1 Hulomba mnifinyilize chidogo, hata ikawa huoneka nina kahenye, hulomba mnifinyilizeni chidogo. 2 Huwaamila gesa Mulungu ivo akuwaamila, kwavila mweye ni gesa mwanamke hanagenda na mwanamulume, nitogolile aposigwe na mwanamulume imwe, na mwanamulume iyo ni Kilisito. 3 Mbali huogoha msekwiza kuhunilwa gesa Hawa ivoahuniligwe kwa ubala wa ila nyoka, mkauleka utogofu wenu wa kweli kwa Kilisito. 4 Ivo, mnt'hu yoyote akeza kumwenu kuwalongela mbuli ya Yesu imwenga sio ila chiwalongele cheye na mkaihokela, mweye mkamuhokela goya. Vilavila mkahokela muhe umwenga sio Muhe wa Mulungu, na mkuhokela Mbuli Idamane imwenga na sio ila muihokele kulawa kumwetu. 5 Nie sikugesa kuwa ni mdodo gesa ao wakuitanga wenyewe kuwa "Watumigwa wakulu." 6 Hata ikawa nie sikudaha kulonga goya, mbali humanya mbuli nyingi. Chila hant'hu na chila chipindi mbuli ino chiilagisa kumwenu bila kuifisa. 7 Nie nilonga Mbuli Idamane ya Mulungu kumwenu bila kulonda kulihwa, na niitenda mdodo ili nidahe kuwainula mweye. Vino, nitenda vihile? 8 Ivo nikalile huwasank'hanila mweye, nikala gesa huwahoka want'hu wamwenga wamtogole Kilisito kwa kusola vint'hu vawe, ili nidahe kuwasank'hanila mweye. 9 Ivonikalile hamwe na mweye simsigamile mnt'hu yoyote. Kwavila watogozi wayenu walawile Makedonia wanigalila vose nivilondile. Na nikala hutiganya nk'hani nisekuwa mzigo kwa namna yoyote ila, nasilondile kuwalomba mweye chint'hu chochote, na hugendelela kutenda ivo. 10 Habule mnt'hu yoyote mui is ya Akaya akulonda kunitenda nisekuitunya kwa mbuli ino. Hulonga ivo kwavila ukweli wa Kilisito umgati mmwangu. 11 Hulonga vino sio kuwa sikuwabweda, mbali Mulungu mwenyewe akumanya kuwa nie huwabweda! 12 Nanigendelele kutenda gesa ivohutenda haluse, ili nisekuwenk'ha nyafasi wala wakubweda kuigoda, kuwa wakusank'hana gesa cheye. 13 Kwavila, ao ni watumigwa wa uhuni, na wakuihunila sankhano zawe kwa kuitenda watumigwa wa Kilisito kwa kuwahunila want'hu. 14 Iyo sio mbuli ya kukangawaza, kwavila hata Shetani akudaha kuibidula kuwa gesa Msank'hani adamane halongozi ha Mulungu. 15 Ivo, sio mbuli ya kukangawaza, ikawa na ao watumigwa wa Shetani wakuitenda kuwa watumigwa wadamana. Uhelelo wawe nawalihigwe kila wakulondeka walihwe kwayala wayatendile.

16 Hulonga kaidi, mnt'hu yoyote asekugesa kuwa nie ni muhenye, mbali hata ikawa mkugesa ivo, hulomba mnitegeleze gesa muhenye ili niwe na chakuigodela chidogo. 17 Icho hulonga haluse sio kila anilagize Mndewa, mbali mbuli iyo nio huigodela. Mbali hulonga yano gesa mnt'hu muhenye. 18 Want'hu wengi wakuigoda gesa want'hu wa isi ivowakutenda, vilavila nanie naniigode. 19 Mweye mkuiona mna umanyi, nio ikutenda muwafinyilize na kuwatogola kwa denk'ho want'hu wahenye. 20 Mkumfinyiliza mnt'hu akuwatenda mweye watwana, akuwabawila na kuwahoka vint'hu venu, mwenye kuitunya na kuwadukana na kuwatoa mui cheni. 21 Huona chinyala kuwa cheye chikala chibule nguvu kutenda mbuli izo.

Mbali ikawa hana mnt'hu yoyote akugeza kuigoda kwaajili ya vint'hu, hulonga gesa mnt'hu muhenye, nie nae sikuogoha kuigoda. 22 Ikawa ao ni Waibulania, nanie ni Muibulania. Ikawa ao ni Waizilaeli, nanie ni Muizilaeli. Ikawa ao ni weleko wa Ibulahimu, nanie ni weleko wa Ibulahimu. 23 Ao ni watumigwa wa Kilisito, hata nie hulonga ayo kwa chilalu, nimtumigwa wa Kilisito kuhuma ayo. Nie nisank'hana kuhuma ao, nifungigwa kudigeleza kuhuma ao, nitoigwa kuhuma ao, na nilawa muukauje kuhuma ao. 24 Nisapuligwa mala tano na Wayahudi milugwa selasini na tisa. 25 Nisapuligwa mala nt'hatu na Waloma, nitoigwa kwa maibwe mala imwe, nibwenekeligwa na ngalawa mala nt'hatu, na umo nichileza chilo na msanya. 26 Mzint'hambo zangu, nikala muink'hondo ya kukuluswa na mazi, nikala muink'hondo ya kubawiligwa na wabavi, na muink'hondo ya kutoigwa na Wayahudi wayangu na want'hu sio Wayahudi, nikala muink'hondo ya mmabululu, na muink'hondo za kumbago, nk'hondo za muibahali, nk'hondo kulawa kwa ndugu niwaonile gesa watogozi wayangu. 27 Nitenda sank'hano ndala na nicheleza mala nyingi, nikala bila ya kudya wala kung'wa na sikalile na mwenda wa kuigubika mui mp'heho. 28 Kufosa ayo yose, Chila siku nikala hugesa mapelela yose ya want'hu wamtogole Kilisito. 29 Ikawa hana mnt'hu yoyote abule nguvu, nanie vilavila nanione nibule nguvu. Mnt'hu yoyote akatendigwa atende zambi, nanie vilavila moyo wangu ukulumila. 30 Ikawa hulondeka niitunye, naniitunye kwa vint'hu vikunilagisa ivonili msoka. 31 Mulungu Tata wa Mndewa wetu Yesu, yeye akulongigwa atunyigwe siku zose, nae akumanya kuwa sikuhuna. 32 Ivonikalile kudibululu dya Damesiko, chilongozi akalile mtazi wa mwene Aleta, kakala kaika mwamizi muulwivi wa bululu ili anigwile. 33 Mbali nikammelenyuka kwa kugumigwa muint'hundu, kwakufosela toli kulu dikalile mkilwambaza.