1 Vino, chikwandusa kaidi kuitunya? Bule! Cheye sio gesa want'hu wamwenga wakuwagalila baluwa za kuwatenda wamanyike egu kulomba balua kulawa kumwenu ili zichitende chimanyike chilawa kumwenu. 2 Mweye nio balua yetu, iyandikigwe mmyoyo mmwetu, ivoelo want'hu wose wakulondigwa kusoma na kuimanya sank'hano ya Mulungu chiitendile kumwenu. 3 Imanyika kuwa mweye ni balua ya Kilisito aigalile kufosela cheye. Balua yenyewe haiyandikigwe kwa wino, mbali iyandikigwa kwa Muhe wa Mulungu eli mgima na haiyandikigwe mvibenzu va maibwe, mbali iyandikigwa mmyoyo ya want'hu. 4 Chikudaha kulonga ayo kwavila idyo nio lolelo dyetu chilinadyo kwa Mulungu kufosela yala achitendele Kilisito. 5 Hachikudaha kutenda chint'hu chochote kwa udahi wetu wenyewe, mbali udahi wose chili nao ukulawa kwa Mulungu. 6 Mulungu nio achidahize kuwa wasank'hani wa Lagano Dimpya, sio Lagano dya Lagilizo diandikigwe, mbali Lagano dya Muhe wa Mulungu. Kwavila Lagilizo diyandikigwe dikugala udanganiko, mbali Muhe wa Mulungu akugala ugima. 7 Lagilizo diikigwa kwa kuandikigwa mvibenzu va maibwe. Hata ivo uhelelo wake uwa udanganiko, utunyo wake uwa mkulu nk'hani hata wana wa Izilaeli hawadahile kukilola cheni cha Musa kwaajili ya ung'alo wake. Na mng'alo uo ukala wa chipindi chidodo. Ivo elo, ikawa usank'hani wa chila chigalile udanganiko chitendeka kwa utunyo mwingi gesa uo, 8 vino, usank'hani wa Muhe wa Mulungu si nauwe na utunyo mkulu kufosa uo? 9 Lelo ikawa sank'hano ila ikugala want'hu kulamuligwa ina utunyo, vino sank'hano ikutenda want'hu watogoligwe halongozi ha Mulungu si naiwe na utunyo mkulu kufosa iyo? 10 Elo utunyo wa Lagano Dimpya usola nyafasi ya ula utunyo wa Lagano dya umwaka ula ukulu wake waga kale. 11 Ikawa kila kikalile cha chipindi kidodo chikala na utunyo wake, ni kulagisa chila chikukalisa siku zose bila nk'homelezo nachiwe na utunyo mkulu nk'hani. 12 Kwavila china lolelo dino, chikulonga bila kuogoha. 13 Cheye hachikutenda gesa Musa ila kaisulutiza kukigubika cheni chake kwa chitambala ili want'hu wa Izilaeli waleke kuona kumala kwa ula mng'ao. 14 Mbali Shetani kawatenda Waizilaeli wasekuimanya mbuli iyo, nio mana hadi haluse wakawa wakusoma Malagilizo ya Musa wakupotigwa kuumanya ukweli, wakuwa gesa wagubikigwa na chitambala icho. Na ukweli uo ukumanyika kwa nzila ya kumtogola Kilisito. Iyo ikuwa gesa kuhalavigwa kwa chitambala icho. 15 Hadi dielo ino yakasomwa Malagilizo ya Musa umanyi wawe unk'hali ugubikwa na wakupotigwa kumanya ukweli. 16 Mbali mnt'hu akamtogola Mndewa Mulungu, Mndewa naamuhalavile chitambala icho. 17 Hano "Mndewa." Ni Muhe, na hala wili Muhe wa Mndewa aho habule kufungigwa. 18 Ivo, cheye chose wala vyeni vetu havigubikwe, chikuulagisa utunyo wa Mndewa gesa chilolo ivochikulagisa, chikubiduligwa chiwe gesa uo mulingano wake kulawa utunyo hadi utunyo mkulu. Iyo ni sank'hano ya Muhe wa Mndewa.