1 Yiyi ni nkumbu yitatu naakwiza ku yeno. Bonso bu wudi wusonama ti: «Kadi musamu waabaka nzengolo mu kimbangi ki bantu bole hoti batatu.*» 2 Wanateka luteela mu nzyetolo ani yinzole, mpe nina vutukila wo dyaka. Bu nakidi kitatu neeno, ntiidi mu zonza ku bantu bebobo bateka hola masumu na ku bantu bamvimba ti: bu naakwiza dyaka, naafwila kani muntu kyadi ko. 3 Yeno luna sosa kidimbu kina lonka ti Klisto kwe zonzanga mu meno. Mu dyambu ti, kaa wulebakana ku yeno ko, kansi kwe lonkisanga lulendo lwandi ha kati dyeno! 4 Ninga, Klisto bamukoma ha kulunsi mu lebakani dyandi, kansi wumoyo kadi mu lulendo lu Nzambi. Mu kintwadi nandi, yeto mpe balebakana tudi mu yandi, kansi twaazinga ha kimosi nandi mu dyambu dyeno, mu lulendo belolo kwandi lu Nzambi.

5 Kifyongonineeno yebende mu zaba tala ti bakwikama ludi mu kiminu, tomeeno kitala yebende. Yeno luna zaba ko ti Yesu-Klisto wuu mu kati dyeno e? Buna lumana bwa kweno ha ntadisi yi ntontolo. 6 Kansi kivuvu kii naani ti, yeno waluzebi ti yeto tubwa ha ntadisi yi ntontolo ko. 7 Tuna sambila Nzambi, mwanki lulembolo hidika misamu mimbi. Ka mu lonka ku bantu nungunu eto mu ntontolo ko, kansi mwanki yeno luhidika misamu mimbote, mpe yeto tuyenika bonso bantu babwa mu ntontolo. 8 Mu dyambu ti, tuu na lulendo lwe nwanisa kikedika ko, kansi lulendo luu neto mu sadila kaka kikedika. 9 Tuna kiyangidika ntangu zimvimba bu tudi balebakana, kansi yeno ngolo ludi. Mpe lusambulu lweto ludi ti yeno luba bantu balunga. 10 Ni hahoho nina sonikina bobo bu nii kitatu neeno, mwanki bu naaba neeno, nalembolo ba na nkasu, bonso buu lulendo lu mpaana Mfumu mu tunga, kansi ka mu mwangisa dibundu ko.

11 Zimpangi, mu manisa, yangalaleeno, beeno bantu balunga, syamasanangeeno yeno na yeno, wawasanangeeno, zingangeeno mu kiyenge. Mpe Nzambi yi luzolo na yi kiyenge yaaba neeno!

12 Haanasanangeeno zimbote yeno na yeno bonso zimpangi zivwihulu ku Nzambi. Bantu bamvimba bavwihulu ku Nzambi mbote bana luhaana.

13 Bika lusakumunu lu Mfumu Yesu-Klisto, luzolo lu Nzambi, na kintwadi ki Mpeve Yilongo biba na yeno bamvimba!