1 Crônicas 17

ጌሻ ጎልያ ኬጽያዌ ሶሎሞና ግዱሳ

1 ዳዊተ ባረ ካትያ ጎለን ደኢደ፥ ትምቢትያ ኦድያ ናታና፥ "ታን ዝጋፐ ኬጸቴዳ ጎለን ደአይ፤ ሽን መና ጎዳ ቃላ ጫቁዋ ታቦታይ ዱንካንያ ጋርሳና" ያጌዳ።

2 ናታን ዳዊታ፥ "ኦናዉ ነ ዎዛናይ ቆፔዳዋ ኡባ ኪተታ፤ ጾሳይ ኔናና ደኤ" ያጌዳ።

3 ሽን ሄ ጋላሳ ቃማ ጾሳ ቃላይ ናታናኮ ዪደ፥ 4 "ባ፤ ታ ቆማ ዳዊታ ሀዋዳን ያጋ፤ ‘መና ጎዳይ ሀዋዳን ያጌ፤ ታን ደአና ጎልያ ኬጻናዌ ኔና ግዳካ። 5 አያዉ ጎፐ፥ ታን እስራኤላቱዋ ግብጼፐ ከሴዳ ጋላሳፐ ዶማደ ሀቼ ጋካናዉ፥ ጎለን ደአበይከ፤ ታን ዱንካንያፐ ዱንካንያዉ፥ ቃይ እት ሳፐ ሀራ ሳአዉ ዩያደ ደኣድ። 6 ታን እስራኤልያ አሳ ኡባና ዩዬዳ ሳኣ ኡባን፥ ታ አሳ ሄማናዉ ታን አዛዜዳ እስራኤልያ ዳናቱዋፐ ኦስነ፥ ታዉ ዝጋ ጎልያ አያዉ ኬጻበይኪ? ጋደ ኦቻበይከ’ ያጌ" ያጋ።

7 "ሄዋ ድራዉ፥ ሀእካ ታ ቆማ ዳዊታ፥ ‘ኡባፐ ዎልቃማ መና ጎዳይ ኔና ሀዋዳን ያጌ፤ "ታን ኔና ሄን ጋደፐ፥ ዶርሳ ሄምያ ሳፐ ደንደ፥ ታ አሳ እስራኤልያ ካለናዳን አካድ። 8 ኔን ቤዳ ሳኣ ኡባን ታን ኔናና እትፐ ግዳድ፤ ነ ሞርከቱዋ ኡባ ነ ስንፐ ድጋድ። ሀእ ስም ታን ሀ ሳኣን ኤረቴዳ ዎልቃማ አሳቱዋፐ ሱንዳን ነ ሱን ግታያና። 9,10 ቃይ ታን ታ አሳዉ፥ እስራኤልያዉ ሳኣ እማደ፥ ኡንቱንታ ሄ ሳኣን ቶካና። ሄዋ ድራዉ፥ ኡንቱንቱ ባረንቱ ሳኣን ደአናዋንታ፤ ኡንቱንቱ ላኤን ሻባረትክኖ። ካሰ ታን ታ አሳ እስራኤልያ ቦላ የለታቱዋ ሱንዳ ዎድያፐ ዶምና ናቄዳዋዳን፥ ላኤን ኢታ አሳቱ ኡንቱንታ ናቂክኖ። ታን ነ ሞርከቱዋ ኡባ ነዉ ሞድሳና።

" ‘ "ሄዋ ቦላንካ መና ጎዳይ ባረ ሁጲያዉ ነ ዛራቱ ደአናዳን ኦናዋ ነዉ ኦዴዳ። 11 ነ ላይይ ዉርና፥ ሀይቃዳ ነ ማይዛ አዎቱዋን ጋከትያ ዎደ፥ ታን ኔፐ ጉይያን ነ ዛርያ፥ ነ ናናቱዋፐ እቱዋ ደንደ፥ አ ካዉተ ምንሳና። 12 ታዉ ጎልያ ኬጻናዌ አ፤ ታን አ ካዉተ አራታ መናዉ ምንሳ ኤሳና። 13 ታን አዉ አዉዋ ግዳና፤ እካ ታዉ ናኣ ግዳና። ኔፐ ካሰ ካተቴዳ ሳኦላፐ ታን ታ ሲቁዋ አካ ድጌዳዋዳን፥ ታን አፐ ኡባካ አክከ።✝17:13 2 ኦዱዋ 6:18፤ እብራ. 1:5 14 ታን አ ታ አሳ ቦላነ ታ ካዉተ ቦላ መናዉ ሱንና፤ አ ካዉተ አራታይካ መናዉ ምን ኤቃና" ያጌ’ ያጋ" ያጌዳ።

