1 Nina fuula bwabu: Nganunu Nzambi wunyafuna mukangu andi e? Nkatika kaani! Mu dyambu ti mebende mwisi-Isaeli nidi, mu nkuna yi Abalahami, mu kifumba ki Benyami. 2 Nzambi kanyafuna mukangu andi wukateka soola ko. Luzebi ko misamu bemyomyo mita Masonama mu ntangu mumbikudi Eliya bu kedi nyonga ha ntadisi yi Nzambi mu dyambu di Isaeli: 3 Mfumu, bahondidi mimbikudi myaku, bamwangisi maziku ma bakwe yokilanga minkayulu, meno hiika nsidi mpe bana sosa mu mponda. 4 Kansi, Nzambi nkye mvutu kamuhaana e? Nkebidi mu dyambu di mebende mafunda nsambwadi ma bantu, yobobo balembolo fukama ha ntadisi yi nzambi yi Baali. 5 Bumosi mpe mu ntangu beyiyi, mwa ndambu yi bantu yisidi Nzambi yi kasoodidi mu bumbote bwandi. 6 Yandi wubasoola mu dyambu di bumbote bwandi, kansi ka mu dyambu di bisalu byawu ko. Nganunu bumbote bu Nzambi bu keti bwesa ba nkatika bumbote ko.

7 Nki bwabu tulendi ta e? Isaeli kabaka bima bi kedi kwe sosingi ko, kansi yobobo kwandi Nzambi bakasoola babaka byo, mpe bahiika bayiza ba na mitima mikangama, 8 bonso bu wusonama ti: «Nzambi wubahaana mpeve ye nungina, mwanki meso mawu malembolo yena, mpe makutu mawu malembolo yuwa natee mu kilumbu bekiki.» 9 Ntinu Davidi mpe wuta ti:

«Bika ndambisa zawu ziba mutambu ku yawu, mpwasa, dyambu dya babwisa,

na dya bahaana nsembolo.

10 Bika meso mawu makituka mpimpa natee bu mafwa,

sa ti ntangu zimvimba mungongo awu wuba nakondondo*.»

11 Nina fuula bwabu: Bayudayo bu bata kuba, nganunu babwa mvimba e? Nkatika kaani! Kansi mu dyambu di masumu mawu, balembolo ba Bayudayo batambudi mpulusu mwanki Bayudayo babasila kimpala. 12 Tala ti masumu ma Bayudayo matwedi kimvwama ki nza, mpe kibwa kyawu kitwedi kimvwama ki balembolo ba Bayudayo, bwedi bwaabeela bunene bu mambote mawu bu balanda nzila yi mpulusu e?

13 Nina ta bwabu ku yeno lulembolo ba Bayudayo: bu nii ntumwa yi balembolo ba Bayudayo. Nakwe yangalalanga mu kisalu kyani, 14 mpe nii na kivuvu ti, mbo natuukisa kimpala ki yobobo batudi menga mamosi, mwanki navuukisa mwa ndambu ha kati dyawu. 15 Tala ti bu babatuula ha lweka, nza yiwawasana na Nzambi, ntambudulu awu bwedi yaabela dyaka e? Yaaba bonso mvutukulu yi bafwa mu luzingu.

16 Tala ti luheeni ndambu yintete yi kiputi ki dimpa ku Nzambi, kiputi kimvimba kisidi kyeka mpe kyandi. Mpe tala ti luheeni ku Nzambi myanzi mi muti, bintala mpe byeka byandi. 17 Isaeli wudi bonso muti wu olive wuu ku nsye mpanda, Nzambi wukazengidi mwa ndambu yi bintala, kansi ngeye wulembolo ba Muyudayo, bakubaatisi mu sasa mu bintala bihiika, mwanki wukudila mu maka ma mwanzi ma muti wu olive, 18 Ni hahoho, kusafulandi bintala bibazengidi ko. Bwedi lenda kitumpidika e? Zaba ti ka ngeye ko wuna kwe nati mwanzi, kansi mwanzi wuna kwe kunati.

19 Mbo wunteela ti: «Bintala bebyobyo bizengo mwanki meno naba wubatama mu muti.» 20 Wukedika wudi. Bazengila byo mu dyambu ti biba na kiminu ko, mpe wudi wutelama nakekete mu dyambu di kiminu kyaku. Kansi, kukitumpidikandi ko! Keba kwaku. 21 Tala ti Nzambi katabila Bayudayo, bintala bi miti mimena myabende ko, ngeye mpe kaakutabila ko. 22 Bakula bwabu nkasu na bumbote bu Nzambi: nkasu ku yoyobo babwidi, mpe bumbote bwandi ku ngeye tala ti kangamani mu bumbote bwandi. Tala ti kabobo ko, ngeye mpe mbo bakukwangula. 23 Tala ti ba-Isaeli batatamani ko mulembolo kwikila, yawu babaatama mu muti mu sasa, mu dyambu ti, Nzambi wuu na lulendo mu baabatika dyaka mu muti. 24 Ngeye wudi kintala ki muti wu olive wuu ku nsye mpanda, ki zengidi Nzambi na ki kabaatisi, na weka wubaatama mu muti wu olive wu bakunini. Kansi Bayudayo badi bintala bi muti wu olive bewowo wu bakunini. Nzambi lendi babaatika dyaka mu muti wu yawu bende.

25 Mpangi zani, mwanki lulembolo kibongila bonso bantu bandwenga, natiidi mu luzabikisa makani bemomo ma mpulusu ma yenikisa Nzambi: ndambu yi mukangu wu Isaeli yina lembana mubakula mo natee makanda mamvimba ma bantu bahiika bu maatambula mpulusu. 26 Bwabobo mpe kanda dimvimba di Isaeli dyaavuukila, bonso bu wusonama ti:

Kikuudi kyaafuma ku mulandu wu Syoni,

mbo kakatula nsadulu zimbi mu nkuna yi Yakobi.

27 Luwawanu lwalolo naatunga nawu,

bu naakatula masumu mawu*.

28 Mu myo mitadidi Musamu Wumbote, tuzebi ti mitantu midi mu dyambu dyeno. Kansi, mu myo mitadidi nsoodolo yi Nzambi, bantu bazolakana badi mu dyambu di matata mawu. 29 Mu dyambu ti, Nzambi kabwesa bonganga minkayulu mi kaheeni ko, na kakwe kitulanga mbokolo andi ko. 30 Mu ntama, lutumimina Nzambi ko. Kansi bwabu lutambudi nkenda zi Nzambi, mu dyambu ti Bayudayo babisa mu tumama. 31 Bumosi yawu mpe babisa bwabu mu tumama, mwanki lutambula nkenda zi Nzambi, mwanki yawu mpe bazaba bwabu nkenda bezozo. 32 Mu dyambu ti, Nzambi wusa ti bantu bamvimba baba bonso mu boloko mulembolo mutumimina, mwanki bamvimba batambula nkenda zandi.

33 Oo! Nkye mpila mpinda

buu kimvwama, ndwenga na nzayilu yi Nzambi!

Nani lenda bangula nzengolo zandi e?

Nani lenda bakula makani mandi e?

34 Nani bwabu wuzaba mbanzulu zi Mfumu e?

Nani wuba kihaani ki malongi ku yandi e?

35 Nani wuntete wumuhaana kima e?

Mwanki kamufuta e?

36 Mu dyambu ti bimvimba bikwe fumanga ku yandi,

mu yandi na ku kwandi.

Bika nkembo wuba ku Nzambi mimvu ka mimvu! Ameni!