1 Ni hahoho mu kiminu, batubongila bantu balunungu, na tweka bwabu mu kiyenge na Nzambi mu nzila yi Mfumu eto, Yesu-Klisto. 2 Mu Yesu, mu nzila yi kiminu, tutambudi mulemvo we finama na Nzambi wu tumeni simbidila. Mpe kyese kyeto kikangamani mu kivuvu kyaatukotisa mu nkembo wu Nzambi. 3 Kabobo kaka ko, tukwe yenikisanga kyese kyeto mu mpasi zeto, mu dyambu tuzebi ti mpasi zikwe butanga mvibudulu, 4 mvibudulu yikwe butanga kukwikama, na kukwikama kukwe butanga kivuvu, 5 mpe kivuvu kifwisanga nsoni ko, mu dyambu ti Nzambi wudukula luzolo lwandi mu mitima myeto mu nzila yi Mpeve Yilongo yi katuhaana.

6 Mu dyambu ti, bu tuba bantu balebakana, Klisto wufwa mu dyambu di minsumuki, mu ntangu yi zenga Nzambi. 7 Mpasi ku muntu mu tambula mu fwa mu dyambu di muntu wumosi wu lunungu. Kulendi ba ti muntu katambula mu fwa mu dyambu di muntu wumbote. 8 Kansi taleeno bwedi Nzambi kalonkila luzolo lwandi kuu yeto: buna twakidi minsumuki, Klisto wufwa mu dyambu dyeto. 9 Bu tweka bwabu bantu balunungu mu nzila yi lufwa lu Klisto, ni bwabobo kakwe tuvuukisilanga mu mankesi ma Nzambi. 10 Bu tuba mitantu mi Nzambi, wutuwawisa nandi mu lufwa lu Mwana andi. Bwabu butuwawasani nandi, Nzambi waatuvuukisa mu nzila yi luzingu lu Mwana andi. 11 Kabobo kaka ko, tutudidi kyese kyeto mu Nzambi mu dyambu di Mfumu eto, Yesu-Klisto. Mpe mu yandi bwabu tuwawasani na Nzambi.

12 Ni hahoho, masumu makotila mu nza mu dyambu di muntu wumosi, Adami. Mpe mu nzila yi masumu lufwa lukotila, ni bwabobo mpe lufwa lukotila ku bantu bamvimba, mu dyambu ti bamvimba basumuka. 13 Tekila Nzambi kahaana Misiku ku Mose, masumu makitekidila mu nza. Kansi, Misiku mikibeela ko, Ni hahoho, Nzambi kedi lembolo sembilanga masumu. 14 Kansi, tuzebi ti kutonina ku Adami natee ku Mose, lufwa lunyeka na lubwidila mpe yobobo balembolo sa masumu bonso masa Adami wulembolo vumina ntumunu yi Nzambi. Adami wuba kifwani ki yondowo wuketi kwiza.

15 Kansi masumu ma Adami, malendi fwanakana ko na munkayulu wuhaana Nzambi wumpamba. Tuzebi ti bantu babingi bafwa mu dyambu di muntu wumosi bewowo. Kansi mulemvo wu Nzambi wuhyokidi bunene, mpe munkayulu andi wuhyokidi mfunu. Ku babingi munkayulu bewowo wumpamba wubahaanu mu nzila yi muntu wumosi, ni Yesu-Klisto. 16 Mpe munkayulu wuhaana Nzambi wudi wuswaswana na disumu di muntu wumosi. Buna, ku manima ma disumu di muntu wumosi, mfundusu yi Nzambi yitunatini nsembolo. Kansi munkayulu wumpamba wuhaana Nzambi, wubanatini lunungu mpeleko misamu myawu mimingi mimbi. 17 Mu dyambu di musamu wumbi wu muntu wumosi, lufwa lunyekini. Ni bwabobo, yobobo batambudi mulemvo wuhyokidi kitezo na munkayulu wulunungu, bana zinga mu Yesu-Klisto.

18 Ni hahoho, mu musamu wumbi wu muntu wumosi, bantu bamvimba batambudi nsembolo. Bumosi mpe, mu kisalu kimbote ki muntu wumosi, kisidi ti bantu bamvimba bakituka bantu balunungu na bazinga. 19 Mu muntu wumosi wulembolo tumimina Nzambi, bantu babingi bakitukidi minsumuki, bumosi mpe, mu muntu wumosi wutumimina Nzambi, bantu babingi bakitukidi balunungu.

20 Misiku miyiza na mi butisa misamu mimbi, kansi huuma ha nyeka masumu, mulemvo wu Nzambi wusempidi. 21 Ni hahoho, bonso masumu bu malonkidi lulendo lwandi mu nzila yi lufwa, bwabobo mpe mulemvo wu Nzambi wukwe lonkilanga lulendo andi mu nzila yi lunungu, mu tunata ku luzingu lu mimvu ka mimvu mu Yesu-Klisto, Mfumu eto.