1 Mpangi zani, mu dyambu di nkenda zi Nzambi, nina lulomba mu haana nitu zeeno bonso munkayulu wumoyo, wulongo mpe wuna yangidika Nzambi. Ku yeno, kwaaba kukembisa kukedika mpe kufwanakani. 2 Lulandandi mbelo yi bantu ba nza beyiyi ko, kansi kitukeeno bamona mu madyela, mwanki luba na lulendo lwe bakula luzolo lu Nzambi: mu zaba dyambu dimbote, dikwe muyangidikanga mpe dilunga.

3 Mu dyambu di mulemvo wumpaana Nzambi, nalombidi ku wumosi-wumosi ku yeno, mbanzulu zeeno zihyokandi kitezo na bu ludi ko, kansi beeno na kimpombo bonso budi kiminu ki haana Nzambi ku wumosi-wumosi mu yeno. 4 Mu nitu yimosi, tuu na binama bibingi, mpe binama bimvimba bikwe salanga kisalu kimosi ko. 5 Bumosi mpe yeto tuu babingi, nitu yimosi kwandi tudi mu Klisto mpe yeto na yeto tudi bakangama mu nitu yimosi. 6 Nzambi wutuhaana minkayulu miswaswana, bonso budi mambote mandi. Tala ti wumosi ha kati dyeto wuu na munkayulu we bikula, bika kabikula bonso buu kitezo ki kiminu. 7 Wumosi wuu na munkayulu we sadisa, bika kasadisa, wuu na munkayulu we longa, bika kalonga, 8 wuu na munkayulu we syamisa, bika kasyamisa. Yondowo wuu na munkayulu we kaba, bika kakabula mu mutima wuzibuka. Yondowo wuna twadisa, bika katwadisa mu bunkete bonso. Yondowo wuna sadisa bantu baa mu mpasi, bika kabasadisa mu kyese.

9 Bika luzolo lweno lulembolo ba lu diisu ku nsye lukaya. Tineeno mambi, kangameeno mu mambote:

10 Bika mu kimpangi kyeno, lutoma zolasana yeno na yeno.

Beeno bantete mutoma vumasana yeno na yeno.

11 Beeno na vema, kansi ka bulenga ko.

Lemeeno mu mpeve na sadileeno Mfumu.

12 Yangalaleeno mu dyambu di kivuvu kyeno.

Vibidileeno mu ntangu yi mpasi.

Mpe tatamaneeno mu lusambulu.

13 Sadiseeno balongo baa mu mbindumunu.

Tatamaneeno mu tambulanga baneeno bumbote.

14 Sakumuneeno yobobo bana lufyetikisa.

Basakumuneeno, na lubasingandi ko.

15 Yangalaleeno ha kimosi na yobobo bana yangalala.

Dileeno ha kimosi na yobobo bana dila.

16 Yuwasaneeno yeno na yeno.

Lubandi bantu ba mayama ko, kansi beeno bakuluka.

Mpe lukiyenikisandi bantu bandwenga ko.

17 Luvutulandi mbi mu mbi ko.

Seeno ngolo mu hidika misamu mimbote ha ntadisi yi bamvimba.

18 Tala ti bulendi ba mpe lulendi bwe sa, lufweti zinga mu kiyenge na bantu bamvimba.

19 Mpangi zani zizola, luvutulandi mbi yeno bende ko, kansi bikeeno mankesi ma Nzambi masala.

Mu dyambu ti wusonama: «Meno nakwe fundisanga! Meno nakwe vutulanga mambi.» Mfumu zonzidi.

20 Kansi wudi mpe wusonama ti: «Tala ti mutantu aku wuu na nsatu, muhaana bindya kadya, wuu na mpwila yi mamba, muhaana mo kanwa. Mu dyambu ti, bu wuna sadila bobo, ni makala matiya wuna yonzika ha yulu mutu andi*.»

21 Kubiikandi mambi ma kubedisa ko, kansi bedisa mambi mu mambote.