1 Bufwanakani ko ti, meno nalusonikina, mu dyambu di lusadusu lwe haana ku bantu bavwihulu ku Nzambi, ku kizunga ki Yuda. 2 Mu dyambu ti nzebi luzolo lweno lumbote, mpe na yangaladi mu dyambu dyeno ku bisi-Masedwani, bu nata ti: «Mpangi zi kizunga ki Akayi, zikubama zidi mu haana tuuka mvula yi hyokidi.» Mpe vema kweno kutukisi vema ku bantu babingi ha kati dyawu. 3 Buna nina lutambika zimpangi, mwanki masiika matusidi mu yeno malembolo ba ma mpamba, mpe mwanki luba bakubama, bonso bu nateedi. 4 Tala ti bisi-Masedwani bizidi ha kimosi naani, mpe bizi lubwana balembolo kubama, zaaba nsoni kuu yeto mu musamu bewuwu wumvimba. Ku yeno mpe zaaba nsoni. 5 Ni hahoho, nayenini ti musamu wumbote mu syamisa zimpangi zintekidila ku yeno tekila meno niiza, mu kubika minkayulu mi luhaanina nsilulu. Myaaba mikubama bonso lusakumunu lu makedika, kansi ka bonso dyambu dye kwikisa ko.

6 Zaabeeno ti: muntu wuna kuna mwa ndambu, mwa ndambu mpe kaayonzika, na muntu wuna kuna bubwingi, bubwingi mpe kaayonzika. 7 Bika kadi muntu kahaana bonso bukakeni mu mutima andi, wulembolo sa manyongo, na wulembolo kwikisa, mu dyambu ti Nzambi kwe tyanga muntu kwe haananga mu kyese. 8 Mpe Nzambi wuu na lulendo mu lufulusa mu lusakumunu lu mumpila-mumpila, mwanki mu ntangu zimvimba na mu mimvimba, lubaka bimvimba bii neeno nsatu. Mpe lubwesa baka bibingi bihyokidi mu bisalu bimbote bimumpila-mumpila. 9 Bonso bu wudi wusonama ti:

«Kwe haananga mu luzolo ku miwelo,

bumbote bwandi buu na nsukunu ko.»

10 Nzambi kwe haananga nswanga ku kikuni, na dimpa bonso bindya, waaluhaana na waafunisa nswanga yii neeno nsatu, mwanki bumbote bweno bubuta mimbutu mimingi. 11 Waalukitula zimvwama zizinene mu mimvimba, mwanki lulonka kadi ntangu luzolo lweno lwe kabula. Buna bantu babingi baatonda Nzambi mu minkayulu mi twaabahaana mu nkumbu eno. 12 Mu dyambu ti, kisalu bekyokyo kye haana minkayulu, kikwe yukutisanga kaka zinsatu zi bantu bavwihulu ku Nzambi ko, kansi zikwe tukisanga dyaka zinsambulu zizingi zi mvutululu yi matondo kuu Nzambi. 13 Bantu bu baayena mfunu yi kisalu bekyokyo, baakembila Nzambi: mu dyambu di lutumumu lu luna lonka mu Musamu Wumbote wu Klisto na mu luzolo lweno lwe kabula ha kimosi nawu, mpe na bantu bamvimba. 14 Baalusambidila, mu lulonka luzolo lwawu, mu dyambu ti Nzambi wuheeni mulemvo wuhyokidi kitezo. 15 Tutondeeno Nzambi mu bumbote bwandi bungitukulu!