Kubotoko mu Yesu-Klisto
1 Nki bwabu tulendi ta e? Nganunu tutatamana mu zinga mu masumu mwanki mulemvo wu Nzambi wuvula nyeka e? 2 Kaani! Yeto tudi bafwa mu masumu: bwedi tulendi bwesa zingila dyaka mu masumu e? 3 Luzebi ko ti yeto bamvimba tubotoko mu Yesu-Klisto, mu lufwa lwandi tutambudila mbotokolo e? 4 Buna, mu mbotokolo batuziika ha kimosi nandi mu ba kintwadi mu lufwa lwandi, mwanki, bonso bufuluka Klisto mu bafwa mu lulendo lu nkembo lu Tata, yeto bumosi mpe tudyata mu luzingu lumona.
5 Buna, tala ti batutuula kintwadi nandi mu lufwa lufwanakani bonso lu lwandi, mbo tuba mpe kintwadi nandi mu mfulukulu yifwanakani bonso yi yandi. 6 Watuzebi ti: nitu eto yintama yabakoma ha kulunsi ha kimosi na Klisto, mwanki nitu eto yi masumu yifwa na tulembolo bwesa ba mindongo mi masumu. 7 Mu dyambu ti yondowo fwidi na Klisto weka muntu wulunungu, na kasiidi dyaka na masumu ko. 8 Kansi tala ti tufwidi ha kimosi na Klisto, tukwikidi ti mbo tuzinga mpe ha kimosi nandi. 9 Tuzebi ti Klisto, bu kafuluka mu bafwa, kalendi bwesa fwa ko: lufwa lusidi dyaka na lulendo mu yandi ko. 10 Bu kafwa, wufwa nkumbu yimosi kaka ki mankululu mu dyambu di masumu ma bantu. Kansi bwabu bu kadi wumoyo, wuna zinga mu dyambu di Nzambi.