1 Buna nkye mfunu mu ba Muyudayo e? Nkye ndandu mu zengoso bubakala e? 2 Ndandu yiyinene mu nzila zizingi yidi. Mu dyambu ti, Mambu ma Nzambi masamunu ku Bayudayo, mwanki baaba bantete mu sadila mo. 3 Nkye dyambu tulendi ta, tala ti Bayudayo bahiika bakwikama mu Nzambi ko e? Bu balembolo ba bakwikama, nganunu Nzambi kaaba wukwikama ko e? 4 Kaani! Tufweti zaba ti Nzambi kedika kadi, kadi muntu wuu na luvunu, mu dyambu ti wudi wusonama ti:

«Fweti zabakana muntu wulunungu mu mpova zaku,

mwanki wununga tala ti bana kufunda.»

5 Kansi tala ti mbi yi tukwe sanga yikwe lonkanga lunungu lu Nzambi, buna nki twaata e? Buna Nzambi kasiidi dyaka wulunungu ko, mu dyambu ti wuna tusemba mu mankesi. Nina zonzila bonso bantu baa mu nza. 6 Kaani! Tala ti bwabobo, nganunu bwedi Nzambi kalendi fundisila nza e?

7 Kansi, tala ti luvunu lwani luna toma yenikisa kikedika ki Nzambi na nkembo andi, bila nki ndendi bwesa fundusulu ku yandi bonso munsumuki e? 8 Bantu bahiika bana kwe tusafudi mu ta ti mpova zo zi luvunu zeto zidi. Bantu bebobo bana tufunda ti: «Bika tuhidika misamu mimbi mwanki mimbote mi duuka ha kati di misamu mimbi e?» Bantu bebobo baafundusu bonso bufwanakani.

9 Bwedi twaata e? Nganunu yeto Bayudayo tuhyokidi mfunu bantu bahiika e? Kaani! Mu dyambu ti, tulonka ti muntu ni kaba Muyudayo, ni kalembolo ba Muyudayo, bamvimba ku nsye kinanga ki masumu tudi. 10 Bonso buwusonama ti:

«Kunaani muntu wulunungu, na kaani wumosi.

11 Ku naani muntu wuu na madyela,

ku naani muntu wuna sosa Nzambi.

12 Bantu bamvimba basisidi nzila yimbote,

kunaani muntu wuhidikidi kani musamu wumbote.

Kunaani, kani wumosi!

13 Muhudi awu wudi bonso ndyamu yimwasi.

Ludimi lwawu luna basadisa mu huna.

Mu bikoba byawu muu na miswa mi nyoka.

14 Minwa myawu mifuluka mu misamu minsingulu na mindudi.

15 Malu mawu makwe nookanga ntiinu mu tengola menga.

16 Mu bifulu bimvimba mu bakwe hyokilanga,

bakwe mwangisanga bima bimvimba mpe bakwe sisanga kyadi.

17 Bazebi nzila yi kiyenge ko.

18 Bakwe vuminanga Nzambi ko.»

19 Tuzebi ti mimvimba mikwe tanga Misiku, mikwe teholongo ku yobobo bana zinga ku nsye lutumu lu Misiku. Mina sa ti nakaani muntu kazonzandi, na bantu babakula ti nza yimvimba yi bedoso yidi ha ntadisi yi Nzambi. 20 Ni hahoho, kunaani muntu waaba wulunungu ha ntadisi yi Nzambi bu kavumini Misiku. Mu dyambu ti Misiku mikwe lonkanga ku muntu ti masumu kasiidi.

21 Kadi bwabu Nzambi wutulonkidi bwedi kakwe tusilanga muntu wulunungu ha ntadisi andi, wulembo ba ku nsye Misiku. Mpe mabuuku ma mimbikudi na ma Misiku mana muteela kimbangi. 22 Nzambi kwe sanga ti bantu baba balunungu mu kiminu kyawu mu Yesu-Klisto. Kwe sanga bo ku yobobo bakwe mukwikilanga, mu dyambu ti kunaani diswaswani ha kati dyawu. 23 Kadi bantu bamvimba basumukini mpe beka kitatu (basidi) na nkembo wu Nzambi. 24 Kansi Nzambi wuba sidi bantu balunungu mu mulemvo andi wumpamba, mu nzila yi nkudulu mu Yesu-Klisto. 25 Ha ntadisi yi bamvimba, Yandi Nzambi kahaana bonso munkayulu mu baka ndemvokolo yi masumu, mu nzila yi kiminu mu menga mandi. Wulonka lunungu lwandi bu kabika mu semba masumu mantama, mu ntangu yi mvibudulu andi. 26 Mu ntangu beyiyi, Nzambi lonkidi lunungu lwandi, mwanki bantu babakula ti kaba yandi bende muntu wulunungu. Wusa bobo, mwanki kakitula wulungu muntu wuna zingila mu kiminu mu Yesu. Kanungisa yondowo wuna zingila mu kiminu mu Yesu.

27 Bwabu kuu na musamu dyaka we kitumpidikila e? Kaani, kunaani! Bila nki e? Mu dyambu ti, kima kimfunu, ka muvumina musiku ko, kansi lukwikulu mu Yesu-Klisto. 28 Tubakudi ti mu dyambu di kiminu muntu kadi wulunungu, kansi ka bu katumimini Misiku ko. Tuna banzila ti muntu kadi wulunungu ko bu katumimini Misiku, kansi tukwikidi mu dyambu di kiminu muntu kadi wulungu. 29 Hoti Nzambi wudi kaka Nzambi yi Bayudayo e? Nganunu kadi mpe Nzambi yi balembolo ba Bayudayo e? Ninga, wudi mpe Nzambi yi balembolo ba Bayudayo, 30 mu dyambu ti Nzambi yimosi kwandi yidi. Yandi waanungisa mu nzila yi kiminu, bazengoso bubakala na balembolo zengoso bubakala. 31 Mu nzila yi kiminu, nganunu tulendi katula mfunu yi Misiku e? Kaani! Misiku kisalu midi!