Pawuli wuzitisa Nzambi
3 Nzitusu ku Nzambi, Yandi wudi Tata di Mfumu eto Yesu-Klisto, Tata difulukidi mu nkenda na Nzambi yikwe syamisanga bantu ntangu zimvimba! 4 Wukwe tusyamisanga mu mpasi zeto zimvimba, mwanki yeto mpe tusyamisa yobobo baa mu mpasi zi mumpila-mumpila mu nsyamusu yi tukwe tambulanga yeto bende ku Nzambi . 5 Bonso bu tuna yenina mpasi zizingi mu kintwadi kyeto na Klisto, ni bwabobo mpe tuna syamusu bubwingi mu Klisto. 6 Ni mu dyambu dye lusyamisa na mu lutabila, tuna kwe yenini mpasi. Tala ti tusyamusu, mwanki lubaka mbombolo, yaaluhaana ngolo mu vibidila mpasi zimosi na zo zi tuna vibidila yeto mpe. 7 Ni hahoho, kivuvu kyeto mu yeno kisyama kidi, tuzebi ti bu ludi kintwadi mu mpasi zeto, yeno mpe ludi kintwadi mu nsyamusu eto.
8 Mpangi zeto, tutiidi luzaba mfyetokoso zizingi zi tuyena ku kizunga ki Aziya. Mfyetokoso bezozo zihyoka kitezo na ngolo zeto. Zizimbisa kivuvu kyeto na tubanza ti twaabwesa ba bamoyo ko. 9 Kansi ku nsye mitima myeto, tuyena ti tufwidi na tusa dyaka kivuvu mu yeto bende ko, kansi mu Nzambi kwe fulukisanga bafwa. 10 Yandi wutukuula mu lufwa lubobo, waatukuula dyaka. Ninga, tudi na kivuvu mu yandi ti waatukuula dyaka mu lufwa.