1 Kadi muntu fweti vumina zimfumu zikwe tuyaalanga. Mu dyambu ti, kimfumu ku Nzambi kikwe fumanga, mpe zimfumu zo zina yaala, Nzambi kwe byekanga zo. 2 Ni hahoho, yondowo wuna bindisa mfumu mpaka, kana vumina mpe ntumunu yi Nzambi ko. Yobobo bana lembolo vumina ntumunu beyoyo, basosidi nsembolo mu yawu bende. 3 Mu dyambu ti, yobobo bakwe hidikanga misamu mimbote, balendi yena mimfundisi bunkuta ko. Kansi bakwe hidikanga misamu mimbi, yawu bafweti yena bunkuta. Tiidi mulembolo yena mfumu bunkuta e? Buna hidika misamu mimbote, na mbo wutambula masiika mandi. 4 Mu dyambu ti, mumfundisi kisadi ki Nzambi kidi mu dyambu di bumbote bwaku. Tala ti hidikidi misamu mimbi, yena bwabu bunkuta. Ka mu mpamba ko kasimbidi sabala ha kooko. Mu dyambu ti Nzambi kana sadila, mu lonka mankesi ku muntu wuna sadila mambi. 5 Ni hahoho, budi bumbote mu tumimina zimfumu, ka mu dyambu di mankesi ma Nzambi kaka ko, kansi mu dyambu di mayindu mambote.

6 Bwabobo lukwe futilanga mpe mpaku. Mu dyambu ti, mimfundisi bisadi bi Nzambi bidi mu kisalu bekyokyo mpe. 7 Vutuleeno ku kadi muntu kyo ki kalusompisa: mpaku ku yondowo kwe futisanga mpaku, ntalu yi bazenga ku yondowo wu zenga yo, kivumi ku yondowo wu bafweti vumina, masiika ku yondowo wu bafweti siika.

8 Lubandi na mfuka na muntu ko. Mfuka yimosi kwandi yii neeno, ni mu zolasana yeno na yeno. Mu dyambu ti yondowo tiidi munandi, lungisi Musiku. 9 Mu dyambu ti, mina ni emi: «Kusadilandi bunsuza ko, kuhondandi ko, kuyibandi ko, kuzininandi ko.» Mpe mina mihiika mikangamani mu Mambu ema ti: «Zola mfinangani aku bonso ngebende*.» 10 Luzolo lukwe hidikanga mimbi ku munaku ko. Luzolo ni kima kikwe lungisanga Musiku.

11 Luzebi bwabu mu nkye ntangu tudi. Ntangu yifweni ye temona, mu dyambu ti mpulusu yeka bela-bela neto, keka mu ntangu yi tutonina mu kwikila mu Klisto. 12 Mpimpa yeka kukula, bwisi bwe kya. Tuloseeno bwabu nsadulu zi kitombe, na tulwateeno binwanunu bye nwanina mu mwini. 13 Tudyatileeno mu ludedomo bonso bu tukwe dyatilanga mu mwini. Tubikeeno kindyafu, kinduvu, busafu, kindumba, mayuma na kimpala. 14 Kansi lwateeno Mfumu Yesu-Klisto, mpe lusandi mayindu mu nsuni ko mu yukutisa nzinunu zandi.