1 Tutomini zaba ti, nzo eto yii ha butoto yi kikapu yidi. Tala ti yimwangani, tufweti zaba ti Nzambi wutukubikila ku mazulu, nzo yi balembolo tunga mu moko ma bantu, yaazingila mimvu ka mimvu. 2 Mpe tuna kunga bwabu, mu dyambu ti tuu na nsatu yiyingi mu lwata nzo eto yii ku mazulu. 3 Tala ti tumeni lwata nitu beyoyo, Nzambi kaatuyena dyaka mpene ko. 4 Mu dyambu ti, yeto tudi mu nzo beyiyi yi kikapu, tuna kunga, tuna kwamusu, ka mu dyambu ti tutiidi mu katula binkutu ko, kansi tutiidi mu lwata byo, mwanki luzingu kamina byo bikwe fwanga. 5 Ni Nzambi Yandi bende wutukubikidi mu luzingu belulu, wutuhaana Mpeve Yilongo, ni kikunku kintete mu bimvwama bi katukubikila.

6 Ni hahoho, tudi na kibakala kikingi ntangu zimvimba! Tuzebi ti bu twakidi mu nitu beyiyi, tudi ku nsi yi bunzenza, mpe kitatu na Mfumu. 7 Mu dyambu ti, tuna kwe dyatidi mu mona meso ko, kansi mu kiminu. 8 Ntangu zimvimba tudi balwatu mu kibakala kikingi, mpe tutiidi mu sisa nitu beyiyi mu kwe zinga kintwadi na Mfumu. 9 Ni hahoho, ni tuzinga mu nitu beyiyi hoti ni tusisa yo, dyambu divudi mfunu ni mu yangidika Mfumu. 10 Mu dyambu ti bamvimba tuna ba ha ntadisi yi Klisto mwanki katufundisa, mpe kadi muntu kaatambula mufutu mu myo mi kasadidi mimbote hoti mimbi.

11 Ni hahoho, yeto tuzebi bwedi bwe vuminina Mfumu na tuna sosa bwabu mu sa ti bantu bakwikila. Nzambi yandi bende wutuzebi, mpe nii na kivuvu ti mu mabanza meeno, yeno mpe lutuzebi. 12 Yeto tuna kilonka dyaka yeto bende kuu yeno ko, kansi tutiidi mu luhaana hwahwa dye kiyangidika mu dyambu dyeto, mwanki lulenda mu vutula mvutu ku bantu bana kiyangidika mu myo mikwe yenikanga, kansi ka mu myo mii ku nsye mutima ko. 13 Tala ti tubedi bilahuki, ni mu dyambu di Nzambi, tala ti tudi bantu ba mayindu ma sikama, ni mu dyambu dyeno. 14 Mu dyambu ti, luzolo lu Klisto lutulweti yeto, yeto tudi na kiminu ti wumosi kwandi wufwa mu dyambu di bantu bamvimba, mwanki bamvimba bafwa kintwadi nandi. 15 Tala ti wufwa mu dyambu di bantu bamvimba, mwanki bantu bana zinga balembolo bwesa zinga mu dyambu di yawu bende, kansi mu dyambu di Yondowo wufwa na wufuluka mu bafwa mu dyambu dyawu.

16 Ni hahoho, tuna bongila dyaka muntu mu nsuni ko. Kati mu ntangu yi ntama tubongila Klisto mu nsuni, kansi bwabu tuna bwesa mu bongila bo ko. 17 Ni hahoho, tala ti muntu wudi mu Klisto, yandi weka muntu wumoona, misamu mi nkulu mihyoka, misamu mimoona mihingani. 18 Mpe, mimvimba bemyomyo mikwe fumanga ku Nzambi wutuwawisa nandi mu Klisto, mpe wutuhaana kiyeko kye wawisa bahiika na Nzambi. 19 Mu dyambu ti, mu Klisto, Nzambi wusala mu wawisa nza na Yandi bende, wulembolo tala masumu ma bantu. Mpe wutusoola mu samuna kisalu ki nyuwasani.

20 Yeto tudi bimonikisi bitambika Klisto, bonso ti Nzambi mu nzila eto wuna tumisa bantu. Tulubombididi mu nkumbu yi Yesu, bika luwawasana na Nzambi! 21 Mu dyambu ti, Klisto kasumuka ko, kansi Nzambi wumutwika masumu meto, mwanki mu kintwadi nandi, batusa bantu balunungu ha ntadisi yi Nzambi.