1 Bwabu mfweti kiyangidika! Mpeleko buu mfunu ko, kansi mfweti luteela bwabu misamu mi nayena mu mbweno na Mfumu mi kanzabikisa mu Mpeve. 2 Nazebi muntu wumosi mu Klisto, zeka mvula kumi na ziya zihyoka, tuka bu bamunata natee ku mazulu mahyokidi ku zangama. (Nazebi ko hoti mu nitu andi, hoti ku mbazi yi nitu andi, kansi Nzambi zebi wo.) 3 Mpe nazebi ti muntu bewowo - tala ti mu nitu andi hoti ku mbazi yi nitu andi, nazebi ko, kansi Nzambi zebi wo - 4 Nzambi wumutombola natee ku paladiso na wuyuwa mpova muntu zi kalendi lembolo bangula, mpe zilembolo haanunu luve ku muntu mu zonzila. 5 Naakiyangidika mu muntu wu bobobo, kansi mu mebende naakiyangidika ko, tala ti ka mu lebakani dyani ko. 6 Tala ti natya mu kiyangidika, nganunu naaba kilahuki ko, mu dyambu ti kikedika kwandi naaketi ta. Kansi nasa bo ko, mwanki nakani muntu kabanzila ti meno na hyokididi bahiika mu myo mi bakwe yenanga hoti mi bakwe yuwanga mu meno.

7 Ni hahoho, mwanki nalembolo ba na mayama mu misamu mi banzabikisa mu Mpeve, bantula mu nitu mpasi zingolo bonso mbazi yi Satana yi batuma mu ntuta mwanki nalembolo sa mayama. 8 Nkumbu zitatu nasambila mu bombidila Mfumu kantatudila mpasi bezozo, 9 na wumvutudila ti: «Mulemvo ani wufweni ku ngeye! Mu dyambu ti lulendo lwani lukwe lunganga mu lebakani.» Ntiidi bwabu mu kiyangidika mu lebakani dyani, mwanki lulendo lu Klisto luba mu kati dyani. 10 Ni hahoho, nakwe yangalalanga mu lebakani, mu bituku, mu mpasi, mu nkwamusu, mu mfyetokoso mu dyambu di Klisto, mu dyambu ti bu nii mu lebakani, ni bwabobo nakwe belanga na ngolo.

11 Meno nzonzidi bonso muntu wulahukidi, mu dyambu ti yeno lunsindisila mu sa bobo. Nganunu yeno luketi nsiikisa. Mpeleko nii kwandi muntu wumpamba ko, kansi nii kani wufyoti ko ha meso ma zintumwa zikwe kibanzilanga ti yawu bavudidi bunene. 12 Bidimbu bi kisalu kyani ki kintumwa bihilama ha kati dyeno, bu navibidila zintontolo zimvimba, mu nzila yi bidimbu, yi bimangu mpe yi misamu mingitukulu. 13 Nki lulembolo baka bibaka Mabundu mahiika e? Bu nalembolo ba kizitu kuu yeno e? Buna ndemvokileeno mu musamu bewowo wumbi.

14 Bwabu nkubamani mu kwiza ku yeno nkumbu yitatu, mpe naaba kizitu ku yeno ko. Yeno nina kwe sosi, kansi ka mvwilu eno ko. Mu dyambu ti, ka baala ko bakwe lundanga mvwilu yi bibuti byawu, kansi bibuti bikwe lundanga mvwilu yi baala bawu. 15 Mu myo mintadidi, naaba mu kyese kilunga mu haana mvwilu ani yimvimba yii naani, mu kihaana mvimba mebende mu dyambu dyeno. Bu nina lutya bubwingi, bwedi, yeno luna ntiila kwandi mu ndambu e?

16 Mpeleko naba kizitu ku yeno ko, kansi bantu bahiika bedi tanga ti meno nsadulu yimbi yi naani, mpe nalubaka mu mutambu mu madyela mani. 17 Bwedi bima nalubonga mu nzila yi muntu mu bantu bebobo ba nalutambika e? 18 Nasyamisa Tito mu kwiza ku yeno, mpe ha kimosi nandi natambika mpangi eto. Bwedi Tito kima kalubindimina mu lomba e? Nganunu tudyatila ha kimosi mu mpeve yimosi ko na mu bitambi bimosi ko e?

19 Tuuka ntama, bwa lukwe banzilanga ti yeto tukwe sosanga mu kinungisa ha ntadisi eno. Kaani! Ha ntadisi yi Nzambi mu Klisto tuna zonzila mimvimba bemimi. Mpangi zani zizola, ni mu lusadisa mu ntungulu eno yi kiminu. 20 Mu dyambu ti, bunkuta buu naani, bu naatula, nalembolo lubwana bonso buntiidi ti lubeela, mpe yeno lulembolo nyena bonso bulutiidi ti nabeela. Bunkuta buu naani mu bwana ha kati dyeno mayuma na kimbanda, nganzi na kimpala, matoola na kufundasana ku luvunu, mayama na mvwanzi. 21 Bunkuta bu naani ti bu naatula, Nzambi ani kabwesa nyenisa nsoni mu dyambu dyeno, mpe nadila mu babingi batekidi sa masumu na balembolo vilula madyela, mu biika busafu, kindumba na misamu mi nsoni mi basadila.