1 Nzambi wutuhaana kisalu bekiki mu nkenda zandi, ni hahoho, yeto tulendi lebakana ko. 2 Yeto tubisa misamu minsoni hoti mi mansweki, tukwe sadilanga luvunu ko, na tukwe sanzanga Mambu ma Nzambi ko. Kansi, bu tukwe zabikisanga kikedika ha meso ma bantu, ni bwabobo, tukwe haaninanga nzila ku kadi muntu katala ndyatulu eto ha ntadisi yi Nzambi. 3 Tala ti Musamu Wumbote wu tukwe samunanga, wufuku wudi ku nsye kitambala, buna wudi wufuku ku bantu bazimbala, 4 bakwe lembolo kwikilanga mu dyambu ti, Satana, nzambi yi nza beyiyi, wufuka madyela mawu. Kwe bakakidilanga mu yena kya kukwe haananga Musamu Wumbote wu nkembo yi Klisto, wudi kifwani ki Nzambi. 5 Mu dyambu ti mu ndongosolo eto, ka yeto bende ko tuna kwe samuni, kansi ni Yesu-Klisto wudi Mfumu, mpe tweka bisadi byeno mu dyambu di Yesu. 6 Mu dyambu ti, Nzambi beyoyo yita ti: «Kya kwaalezima ha kati di kitombe!» Yandi mpe wusa ti kya kwandi kulezima mu mitima myeto, mwanki katuhaana nzayulu yi nkembo yi Nzambi yina lezima mu kiini ki Klisto.

7 Kansi tuna kwe nati kimvwama bekyokyo ki kimpeve mu kati dyeto, bonso bisiku bi tubumba, mwanki buyenika ha meso ma bantu ti, lulendo belolo lungitukulu lufuma ku Nzambi, kansi ka ku yeto ko. 8 Bana tukwamisa mu ndambu ka ndambu, kansi bana tubedisa ko. Tuu na mayindu yeku-yeku, kansi tuzimbisi kivuvu ko. 9 Bana tufyetikisa, kansi Nzambi kana tunyafuna ko. Bana tulosa ha nsi, kansi tuna zimbala ko. 10 Tuna tatamana mu kwe nati mu nitu eto lufwa lu Yesu, mwanki luzingu lwandi luyenika mpe mu nitu eto. 11 Mu dyambu ti bamoyo tudi, kansi ntangu zimvimba tuna yekolo ku lufwa mu dyambu di Yesu, mwanki luzingu lu Yesu luyenika mpe mu nitu eto yikwe fwanga. 12 Ni hahoho, lufwa luna sala mu yeto, mwanki luzingu lusala mu yeno.

13 Masonama mana ta ti: «Nakwikidi, ni hahoho nazonzidi.» Yeto mpe mu Mpeve yimosi yi kiminu, tuna kwikila, na ni hahoho tuna zonzila. 14 Tutomini zaba ti Nzambi wufulukisa Mfumu Yesu mu bafwa, waatufulukisa yeto mpe mu bafwa mu kintwadi na Yesu, na waatuyenikisa ha kimosi neeno ha ntadisi andi. 15 Mu dyambu di bumbote bweno misamu mimvimba bemimi mitutudidi, mwanki mulemvo bu wuna funana, bantu babingi bavutula matondo, mu nkembo wu Nzambi.

16 Ni hahoho tuna lembolo lebakana. Kati ti nitu eto yi nsuni yina kwe bebi, mpeve yina kwe kituki yimoona kadi kilumbu. 17 Mpasi zi tuna yena zina hyoka na zifyoti kwandi zidi, kansi zina tubutila nkembo wuwunene, wumimvu ka mimvu, wuhyokidi kitezo. 18 Mu dyambu ti, tuna tala bima bikwe yenikanga ko, kansi byo bikwe lembolo yenikanga. Bima bikwe yenikanga, bikwe zingilanga ko, kansi byo bikwe lembolo yenikanga bikwe zingilanga mimvu ka mimvu.