1 Meno Pawuli nina lulomba mu malembe na mu bumbote bu Klisto, meno wu bakwe tanga ti, muntu wukuluka ti nii ha kati dyeno, kansi muntu wukibakala ti nii kitatu neeno. 2 Nina lubombidila, mu ntangu yi naakwiza ku yeno, lunsindisilandi mu zonzila mu kibakala bu naaba ha kati dyeno, mu dyambu ti mu kibakala naazonzila ku bantu bebobo bana banzila ti yeto mu kimuntu tuna kwe dyatidi. 3 Wukedika ti, bantu tudi, kansi tuna nwanina mu kimuntu ko. 4 Mu dyambu ti bilwazu bi tuna kwe sadidi mu nwana bii bilwazu bi kimuntu ko, kansi lulendo lwawu lukwe fumanga ku Nzambi. Bilwazu byo bikwe tusadisanga mu bedisa mabanza mambi 5 na bimvimba bikwe tediminanga mu mayama nzayilu yi Nzambi. Mpe tukwe tulanga mu boloko mabanza mamvimba mambi, mwanki matumimina Klisto. 6 Bakubama tudi mu semba bamvimba bakwe lembolo mye tumiminanga, mu ntangu yi twaayena ti luna toma tumimina mimvimba.

7 Fyongonineeno bonso buu misamu! Tala ti muntu kwikidi ti vwihulu ku Klisto, bika kafyongonina dyaka ebu: tala ti vwihulu ku Klisto, yeto mpe! 8 Naayena nsoni ko, kati nina kiyangidika mu lulendo lutuhaana Mfumu, lulendo luna tuhaana luve mu tunga dibundu dyeno, kansi ka mu mwangisa dyo ko. 9 Mu mikanda myani, nina sosa mu luhaana bunkuta ko. 10 Mu dyambu ti, bana kwe tengi ti: «Mikanda mi Pawuli ngolo na nkasu midi, kansi bu kakwe banga neto kintwadi, muntu wulebakana kadi na mi kakwe zonzanga mii mfunu ko.» 11 Bika yondowo kwe zonzilanga bobo katoma we zaba ti: bu tuu kitatu neeno, bonso bu tudi mu mpova zeto mu mikanda myeto, bwabobo mpe bwaaba mavanga meto bu twaaba neeno kintwadi.

12 Tuna sosa ko ti tudedakana hoti tufwanakana na bahiika bakwe kiyenikisanga yawu bende. Bakwe kibongilanga yawu bende bonso kitezo mu kifwanikisa na bahiika, baa na madyela ko. 13 Mu yeto, tutiidi mu kiyangidika kuhyoka kitezo kifwanakani ko, kansi mbo tusadila bo mu kitezo ki kisalu ki tukubikila Nzambi, mu tuhaana hwahwa dye tula natee kuu yeno. 14 Tuna hyoka ndilu eto ko, bonso ti yeto tutula natee kuu yeno ko, mu dyambu ti tutula natee kuu yeno mu lunatina Musamu Wumbote wu Klisto. 15 Buna tuna kiyangidika ko mu bisalu bi bantu bahiika baa ku mbazi yi ndilu eto. Kansi, tala ti kiminu kyeno kina kula, tuu na kivuvu mu yena ti kisalu kyeto kina kula ha kati dyeno, mu ndilu yi kisalu kyeto. 16 Buna tulendi mwangisa Musamu Wumbote mu bizunga bii kitatu neeno, wulembolo ku kiyangidika mu kisalu kisiidi bantu bahiika mu ndilu yi kisalu kyawu.

17 Wusonama ti: «Muntu tiidi mu kiyangidika, ka kiyangidika mu Mfumu.*» 18 Mu dyambu ti ka muntu bewowo kwe kiyenikisanga yandi bende ko bakwe yangidikanga, kansi ni muntu bewowo Mfumu wu kakwe siikanga.