15 ናታን ጾሳይ አዉ ሳጻን ቆንጭሴዳ ቃላ ኡባ ሀዋዳን ዳዊታዉ ኦዴዳ።

ዳዊታ ዎሳ

16 ሄዋፐ ጉይያን፥ ካቲ ዳዊተ ዱንካንያ ገሊደ፥ መና ጎዳ ስንን ኡቴዳ። ሀዋዳን ያጊደ ዎሴዳ፤ "አቤት መና ጎዳዉ፥ ጾሳዉ፥ ኔን ሀዋ ኡባ ታዉ ኦናዉ ታን ኦኔ? ታ ሶይ አሳይካ አዬ? 17 አቤት መና ጎዳዉ፥ ሀዌ ነ አይፍያ ስንን ጉ ማላትና፥ ነ ቆማ ዛራቱ ስንፐ ያናዋ ላይቱዋን ትምቢትያ ኦዳዳ። ታና ቃይ ዎልቃማ አሳ ከሳዳ። 18 ኔን ታና ነ ቆማ ቦንቼዳ ድራዉ፥ ታን ዳዊተ ስም አያ ጋናዉ ዳንዳያይታ? ኔን ታና ነ ቆማ ኤራሳ። 19 አቤት መና ጎዳዉ፥ ነ ቆማ ድራዉ፥ ነ ዎዛና ቆፋዳን ሀ ግታባ ኡባ ኦደ፥ ሀ ግታተ ኡባ ታና ኤርሳዳ።

20 "አቤት መና ጎዳዉ፥ ነ ማል እቱነ ባዋ። ኑን ኑ ሀይን ስሴዳዋዳን፥ ኔፐ አትና፥ ሀራ ጾስ ባዋ። 21 ኔን ነ አሳ ኦናዉ ዎዜዳ ነ አሳ እስራኤልያ ማላትያ ሀራ ካዉተ ሳኣ ቦላን ባዋ። ኔን ኦዳ ግታነ ማላልስያ ኦሶቱ ጋሱዋን ነ ሱንይ ቢታን ሳኣን ኤረቴዳ። ኔን ግብጼፐ ዎዜዳ ነ አሳ ስንፐ ካዉተቱዋ ላጋዳ። 22 ኔን ነ አሳ እስራኤልያ መናዉ ነባ ኦዳ። አቤት መና ጎዳዉ፥ ኔንካ ኡንቱንቱ ጾሳ ግዳዳ።

23 "አቤት መና ጎዳዉ፥ ኔን ነ ቆማባነ አ ዘረባ ሃሳዬዳዌ መናዉ ምን ኤቆ፤ ኔን ኦና ጌዳዋዳንካ ኪተታ። 24 ‘ኡባፐ ዎልቃማ መና ጎዳዉ፥ እስራኤልያ ጾሳይ ቱሙዋፐ እስራኤልያዉ ጾሳ’ ጌተታናዳን ነ ሱንይ መናዉ ምን ኤቃናነ ግታታና። ነ ቆማ ዳዊታ ዛራቱ ነ ስንን ምን ኤቃና።

25 "አቤት ታ ጾሳዉ፥ ‘ታን ነዉ ጎልያ ኬጻና ጋደ’ ኔን ታዉ ነ ቆማዉ ቆንጫዳ። ሄዋ ድራዉ፥ ታን ነ ቆማይ ሀ ዎሳ ኔና ዎሳናዉ ጻላድ። 26 አቤት መና ጎዳዉ፥ ኔን ጾሳቴ! ኔን ሀ ሎኦ ቃላ ታዉ ነ ቆማዉ ኦና ጋዳ። 27 ነ ስንን ያ መናዉ ጋምአናዳን፥ ነ ቆማ ዛርያ አንጃናዉ ናሸታ። አቤት መና ጎዳዉ፥ ኔን አንጄዳዌ መናዉ አንጀተዳዋ ግዳና" ያጊደ ዎሴዳ።