1 Nie Paulo ila huoneka muhole nikawa hamwenga na mweye, na nikawa kutali na mweye. Mbali huwalombeleni nk'hani kwa uhole na wende wake Kilisito. 2 Huwalombeni nikeza msekunitenda niwe mkali, kwavila humanya hudaha kuwa mkali kwa wala wose wakuchigesa chikukala kwa kukola mbuli za isi ino. 3 Kweli chikukala mui isi, mbali hachikutoana gesa ivowakutoana want'hu wa mui isi. 4 Kwavila vint'hu chili navo muukutoana sio va mui isi, mbali ni nguvu ya Mulungu ikudaha kubananga vikwangwazi vose va wanongwa. Chikubananga magesa yose ya uhuni. 5 Vilavila chikubomola kila kikwangwazi cha magodelo chiikigwe kulema want'hu wasekummanya Kilisito, na chikuyasola magesa yawe ya uwasi na chikuwafunza wamtegeleze Kilisito. 6 Mweye mkawa tiali kumtegeleza Kilisito kwa chila chint'hu, cheye chikuwa tiali kuwalamula want'hu wose hawakumtegeleza Kilisito. 7 Mweye mkulondigwa mzilole mbuli mkuziona kwa meso yenu. Mbali ikawa hana mnt'hu akuiyona yeye wa Kilisito, amanye kuwa nacheye chimtogola gesa yeye ivoamtogole Kilisito. 8 Hata ikawa huigoda kwa mbuli ya ukulu achink'hile Mndewa, ukulu wa kuwazenga na sio wa kuwabomola, hata ivo sikuona chinyala. 9 Sikulonda mgese kuwa kwa baluwa zangu hulonda kuwatenda muogohe. 10 Want'hu wamwenga wakulonga, "Baluwa za Paulo ni kali na ndala, mbali yeye akawa na cheye ni mnt'hu abule nguvu, na hata akalonga kulonga kwake si kint'hu." 11 Mnt'hu akulonga ivo, akulondeka akumbuke kuwa yala chikuyandika chikawa kutali na mweye na yala chikuyatenda chikawa na mweye yose yakulingana. 12 Kwa vovote vila hachikugeza kuiika egu kuilinganiza na wala want'hu wakuitunya wenyewe. Want'hu wakugeza wenyewe na wakuilinganiza wenyewe kwa wenyewe, want'hu ao ni wahenye. 13 Mbali cheye hachikuigoda kufoseleza, mbali kuigoda kwetu nakusigale mchipimo cha sank'hano achink'hile Mulungu, vilavila sank'hano iyo chikutenda kumwenu mweye. 14 Cheye ivo chizile kumwenu hachiitunyile kufoseleza. Cheye nio chilongole kwiza kumwenu kuwagalila Mbuli Idamane ya Kilisito. 15 Ivo, cheye hachikuitunya kwa kufoseleza kwa sank'hano itendigwe na want'hu wamwenga. Mbali chikulolela kuwa kumtogola kwenu Mulungu kukugendelela, na sankhano yetu ikuwa nkhulu kwa kukola yala akuyalonda Mulungu. 16 Aho nachidahe kulonga Mbuli Idamane mzi isi zimwenga, zihatali na mweye, na sekeiwe mbuli ya kuigodela sank'hano itendigwe na want'hu wamwenga wa hant'hu hamwenga. 17 Mbali gesa ivoiyandikigwe Maandiko ya Mulungu, "Mnt'hu akulonda kuigoda, aigode kwa yala atendile Mndewa." 18 Akutogoligwa si ila akuitunya mwenyewe, mbali ila akutunyigwa na Mndewa.