ካቲ ዳዊተ ጭሜዳ
1 ካቲ ዳዊተ ጭሚደ ዎድያ ሎይ ሱጌዳ። ያቴዳዎ ቆማቱ ማዩዋ አ ቦላ ኩርናካ አ ሆኤናን እጼዳ። 2 ሄዋ ድራዉ፥ አ ኦሳንቻቱ አ፥ "ካትያ ማታን ደአና ማላነ አ ናጋና ማላ፥ እት ዎዶሮ ናቶ ኑን ነዉ ኮያና፤ ኑ ጎዳ ካትያ ሆኤናዉ እዛ አ ምይያን ግሳናዉ ዳንዳያዉ" ያጌድኖ። 3 ኡንቱንቱ እስራኤልያ ቢታን ኡባን ኮዪደ አብሻጎ ጌተትያ እት ማላ ሎኦ ዎዶራቶ ሹኔማ ጌተትያ ካታማፐ ደሚደ እዞ ካትያዉ አሄድኖ። 4 ሄ ወዶራታ ሎይ ማላ ሎኦ ናኣ። እዛ ካትያ ናጋዱነ አዉ ኦዱ፤ ሽን ካቲ እዝና ግሱዋን ጋከት ኤረና።
አዶንያስ ካተታናዉ ኮዬዳ
5 ሀጊት ናአይ አዶንያስ፥ "ታን ካተታናዉ ኮያድ" ያግ ደንዲደ ፓራ ጋረቱዋነ ፓራቱዋ ባረ ስንን ዎጽያ እሻታሙ አሳና ጊግሴዳ።1:5 2 ሳሜላ 3:4 6 አ አዉ አባን ገሊደ፥ "አያዉ ሀዋ ኦይ?" ጊደ ኡባካ አ ኦች ኤረና። አዶንያስካ ቃይ ማላ ሎይ ሎኦ አሳ፤ እ አበሰሎማ ካሊደ የለቴዳ። 7 አዶንያስ ጻሩይ ናኣ ዮኣባነ ቄስያ አብያታራ ሀ የዉዋ ዞረታ በሴዳ፤ ኡንቱንቱ አ ማዳናዉ ማዬድኖ። 8 ሽን ቄስያ ጻዶቀ፥ ዮዳሄ ናአይ ባናይ፥ ትምቢትያ ኦድያ ናታን፥ ሽምእ፥ ሬእነ ዳዊታ ናግያዋንቱ አዶንያሳና ባዋ።
9 እት ጋላስ አዶንያስ ኤንሮጌላ ካታማ ማታን ዞሄሌታ ዛላ ጌተትያ ሳኣን ዶርሳቱዋ፥ መሄቱዋነ ቦልትቦልታ ማራቱዋ ያርሼዳ። ካትያ ናና ባረ እሻቱዋ ኡባነ ካትያዉ ኦያ ይሁዳ አሳቱዋ ኡባ ባረ ያርሽያ ሳኣ ጼሴዳ፤ 10 ሽን ትምቢትያ ኦድያ ናታና፥ ባናያ፥ ካትያ ናግያዋንታነ ባረ እሻ ሶሎሞና ጼስቤና።
ሶሎሞነ ካተቴዳ
11 ሄዋፐ ጉይያን፥ ናታን ሶሎሞነ ዳዮ በርሳቤሆ ሀዋዳን ያጊደ ኦቼዳ፤ "ኑ ጎዳይ ዳዊተ ኤረናን ደእሽን፥ ሀጊት ናአይ አዶንያስ ካተቴዳዋ ኔን ስሳበይኪየ?1:11 2 ሳሜላ 12:24 12 ያቶፐ፥ ሀእ ኔን ነ ሸምፑዋነ ነ ናኣ ሶሎሞነ ሸምፑዋ ዋታደ አሻንንቶ ኔና ታን አነ ዞራይ። 13 ካትያ ዳዊታኮ ገላደ ሀዋዳን ያጋ፤ ‘ታ ጎዳዉ ካትያዉ፥ ታዉ ነ ቆማትዉ፥ "ቱማ፥ ታፐ ጉይያን ነ ናአይ ሶሎሞነ ካተታና፤ ታ ካዉተ አራታን እ ኡታናዋ" ያጋደ ጫቃበይኪ? ያትና፥ አዶንያስ አያዉ ካተቴዴ?’ ያጋ። 14 ኔን ካትያና ሃሳያደ ያን ደእሽን ታን ገላደ፥ ነ ሃሳያ ማይዛደ ሃሳያና" ያጌዳ።
