1 Elo naniitunye, ingawa haikufaya, mbali elo nanilonge yala maono na ugubulo nilagisigwe na Mndewa. 2 Hummanya mnt'hu imwe mtogozi wa kilisito, ambaye myaka kumi na minne ifosile kanyihuligwa hadi kuulanga wa katatu wa kuchanya nk'hani. Sikumanya ikawa kakala uko kwa mtufi egu kakala muinzonzi, mbali Mulungu nio akumanya. 3 Hubwelela kulonga, humanya ya kuwa mnt'hu ino, kunyihulwa hadi kuulanga kwa Mulungu. Mbali sikumanya ikawa kakala uko kwa mtufi egu kwa nzonzi, Mulungu nio akumanya. 4 Uko akahulika mbuli za kukangawaza nk'hani zikalile hazikudahika kulongigwa na mnt'hu, na habule mnt'hu akalile akulondigwa kuzilonga. 5 Elo, naniigode kwaajili ya mnt'hu gesa iyo, na si kwa ajili yangu mwenyewe, mbali kwa kuboha kwangu. 6 Hata nilondile kuigoda sigambeniwe muhenye hata kidogo, kwavila naniwe hulonga ukweli muhala. Mbali sekeniigode kulonda mnt'hu aniwazile zaidi ya vila akuniona na kuvihulika kulawa kumwangu. 7 Mbali kusudi mbuli zino nk'hulu nigubuliligwe zisekunitenda nikolwe na kuigoda, niink'higwa mahenyeko mumtufi gesa miwa, mgala nt'hume wa Shetani kanitoa, nisekuigoda kufoseleza. 8 Nimulomba nk'hani Mndewa mala nt'hatu anihonye kulawa mmahenyeko ayo yanilawile. 9 Mbali kanilongela, "Wende wangu ukukufaya, kwavila muukuboha kwako umo nio udahi wangu ukuoneka." Elo ni lazi kabisa kuigodela kuboha kwangu ili udahi wake Kilisito ukale mgati kumwangu. 10 Ivoelo, hudenk'helela muukuboha kwangu, kudukanwa mmahenyeko na magayo na kugazigwa, kwa ajili ya Kilsito, kwavila nikaboha, aho nio huwa na nguvu.

11 Niwa gesa mhenye, mbali mweye mnisulutiza niwe ivo. Mweye nio mkulondigwa kunitunya. Kwavila ingawa nie si chint'hu, kwa vyovyote vila nie si mdodo kuhuma ao "watumigwa wakulu." 12 Ivoniwile kumwenu, nikala mfinyilizi na kutenda uzonza. Uzonza ukulagisa kuwa nie ni mtumigwa. 13 Vino, muhungukilwa mbwani nk'hani kuhuma wanthu wamwenga wantogole Kilisto? Kwavila nie kwa ubazi wangu sikuwagazeni kupata utazi wenu. Ikawa uo nio uhasanyi wangu hulomba mnilekele. 14 Lelo, huisasala kwiza kumwenu mala ya nt'hatu, na sekeniwagaze. Kwavila ichohulonda sio vinthu venu, mbali nie huwalonda mweye wenyewe. Welesi wazoela kuwaikila wanawe ngama, na si wana kuwaikila ngama welesi wawe. 15 Nie nitogola kutumia vint'hu nili navo, na hata kuilava nie mwenyewe, kwa kuwataza mweye. Elo ikuoneka kuwa nie ivohuiyoha kuwabweda, mweye nivo mkuhunguza kunibweda. 16 Elo, namtogole kuwa siwasigamile kwa chint'hu chochote. Mbali mnt'hu imwenga naalonge, "Kwavila Paulo ni mbala, kawasongeza kwa kuwahunila." 17 Vino, nie niwahi kuhuna na kuwanyonyeni kwa nzila ya mnt'hu nimtumile kumwenu? 18 Nie nimulomba Tito, nikamtuma kumwenu na ndugu yetu imwenga. Vino, Tito kawahi kuwanyonyeni chint'hu chochote kumwenu? Vino, hammanyile kuwa cheye chikala chikulongozwa na muhe imwe muusank'hani na hata ugenzi wetu ni umwe. 19 Mkudaha kugesa kuwa hadi haluse chikuiyalala wenyewe halongozi henu, mbali, chikulonga mbuli zino halongozi ha Mulungu, chikawa chiiyunga na Kilisito. Mbuli zino zose, wabwedwa wangu, chikuwalongela kwaajili ya kuwagangamaza muutogozi wenu kwa Kilisto. 20 Huogoha nikeza kumwenu hudaha kuwafika muvila sikuvilonda, na nie nainitende kuwa mui hali hamkuibweda. Huogoha, ikudaha kuwa kukawa na ndwagi, miongo, uhasama, ubishi, kuigoda na timbwilitimbwili mgati yenu. 21 Huogoha aho nikeza kumwenu nt'hambo ikwiza, Mulungu naanitende niingile chinyala halongozi henu. Na nie naniwalilile wengi wala watendile zambi, mbali hawalondile kuzileka zambi zawe, mbali wakugendelela kutenda mbuli zihile, uhank'hu na ugoni wautendile.