1 Mpangi zani zizola, mu dyambu ti nsilulu zi bobobo zii neto, tukivediseeno mu mimvimba milendi safula nitu eto na mpeve eto, mpe tutatamaneeno mu bulongo natee ku nsukunu, mu bunkuta bu Nzambi.

2 Tuzibudileeno mi mitima myeno! Yeto tuhidikidi misamu mimbi ku muntu ko, tumanisi bimvwama bi muntu ko, tulebidi bima bi muntu ko. 3 Ka mu dyambu dye lufundisa ko nina zonzila bobo, mu dyambu ti wana teka luteela: yeno ludi mu mitima myeto mu lufwa na mu luzingu. 4 Kivuvu kikingi kii naani mu yeno, mpe nina toma kiyangidika mu yeno. Wutoma syamusu nidi na kyese kyani kina sampa mu mpasi zeto zimvimba.

5 Mu dyambu ti, twabeki ntangu ye huma ko buna bu tutudidi ku kizunga ki Masedwani. Kansi tuyena mpasi zimumpila-mumpila: mvita ku mbazi na bunkuta ku nsye mitima. 6 Kansi Nzambi yikwe syamisanga bantu baa mu kati di lebakani, wutusyamisi mu nyizulu yi Tito, 7 ka nyizulu andi kaka ko yi tusyamisi, kansi mu nsyamusunu mpe yi katambula ku yeno. Wutuyadila mpolo bwedi ludidi na mpwila yiyingi mu nyena, manswela meno na vema kweno mu meeno. Mimvimba bemyomyo misidi ti kyese kyani kiba kikingi.

8 Ni hahoho, tala ti mukanda ani wuluyenisi kyadi, meno wunyongisi ko. Tala ti wunyongisi, mu dyambu nayeni ti mukanda* bewuwu, wuluyenisi kyadi mwa ntangu yifyoti. 9 Kansi nina kiyangidika bwabu, ka mu dyambu di kyadi kyeno ko, kansi kyadi kyeno kisidi ti luvilula madyela. Mu dyambu ti kyadi ki luyeni kikitukidi kyese ha meso ma Nzambi. Ni mu ta ti, yeto tuluhidikidi misamu mimbi ko. 10 Mu dyambu ti, kyadi kikwe fumanga ku Nzambi, kikwe sanga ti muntu kavilula madyela makwe natanga ku mpulusu, wulembolo sa manyongo. Kansi kyadi kikwe fumanga mu nsatu zi nza, kikwe natanga ku lufwa. 11 Taleeno nkye ndandu kyadi bekyokyo, kikwe fumanga ku Nzambi, kibuta mu yeno: nkye manzaki, nkye ndombolo mulemvo, nkye mbisulu yi misamu mimbi, nkye bunkuta, nkye mpwila mu nyena dyaka, nkye vema, nkye manzaki mu semba mambi! Lutomini lonka ti mu mimvimba, luu na kibila mu musamu bewowo ko.

12 Tala ti nalusonikini bwabu, ka mu dyambu di muntu wuhidikidi misamu mimbi ko, hoti mu dyambu di yondowo wu bahidikidi misamu mimbi, kansi mu lonka ha ntadisi eno vema kweno mu yeto, mwanki kuyenika ha ntadisi yi Nzambi. 13 Musamu wawowo wu tusyamisi.

Kansi tutambula kaka nsyamusunu ko, tutoma kiyangidika dyaka bubwingi mu yena kyese ki Tito mu dyambu ti yeno bamvimba lumubwisidi mutima. 14 Tala ti nakiyangidika mu yeno ha ntadisi andi, lunyenisi nsoni ko! Kansi bumosi mpe bu tukwe luteelanga kadi ntangu kikedika, bumosi mpe masiika ma tusidi mu yeno ha ntadisi yi Tito mayenikini makedika. 15 Ni hahoho, luzolo lwandi mu yeno luvudidi bunene, bu kakwe bambukanga moyo bwedi lumutumimini yeno bamvimba na bwedi lumubwanini mu kintekoto na bunkuta. 16 Nina kiyangidika, mu dyambu ti nsiidi kivuvu mu yeno mu mimvimba.