1 Ndugu zangu, kwavila Mulungu kalonga naachink'he yano yose, chileke kutenda mbuli zila zikugela uhasanyi mmitufi na loho zetu, ili chiwe want'hu wanank'hani kwa kumtogola Mulungu na kumtegeleza.

2 Chikulomba mchibwede. Hachimtendele mnt'hu yoyote mbuli ihile, hachimulumize mnt'hu yoyote egu kumuhunila mnt'hu yoyote. 3 Sikulonga mbuli zino kwa ajili ya kumulamula mnt'hu, kwavila, gesa ivonilongole kulonga, mweye chikuwabweda mweye. Ivoelo kudanganika egu kuhona cheye chihamwenga na mweye. 4 Huwatogola nk'hani mweye na huigodela mweye. Ingawa chikuhenyeka nk'hani, mbali mweye mkunigangamaza na kunitenda nidenk'helele nk'hani. 5 Hata ivochifikile Makedonia, hachipatile nyafasi ya kuhumula. Chila hant'hu hakala na ndwagi, na mmyoyo mmwetu chikala na mashaka. 6 Mbali Mulungu, mwenye kuwataza want'hu, kachitaza cheye hala ezile Tito. 7 Sio kwa kwiza Tito muhala, mbali kwa moyo mmwink'hile mweye. Tito kachilongela vila mkulonda kuniona, na ivomwili na chiholozi, na ivomkulonda kuniyalala. Mbuli ino ikunibwedeza nk'hani. 8 Hata ikawa niwagela usungu kwa baluwa yangu, sikuiona gesa nihasanya. Ingawa nimanya kwa chipindi chidodo, kwavila humanya kuwa baluwa yangu iwalumizile, mbali kwa chipindi chidodo. 9 Haluse hubwedelela si kwavila niwalumiza, mbali kwavila usungu wenu uwatenda mbidule myoyo yenu na kuleka zambi. Uko kulumila kwenu kukala ni kwa kubweda kwake Mulungu. Ivo cheye hachiwalumize. 10 Usungu ukugaligwa na ubwedo wa Mulungu, ukugala mbiduko wa moyo, na biduko dya moyo dikugala uhonyi. Ivo, habule kuiyona kuhasanya. Ivo, usungu ukwiza kwa mbuli za mui isi ukugala kudanganika. 11 Lola, usungu ukugalwa kwa kubweda kwake Mulungu. Mweye haluse muwa want'hu mkulonda kutenda mbuli zidamane, mkulonda kuwalagisa want'hu kila mkukitenda vila kidamane, hamkubweda zambi, mkulonda kutenda yala akulonda Mulungu, mkulonda kutenda mbuli zidamane, mkulonda kumbwedeza Mndewa, mkulonda kumulamula mnt'hu yoyote akutenda mbuli zihile. Mweye mkuilagisa kuwa mbule uhasanyi mzi mbuli zose. 12 Ivo, ingawa niandika ila baluwa, mbali haiwile kwaajili ya ila ahasanye egu kwa ila atendeligwe uhasanyi. Niandika ili ioneke bila kufisa halongozi ha Mulungu ivo muiyohile kuilava kwaajili yetu. 13 Ivoelo chitazigwa.

Muukutazigwa kwetu chidenk'helela nk'hani kufoseleza kwaajili ya denk'ho dya Tito, kulawana na vila mumbwedeze muumoyo wake. 14 Nie niwatunya nk'hani halongozi hake, namweye hamnigelile chinyala. Mbali chila chint'hu chiwalongeleni chikala kweli, na kula kuitunya kwetu kwa Tito kwajili yenu vilavila kukulagisa kuwa ni kweli. 15 Ivo, ubwedo wa Tito kumwenu ukuongezekela nk'hani akakumbuka vila mkalile mkumtegeleza, na ivommuhokele kwa woga na kugudemeka. 16 Hudenk'helela nk'hani kwavila hudaha kuwatogola mweye mui kila mbuli.