12 Masumu malendi bwesa yaala nitu eno yaafwa ko, mwanki malembolo lusindisila mu tumimina nsatu zeno zi kinsuni. 13 Lubikandi binama byeno bi nitu mu masumu ko bonso bisalulu byehidikila misamu mimbi. Kansi lufweti kiyekola kimankululu yeno bende ku Nzambi bonso bantu bafulukidi mu bafwa na beka bamoyo. Mboki haaneeno nitu zeno zimvimba zisadila Nzambi bonso bisalulu bi lunungu. 14 Bwabu, masumu malendi bwesa ba na luyaalu mu yeno ko. Mu dyambu ti lusidi dyaka ku nsye Misiku ko, kansi ku nsye mulemvo wu Nzambi.

15 Nki bwabu e? Nganunu tulendi hidika kweto masumu mu dyambu ti tusidi dyaka ku nsye lutumu lu Misiku ko, kansi mu mulemvo wu Nzambi e? Kaani! 16 Walutomini zaba ti: tala ti luna sadila muntu mu mutumimina, lweka bonso bisadi bi mfumu beyoyo yi luna tumimina, hoti luna tumimina masumu, makwe natanga ku lufwa, hoti luna tumimina Nzambi, yandi kwe natanga ku luzingu lu lunungu. 17 Kansi tuvutuleeno matondo ku Nzambi mu dyambu ti, yeno luteka ba mindongo mi masumu. Bwabu lutumamani mu mitima myeno mimvimba, mu ndongosolo yi kintwadi yi lutambula. 18 Lukululu mu bundongo bu masumu, mpe lweka mindongo mi misamu mi lunungu.