1 Buna ni wuba nani, ngeye kwe fundisanga bahiika, zaba ti wuu na ndemvokolo ko. Bu kwe fundisanga bahiika, kwe kibedisanga ngebende, mu dyambu ti ngeye kwe fundisanga, kwe dyatilanga bonso yawu. 2 Tuzebi ti Nzambi mu kedika kakwe fundisilanga bantu bakwe hidikanga misamu mibobobo. 3 Ngeye kwe fundisanga yobobo bakwe hidikanga myo bonso ngebende, wuna banzila ti ngeye waavuuka mu mfundusu yi Nzambi e? 4 Hoti wuna safula bunene bu mambote ma Nzambi, mvibudulu andi na mutima andi we yambudila, wuna lembana mu bakula ti mambote mandi mana kulomba wuvilula madyela e? 5 Kansi mu mutima ngolo aku na bu wuna bisa mu vilula madyela, wuna kwe yonziki ngebende kitumbu kihyokidi bunene mu kilumbu Nzambi ki kalonka mankesi mandi na lufundusu lukedika, 6 kilumbu bekyokyo ki kaahaana musendo ku kadi muntu bonso budi ndyatulu andi. 7 Mbo kahaana luzingu lu mimvu ka mimvu ku yobobo bana tatamana mu sadila mambote na bana sosa nkembo, nzitusu na luzingu lukwe lembolo bolanga. 8 Kansi mbo kalonka mankesi mandi na nganzi zandi ku yobobo bakwe munangumukinanga, bakwe lembolo tambulanga kikedika na bakwe lembolo tumiminanga misamu milunungu. 9 Mpasi na manyongo byaakwamisa bantu bebobo bakwe hidikanga misamu mimbi, bantete Bayudayo mpe balembolo ba Bayudayo. 10 Nkembo, nzitusu na kiyenge ku yobobo bakwe sadilanga mambote, bantete Bayudayo mpe balembolo ba Bayudayo. 11 Mu dyambu ti Nzambi kasanga diswaswani ha kati di bantu ko.

12 Bamvimba bebobo bakwe sanga masumu wulembolo zaba Misiku mu Mose, baafwa wulembolo zaba Misiku. Kansi, bamvimba bebobo bakwe sanga masumu bazebi Misiku, baafundusu bonso buna tumina Misiku. 13 Mu dyambu ti, kayobobo kaka ko bakwe yuwanga Misiku baaba bantu balunungu ha ntadisi yi Nzambi. Kaani, kansi yobobo bakwe sadilanga myo, baabatumisina bantu balunungu. 14 Yobobo balembolo ba Bayudayo na bazebi Misiku ko, kadi bana sadila myo, bana vumina Misiku mu luzolo lu yawu bende mpeleko bazebi myo ko. 15 Mpe bana lonka ti nsadulu yina lomba Misiku, yii yisonama mu mitima myawu. Mu dyambu ti, ndyatulu awu yina lonka kimbangi, mpe mayindu mawu malendi bafunda hoti malendi banwanina. 16 Mimvimba bemyomyo myaayenika mu kilumbu Nzambi ki kaafundisa, mu nkumbu Yesu-Klisto, mansweki ma luzingu lu kadi muntu, bonso bu wudi wusonama mu Musamu Wumbote wu nina kwe samuni.

17 Kansi, ngeye wuna kibika Muyudayo, kangamani mu Misiku mi Mose na kwe kitumpidikanga mu Nzambi, 18 ngeye zebi luzolo lwandi, mpe Misiku mi kulonga mu soola misamu mimbote, 19 ngeye wuna kilonka muntwadisi wu zimpofo, kya ki yobobo badi mu tombe, 20 muntwadisi wu balembolo ba na madyela, mulongisi wu baala bafyoti, mu dyambu ti nzebi ti mu Misiku lenda baka nzayilu yilunga na kikedika. 21 Bwabu ngeye kwe longanga banaku, ngebende lendi kilongaka ko! Ngeye kwe longanga bantu babiika bwivi, kansi ngebende kwe yibanga! 22 Wuna dika kinsuza, ngebende wuna sadila kinsuza! Ngeye kwe belanga biteki, kansi kwe yibanga bii mu zinzo zawu zi lusambulu! 23 Ngeye wuna kitumpidika mu Misiku, kansi wuna vweza Nzambi bu wuna lembolo tumimina Misiku. 24 Kedika, bonso bu wudi wusonama ti: «Mu dyambu dyeno nkumbu yi Nzambi yina safulu ku balembolo ba Bayudayo.»

25 Kuzengoso bubakala kudi mfunu tala ti wuna tumama mu Misiku. Kansi tala ti wuna tyaka Misiku, weka bonso muntu lembolo zengoso bubakala. 26 Tala ti muntu lembolo zengoso bubakala wuna tumimina Misiku, nganunu Nzambi kalendi mu bongila bonso muntu zengoso bubakala ko e? 27 Yondowo lembolo zengoso bubakala, kansi wuna vumina Misiku, waakufundisa ngeye wuna lembolo tumimina Misiku, mpeleko wuu na Misiku misonama na wuzengoso bubakala. 28 Mu dyambu ti, Muyudayo wukedika ka ni yondowo ko kwe yenikanga, mpe kuzengoso bubakala ku kedika, ka ni kokoko kukwe yenikanga mu nitu ko, 29 kansi Muyudayo wukedika ni mu mwela andi. Mpe kuzengoso bubakala kukedika ni mu mutima andi. Kuzengoso bubakala bebobo ku Mpeve Yilongo kukwe fumanga, kansi ka mu Misiku misonama ko. Muyudayo wukedika, masiika ku Nzambi makwe fumanga, kansi ka ku bantu ko.