1 Ino naiwe nt'hambo yangu ya katatu kwiza kumwenu. Iyandikigwa Mmaandiko ya Mulungu, "Chila mbuli nailamuligwe kwa want'hu waidi egu wa tatu waonile na kuhulika mbuli iyo." 2 Nilonga kale ivonikalile muint'hambo yangu ya kaidi, haluse hubwelela kaidi nikawa kutali, kuwa nikeza kaidi wala wose watendile uhasanyi na wala wamwenga, sekeniwaonele ubazi. 3 Mweye namuiyonele wenyewewe kuwa Kilisito akulonga kwa kufosela nie. Kumwenu Kilisito sio abule nguvu, mbali nguvu yake ikutenda sank'hano hagati yenu. 4 Kilisito kawambigwa mumsala kwavila abule nguvu, mbali haluse nimgima kwa nguvu za Mulungu. Ivoivo nacheye kuiyunga na yeye chikuwa chibule nguvu, mbali nachiwe nae kwa udahi wa Mulungu kwaajili ya kuwasank'hanila mweye. 5 Ipelembeni mweye wenyewe, mpate kumanya kuwa kweli mkutogola. Ipelembeni mweye wenyewe. Vino, hamkumanya kuwa Kilisito Yesu aumo mgati mmwenu? Kama sio, elo mweye muhumwa. 6 Mbali hulolela kuwa mweye mkumanya kuwa cheye hachipotigwe na mbuli iyo. 7 Chikumulomba Mulungu msekutenda ubananzi wowote, mbali si kulonda chioneke gesa want'hu chihumile kale, mbali mdahe kutenda yala yadamane, hata kama cheye nachioneke chipotigwa. 8 Cheye hachikudaha kutenda chint'hu chochote kuulema ukweli, mbali chint'hu chikukidaha kutenda ni kuutenda ukweli umanyike. 9 Chikudenk'helela kuwa chikuoneka gesa chiboha, mbali mweye mkuoneka hambohile. Ivoelo, cheye chikumulomba Mulungu mdahe kuwa wagangamavu muukutogola kwenu. 10 Ivolelo, huwaandikila baluwa ino nikawa kutali, ili nikafika kumwenu nisekuwa mkali kwa kutumia ula udahi anink'hile Mndewa. Mndewa kanink'ha udahi wa kuwataza muutogozi wenu na sio kuwabomola.

11 Elo, ndugu zangu mkale goya. Muwe na ugangamavu, tozeni yala niwalongeleni, muwe mkugesa mbuli imwe, kaleni kwa utindiwalo. Nae Mulungu wa ubwedo na utindiwalo naawe hamwenga na mweye.

12 Ilamseni kwa ubwedo wa Kilisito. 13 Want'hu wose wa Mulungu wakuwalamseni. 14 Huwalombela wende wa Mndewa wetu Yesu Kilisito na ubwedo wa Mulungu na kuiyunga na Muhe wa Mulungu, uwe na mweye wose.