1 Aa! Tala ti lulenda vibidila mwa ndambu yi bulahuki bwani! Ninga, mvibidileeno. 2 Meno kimbanda kii naani mu yeno, kyokyo kifumini ku Nzambi. Mu dyambu ti, naluhaana nsilulu yi makwela ku bakala dimosi kaka, mu lulonka ku Klisto bonso ndumba yivedila yilembolo zaba bakala. 3 Kansi bunkuta bu naani ti madyela meno bakitula mo mambi, mpe maluzimbisa nzila yi luzolo na yi mvedosolo mu Klisto, bonso Eva wuhunuka ku nyoka mu madyela mandi ma luvunu.*. 4 Mu dyambu ti, lukwe toma vibidilanga muntu wuntete wizidi mu lulonga Yesu diswaswana na Yesu di tululonga, hoti luna tambula Mpeve yiswaswana na yo yi lutambula, hoti lutambudi Musamu Wumbote wuswaswana na wo wulutambula.

5 Meno mbanzidi ti nii kani wufyoti ko ha meso ma zintumwa zikwe kibanzilanga ti yawu bavudidi bunene. 6 Wukedika ti nii na ludede lwe zonzila bumbote ko, kansi nzayilu zii naani, mpe watutomini lulonka mu nzila zimvimba na mu misamu mimvimba.

7 Bwedi disumu nasidi bu nalusamunini Musamu Wumbote wu Nzambi wumpamba, bu nakikuludi mwanki baluzangula e? 8 Natambula mbongo zi Mabundu mahiika bonso mufutu ku yawu mu sala ha kati dyeno. 9 Mu ntangu yi naba ku yeno, nalomba nakani kima ku muntu ko, bu naba mu mbindumunu, mu dyambu ti zimpangi zifuma ku kizunga ki Masedwani, zintwadila bima biba naani mfunu. Mu mimvimba, natoma kikeba mu lembolo ba kizitu kuu yeno, mpe nina tatamana mu kikeba. 10 Mu kikedika ki Klisto kii mu meno, nina ta ti: kunaani muntu waankakidila mu zonzila musamu bewowo we kiyangidika mu kizunga kimvimba ki Akayi. 11 Mu dyambu di nki e? Mu dyambu ti nilutiidi ko e? Nzambi zebi ti nilutiidi.

12 Kansi, nina tatamana mu sa misamu mi nakwe sanga, mu lembolo haana hwahwa ku yobobo bana sosa mu ba kidede neeto, mu misamu mi bana kwe kiyangidiki. 13 Mu dyambu ti, bantu bebobo zintumwa zi luvunu zidi, bisadi bi lembolo ba na makedika bikwe kitukanga zintumwa zi Klisto. 14 Mpe dii dyambu dye yituku ko, mu dyambu ti Satana yandi bende kwe kitukanga mbazi yi kukya. 15 Buna, dii dyambu dye yituku ko ti bisadi bebyobyo mpe bikituka bisadi bi lunungu. Nsukunu awu yaafwanakana na mavanga mawu.

16 Nina vutukila mu ta ti: nakani muntu kambongilandi bonso kilahuki ko. Ntambuleeno bwabu bonso muntu wulahukidi, mwanki meno mpe na kiyangidika mwa ndambu. 17 Dyambu di nina ta, nina dye teela bonso butiidi Mfumu ko, kansi bonso kilahuki, mpe nii na kivuvu ti, nina baka nzila mu kiyangidika. 18 Budidi ti bantu babingi bana kwe kiyangidikingi mu misamu mi kimuntu, meno mpe naakiyangidika. 19 Mu dyambu ti, yeno ludi bantu bandwenga, luna vibidila bantu baa bilahuki. 20 Luna vibidila ti balukitula mindongo, balubonga bimvwama byeno, bavwamina mu nitu zeno, balusila munwa, na baluzuba ku kiini. 21 Nsoni nina yena mu ta wo: tubedi batoma lebakana mu musamu bewowo.

Kansi, mimvimba mina sosa muntu mu sa - nina zonzila bonso muntu wulahukidi- meno mpe mya nina sosa mu sa! 22 Ba-Ebeleo badi e? Meno mpe mu-Ebeleo nidi. Ba-Isaeli e? Meno mpe mu-Isaeli nidi. Mu nkuna yi Abalahami badi e? Meno mpe mu nkuna yi Abalahami nidi. 23 Bisadi bi Klisto bidi e? —Nina zonzila bonso muntu wulahukidi— Meno nabavudidi! Nabahyokidi mu sala bisalu bingolo, natuulu mu boloko nkumbu zizingi, bankata bubwingi, mpe nabwabana nsisi zizingi zi lufwa. 24 Nkumbu zitanu Bayudayo banzuba lutangu maku matatu na vwa lu bikoti, 25 nkumbu tatu bankata bikoti, nkumbu yimosi bawinda matadi, nkumbu tatu naba mu kati di masuwa madyama, nahyokisa kilumbu kimosi na mpimpa yimosi mu kati di mubu. 26 Mu nzyetolo zani zizingi, naba mu nsisi mu zinzadi, mu nsisi ha ntadisi yi binkita, mu nsisi ha ntadisi yi zimpangi zani batudi nsi yimosi, mu nsisi ha ntadisi yi balembolo ba Bayudayo, mu nsisi mu zimbanza, mu nsisi mu zinsi zinkatu, mu nsisi mu mubu, mu nsisi ha ntadisi yi zimpangi zimbi. 27 Nayena mpasi zi bisalu bingolo na nahonga, ntangu zizingi nabwa tolo ko, nafwa nsatu, nabaka mpwila yi mamba, namina nsoki, nakwamusu mu kyozi, mpe naba na binkutu ko. 28 Nina zonzila misamu misidi ko, kadi kilumbu nina kwamusu mu kizitu ki mayindu ma Mabundu mamvimba. 29 Nani wuu wulebakana wa sa ti meno nalembolo lebakana e? Nani wubwa mu masumu wa sa ti meno nalembolo yena mpasi ku nsye mutima e?

30 Tala ti ndendi kiyangidika, naakiyangidika mu lebakani dyani! 31 Nzambi wudi Tata di Mfumu Yesu, mpe wudi wusakumunu mimvu ka mimvu, zebi ti nina huna ko. 32 Bu naba ku mbanza yi Damasi, munyaadi wu ntinu Aletasi, wutuula minkengi ha myelo mi mbanza yi Damasi mu nkanga. 33 Kansi bandukisila ha nela ni bankulumunina mu kitunga ku mbazi yi kibaka. Bwabobo navuukila.*