito, awenk'he wende na utondowazi.

3 Chikumwink'ha hewala Mulungu, Tata wa Mndewa wetu Yesu Kilisito, Tata eli na ubazi, na Mulungu akuchitaza chikawa mmahenyeko. 4 Yeye akuchitaza mmahenyeko yetu yose, ili nacheye chidahe kuwataza wamwenga weli mmahenyeko gesa cheye ivochitazigwe na Mulungu. 5 Gesa ivo chikuiyoha kuhenyezigwa kwaajili ya kumtogola Kilisito, ivo nivo utazi wa Mulungu ukuiyoha kuchigangamiza mgati yetu kufosela Yesu Kilisito. 6 Ikawa chikuhenyeka, ni kwaajili ya kuwataza na kuwahonya mweye. Chitenda ivo, kwaajili ya kuwataza na kuwagela nguvu mdahe kufinyiliza mahenyeko yalayala chikuhenyeka cheye. 7 Elo lolelo dyetu kumwenu ni kulu, chikumanya kuwa mkahenyeka gesa cheye nivo namgeligwe moyo gesa cheye ivo chigeligwe moyo. 8 Ndugu, chikulonda mmanye mahenyeko chiyapatile kui isi ya Asia. Kwavila mahenyeko yala yakala yachielemea nk'hani, hata chikakant'ha malolelo ya kugendelela kuwa wagima. 9 Chikala gesa want'hu chilamuligwe kudanganika ili chileke kuisigamila wenyewe, mbali chimsigamile Mulungu ila akuwabweleza want'hu muugima. 10 Mulungu achihonyile muink'hondo nk'hulu ya kudanganika, naachihonye kaidi. Kwavila chiika lolelo dyetu kumwake kuwa naagendelele kuchihonya. 11 Mweye mkachitaza kwa kuchilombela, kulomba kwenu nakuhulikike na Mulungu, na yeye naachitendele yadamane. Kwavila want'hu wengi nawamwink'he hewala Mulungu kwaajili ya wende wake kumwetu.

12 Mbuli chikuigodela ni imwe, nayo ni myoyo yetu ikuchilongela kuwa chikala mui isi, na mbuli ya mana nk'hani ni kuwa haguhi yetu cheye na mweye, muunank'hani na utogofu ukulawa kwa Mulungu. Hachitendile ivo kwa umanyi wa want'hu mbali kwa wende wa Mulungu. 13 Chikuwaandikila mbuli mkuzidaha kuzisoma na kuzikombaganya, hulolela namkombaganye goya uko kuink'homelezo, 14 kwavila kwa haluse hamchikombaganye goya, mbali hutogola namwize kuchikombaganya goya ila siku ya kubwela Mndewa Yesu, aho niho na mweye mkulonda kuigodele cheye, gesa cheye ivo chikuigodela mweye. 15 Kwavila nikala hutogola mbuli zino nazilawile, nilonda tenk'hu nize kumwenu, ili muhokele kaidi wende wa Mulungu. 16 Muint'hambo yangu ya kwita na kubwela kulawa kui isi ya Makedonia, nikala nikambila kufosela kumwenu, ili mnitaze muint'hambo yangu ya kwita kudibululu dya Yudea. 17 Vino, mkumanya ivonilondile kutenda ivo nikala gesa mnt'hu wa kubidukabiduka? Egu mkugesa kuwa hutenda ulamuzi wangu kwa umanyi wa want'hu na kuwa hulonga "Ena." Na hulonga "Bule." Ahoaho? 18 Mbali gesa Mulungu ivoeli mtogofu, yala chikalile chikuwalongela si mbuli za kulonga, "Ena." Na kamala chilonge, "Bule." 19 Kwavila Yesu Kilisito, Mwana wa Mulungu ila chilongile mbuli zake kumwenu, Nie, Siliwano na Timoteo, hakalile wa kulonga, "Ena." Na yeye alonge "Bule." Mbali kumwake yeye siku zose ni "Ena." Iyo ni kulonga kuwa yala akuyalonga yose ni ya kweli. 20 Kwavila yala yose Mulungu alongile naachink'he kufosela Yesu Kilisito ni "Ena." Ivoelo kumwake yeye ni "Tawile." Kwa utunyo wa Mulungu. 21 Mulungu nio akuchitenda cheye na mweye chitimalale goya muukuiyunga na Kilisito, kwavila Mulungu mwenyewe nio achisagule, 22 na akaika lagiso mchanya yetu kulagisa kuwa cheye ni want'hu wake, na kaika Muhe wake mgati mmwetu, na haluse chinauhakika kwa yala yose achiikile. 23 Mulungu nio akumanya kuwa nie hulonga ukweli, na sibwelile kaidi kudibululu dya Kolinto kwaajili ya kuwaonele ubazi. 24 Hachikulonda kuwasulutiza muukutogola kwenu, cheye chikumanya mweye mtimalala goya muutogozi wenu, mbali chikusank'hana hamwenga na mweye kwaajili ya denk'ho dyenu.