1 Mitufi yetu ikuchitenda chikale hano hai isi ni gesa maheha, mbali maheha yano yakabanangigwa, Mulungu naachink'he kaya uko kuulanga. Kaya iyo haizengigwe na want'hu na ni ya siku zose bila nk'homelezo. 2 Haluse chikuugulila kuno chikulolela kwa nk'hwina nk'hulu, Mulungu kuchivika mitufi imwenga ya kuulanga. 3 Chikapata mtufi wa kuulanga, sekechioneke chibule mwenda. 4 Chikawa chink'hali chikukala mmitufi ino hano mui isi, chikuugulila kwa mengi yakuchielemea. Hachikulonda kuuhalava mtufi uno ukudanganika, mbali chikulonda kuvikigwa mtufi haukudanganika, ili kila chikudanganika kimeligwe na ugima. 5 Mulungu mwenyewe nio akuchisasalila mbuli iyo, na kachink'ha Muhe wake ili chimanye kuwa ayo yose nio achiikile. 6 Ivolelo, siku zose chikukala chibule oga. Chikumanya kuwa kukala mumtufi uno muhala ni kukala kutali na Mndewa. 7 Kwavila chikukala kwa utogozi, sio kwa yala chikuyaona. 8 Mbali hachikuogoha, na ni muhavu chiuleke mtufi uno na kwita kukala na Mndewa. 9 Ivoelo, chikawa chimumtufi uno egu chihatali nayo, mbuli chikuilonda ni kumbwedeza Mndewa. 10 Kwavila cheye chose chikulondigwa chitimalale halongozi ha Kilisito ili achilamule, na chila mnt'hu naahokele kwa yala ayatendile chipindi akukala mui isi, viwe vidamana egu viha.

11 Ivo, kwavila chikumanya kumfugamalila Mulungu na kuwanyuta wamwenga ili wamtogole. Mulungu akuchimanya goya na hutogola kuwa na mweye namwe mkuchimanya goya. 12 Hachikugeza kuigoda kaidi halongozi henu, mbali chikuwenk'hani nyafasi ya kuigoda kwaajili yetu cheye, ili mdahe kuwalongela wala wakuigodela yala yakuoneka kwa meso kufosa yala ya mumoyo mmwawe. 13 Ikiwa chioneka kuwa chihenyuka, iyo ni kwa ajili ya Mulungu, na ikiwa china umanyi wetu, iyo ni kwaajili yenu. 14 Kwavila cheye chikulongozwa na ubwedo wa Kilisito, elo chikumanya kuwa mnt'hu imwe kadanganika kwaajili ya want'hu wose, ivo want'hu wose chidanganika hamwenga nae. 15 Nae kadanganika kwaajili ya want'hu wose, ili wose wakukala wasekukala kaidi kwajili yawe wenyewe, mbali wakale kwaajili yake ila adanganikile na kubwela muugima kwaajili yawe. 16 Ivo kwandusila haluse hachikumulamula mnt'hu kwa kumulola. Ingawa hanachipindi chikala chimmanya Kilisito kwa kumulola, mbali haluse sekechimulamule kaidi kwa kumulola. 17 Ivo mnt'hu yoyote akaiyunga na Kilisito kawa chiumbe chipya, mbuli za umwaka zifosa, ziza mbuli mpya. 18 Yano yose yatendigwa na Kilisito. Yeye akuwalava want'hu muubananzi na kachink'ha cheye sank'hano ino ya kuwanyuta want'hu wamwenga kwita kumwake. 19 Nio kulonga Mulungu kakala akuwaunga kaidi want'hu wa isi zose na yeye kwa kufosela Kilisito bila kuwazila uhasanyi wawe. Na kachink'ha cheye sank'hano ya kuwalongela want'hu ili waiyunge nae. 20 Ivo, Kilisito kachituma kutenda sank'hano yake, na kufosela cheye Mulungu akuwalonda muiyunge na yeye. Chino nicho Kilisito akuchilonda kuwalombeni mweye mchitende. 21 Kilisito kakala abule zambi, mbali Mulungu kamtenda awe na zambi kwa ajili yetu, ili cheye kwa kuiyunga na yeye chidahe kutogoligwa halongozi ha Mulungu.