1 Tambuleeno yondowo wuu lebakana mu kiminu, lubindisandi mabanza mandi mpaka ko. 2 Kuu na muntu wuu na kiminu mu dya bima bimvimba, kuu na wuhiika wuu wulebakana mu kiminu, yandi bikola byandi kakwe dyanga. 3 Yondowo kwe dyanga bimvimba, kayinandi yondowo kwe lembolo bye dyanga, mpe yondowo kwe lembolo bye dyanga, kafundisandi yondowo kwe dyanga byo, mu dyambu ti Nzambi yandi katambudi. 4 Ngeye nani wudi mu fundisa kisadi kingana e? Ni kaaba wukwikama hoti ni kabwa, myo mfumu andi mitadidi. Waaba wukwikama, mu dyambu ti, Mfumu wuu na lulendo mu musyamisa.

5 Kuu na muntu lendi banza ti, kuu na bilumbu bihyokidi mfunu na bihiika, wuhiika ti bilumbu bimvimba mfunu bidi. Kadi muntu kasa kiminu mu mbanzulu andi . 6 Yondowo kwe yenanga bilumbu mfunu, kwe sanga bo mu zitisa Mfumu. Yondowo kwe dyanga bimvimba, kwe dyanga mu zitisa Mfumu, mu dyambu ti Nzambi kakwe vutudilanga matondo mu bindya. Yondowo kwe lembolo dyanga bimvimba kwe sanga bo mu vutula matondo ku Nzambi. 7 Kadi kunaani muntu kwe zinganga mu dyambu di yandi bende, mpe kunaani muntu kwe fwanga mu dyambu di yandi bende. 8 Tala ti bamoyo tudi, mu nkumbu yi Mfumu tudi bamoyo, mpe tala ti bafwa tudi, mu nkumbu yi Mfumu tukwe fwilanga. Ni tu ba bamoyo, ni tu ba bafwa, bamvimba Mfumu wu tuvwidi. 9 Mu dyambu ti Klisto wufwa na wufuluka mu bafwa, mwanki kaba Mfumu yi bafwa na bamoyo. 10 Bwabu ngeye, mu dyambu di nki wuna fundisila mpangi aku e? Hoti ngeye, mu dyambu di nki wuna yinina mpangi aku e? Yeto bamvimba twaafundusu ha ntadisi yi Nzambi. 11 Mu dyambu wusonama ti:

Meno wumoyo nidi, Mfumu teedi bo

Bantu bamvimba baafukama ha ntadisi ani,

mpe ndinga zimvimba zina kembila Nzambi.

12 Ni hahoho, kadi muntu waahaana mvutu ku Nzambi mu mimvimba mi kahidikidi.

13 Tubikeeno mu kifundisa yeto na yeto. Kansi, sadileeno madyela meeno mulembolo tesisa mpangi aku sakuba, hoti mu mubwisa. 14 Mu Mfumu Yesu, nzebi mpe nina kwikila ti, kunaani kima kilembolo ba kivedila mu kyabende, kansi tala ti muntu teedi ti kii kivedila ko, buna kii kivedila ko mu yandi bende. 15 Tala ti mu dyambu di bindya, wuna yenisa munaku kyadi, zaba ti wuna dyatila dyaka mu luzolo ko. Mu dyambu di bindya byaku, keba kwaku mu zezisa kiminu ki yondowo Yesu wu kafwila. 16 Misamu mina yenika mimbote ku yeno, mibandi ku bahiika hwahwa di bakwe lusehidi. 17 Mu dyambu ti mu kimfumu ki Nzambi, ka kudya na kunwa ko, kansi lunungu, kiyenge na kyese kikwe haananga Mpeve Yilongo. 18 Yondowo wuna sadila Klisto mu nsalulu beyoyo, wuna yangidika Nzambi na wuna tambula masiika ku bantu.

19 Ni hahoho, tusoseeno misamu mikwe twalanga kiyenge na mikwe kudisanga kiminu kyeto mu kintwadi. 20 Kubwisandi kisalu ki Nzambi mu dyambu di kudya ko. Tuzebi ti bima bimvimba bivedila bidi, kansi kambote ko mu sa ti kudya kutesisa masakuba. 21 Bumbote mu lembolo dya mbizi yi kibulu, mu lembolo nwa vinu na mu bika bimvimba bikwe bwisanga mpangi aku. 22 Kiminu kyo kii naku, toma keba kyo ha ntadisi yi Nzambi. Kyese ku yondowo kwe lembolo kibedisanga yandi bende mu myo mi kana hidika. 23 Kansi yondowo wuu na maketiketi mu dya, tala ti didi, wu kibedisi. Mu dyambu ti, ndyatulu andi yina kwelana ko na dyambu ditadidi kiminu. Misamu mimvimba mikwe lembolo dedakananga na kiminu, masumu madi.