1 Mpangi zani, dyambu divudi nkinzi ku nsye mutima ani, mpe lusambulu lwani ku Nzambi mu dyambu di Bayudayo, ludi ti babaka mpulusu. 2 Mu dyambu ti, nalendi ta kimbangi mu vema kwawu mu Nzambi, kansi vema kwawu kudi kusikama mu nzayilu yikedika ko. 3 Bazebi lunungu lukwe haananga Nzambi ko, mpe bakwe sosanga mu ba mu ngolo zi yawu bende bantu balunungu, ni hahoho, bakwe lembolo tumiminanga lunungu lukwe haananga Nzambi. 4 Mu dyambu ti, Klisto wudi nsukunu yi Misiku, mwanki minkwikidi mimvimba mitambula lunungu.

5 Taleeno bwedi Mose kasonikina musamu wutadidi lunungu lukwe fumanga mu Misiku: «Muntu kwe tumiminanga Misiku, waazinga mu Misiku.» 6 Kansi, lunungu lukwe fumanga mu kiminu luna zonzila ebu: «Kutandi ku nsye mutima aku ko ti: nani waatomboka ku yulu e?» (Mpila mosi ti Klisto bana kulumuna ku nsi.) 7 Kutandi mpe dyaka ti: «Nani waakulumuka ku nsi yi bafwa e?» (Mpila mosi ti Klisto bana tombola ku nsi yi bafwa.) 8 Nki kana sosa mu ta e? Mambu ma Nzambi maa lukufi naku, madi mu munwa aku na mu mutima aku. Mambu ma Nzambi bemomo, ni mambu ma kiminu ma tuna kwe samuni. 9 Tala ti samuni mu munwa aku ti Yesu Mfumu kadi na kwikidi mu nkatika mutima aku ti Nzambi wumufulukisa mu bafwa, waavuuka. 10 Mu dyambu ti, kukwikila mu mutima kukwe natanga mu nzila yi lunungu, mpe kusamuna mu munwa, kukwe natanga ku mpulusu. 11 Bonso bukwe tanga Masonama ti: «Wonso muntu kwikidi mu yandi, kaafwa nsoni ko.» 12 Ni hahoho, kuu diswaswani ko ha kati di Bayudayo na balembolo ba Bayudayo: bamvimba Mfumu yimosi kaka yii nawu, yikwe lonkanga mambote ku yobobo bamvimba bakwe mu sambilanga. 13 Mu dyambu wusonama ti: «Wonso muntu waatumisa nkumbu yi Mfumu, waavuuka.»

14 Kansi bwedi balendi tumisina Mfumu, tala ti bakwikidi mu yandi ko e? Mpe bwedi balendi kwikila mu yandi, tala ti bamuyudi ko e? Mpe bwedi balendi muyuwila, tala ti kunaani muntu wuna musamuna e? 15 Mpe bwedi balendi musamunina, tala ti batambikidi muntu ko e? Bonso wudi wusonama: «Oo! Budi bumbote mu yena bantu bana kwiza, bana kwe samuni misamu mimbote!» 16 Kansi, bamvimba batambudi Musamu Wumbote ko. Yesaya wuta ti: «Mfumu, nani kwikidi mu ndongosolo eto e?» 17 Buna kiminu kikwe fumanga mu myo mi tukwe yuwanga, mpe myo mi tukwe yuwanga, mikwe fumanga mu Mambu ma Klisto.

18 Kansi nina fuula bwabu: «Nganunu bayuwa ko e?

Ninga! Ndinga awu yiyuwakana mu nza yimvimba,

mpe mambu mawu mayenda natee ku sukina nza.»

19 Kansi nina fuula bwabu: «Nganunu Isaeli kabakula ko e? Mose wuta tuuka ntama ti:

Meno mbo nalukitula bantu ba musoki ku yobobo balembolo ba kanda,

Mbo nalufwemisa mu bantu balembolo ba na madyela.»

20 Mumbikudi Yesaya wubwesa zonza dyaka ti :

«Nabakulu ku yobobo bedi lembolo nsosa,

Nazabakani ku yobobo bedi lembolo ndomba kima.»

21 Kansi mu misamu mitadidi Isaeli, wuta ti:

«Kilumbu kimvimba ndambudi moko mani

ku mukangu wukwe lembolo tumamanga na wukwe nangumukanga.»