15 በርሳባ ጭሜዳ ካትያ ሃሳይሳናዉ እ ደእያ እልፕንያ ገላዱ፤ ሹኔማ ካታማፐ ዬዳ አብሻጋ ካትያ ናጋናዉ። 16 በርሳባ ካትያ ስንን ኩንዳ ጉፋናዱ።
ካቲ፥ "አያ ኮያዲ?" ያጊደ ኦቼዳ።
17 እዛ፥ "ታ ጎዳዉ፥ ታዉ ነ ቆማትዉ፥ ‘ታፐ ጉይያን ነ ናአይ ሶሎሞነ ካተታና፤ ታ ካዉተ አራታንካ እ ኡታናዋ’ ጋደ መና ጎዳን፥ ነ ጾሳን፥ ኔን ጫቃዳ። 18 ሽን ሀእ አዶንያስ ካተቴዳ፤ ኔን ታ ጎዳይ ካቲ ሄዋ ኤራካ። 19 እ ሎይ ዳሮ መሄቱዋ፥ ቦልትቦልታ ማራቱዋነ ዶርሳቱዋ ያርሺደ ካትያ ናና ኡባ፥ ቄስያ አብያታራነ ኦላ ጋዳዋ ዮኣባ ጼሴዳ፤ ሽን ነ ቆማ ሶሎሞና ጼስቤና። 20 ታ ጎዳዉ ካትያዉ፥ ታ ጎዳፐ ካትያፐ ጉይያን ኦን ነ ካዉተ አራታን ኡታነንቶ ኤራናዉ እስራኤልያ አሳ ኡባ አይፊ ኔና ጼል ኡቴዳ። 21 ሄዌ ዮፐ፥ ታ ጎዳይ ካቲ ሀይቂደ ባረ ማይዛን ጋከትያ ዎደ፥ ታንነ ታ ናአይ ሶሎሞነ ዳባ ኦዳ አሳዳን ፓይደታና" ያጋዱ።
22 በርሳባ ብሮ ካትያና ሃሳይሽን፥ ትምቢትያ ኦድያ ናታን ካትያ ጎልያ ጋኬዳ። 23 ካትያዉ፥ "ትምቢትያ ኦድያ ናታን ዬዳ" ያጊደ ኦዴድኖ። ያትና፥ ናታን ካትያ ስን አደ፥ ባረ ዴሙዋ ሳኣ ጋደ ጎይኔዳ።
24 ሄዋፐ ጉይያን ናታን፥ "ታ ጎዳዉ ካትያዉ፥ ኔፐ ጉይያን አዶንያስ ካተታናዳንነ ነ ካዉተ አራታን ኡታናዳን ኦዳዲየ? 25 ሀቼ እ ዱገ ቢደ ሎይ ዳሮ መሄቱዋ፥ ቦልትቦልታ ማራቱዋነ ዶርሳቱዋ ያርሺደ ካትያ ናና ኡባ፥ ኦላ ጋዳዋቱዋነ ቄስያ አብያታራ ጼሴዳ። ኡንቱንቱ ሀእ አናና ሚድነ ኡሺደ፥ ‘ካቲ አዶንያስ መናዉ ደኦ!’ ያግ ደኢኖ። 26 ሽን ታና ነ ቆማ፥ ቄስያ ሳዶቃ፥ ዮዳሄ ናኣ ባናያነ ነ ቆማ ሶሎሞና ጼስቤና። 27 ሀዌ ታ ጎዳ ካትያፐ ጉይያን አ ካዉተ አራታን ኦን ኡታነንቶ ባረ ቆማቱዋ ኤርሰናን ደኢደ ታ ጎዳይ ካቲ ኦዳቤየ?" ያጌዳ።
28 ካቲ ዳዊተ፥ "በርሳቤሆ ታዉ ጼስተ" ያጌዳ፤ ካቲ ደእያ ሳኣ ገላደ አ ስንን ኤቃዱ። 29 ሄ ዎደ ካቲ እዝዉ ሀዋዳን ያጊደ ጫቄዳ፤ "ታና መቶ ኡባፐ አሼዳ መና ጎዳይ ኤሮ! 30 መና ጎዳን፥ እስራኤልያ ጾሳን ታን ነዉ ጫቄዳ ጫቁዋ ቱሙ ሀቼ ፖላና፤ ታፐ ጉይያን ነ ናአይ ሶሎሞነ ካተታና፤ ታ ካዉተ አራታን፥ ታ ሳኣን እ ኡታናዋ" ያጌዳ።
31 በርሳባ ባረ ዴሙዋ ሳኣ ጋደ ካትያ ስንን ዉቱሻደ ካትያ፥ "ታ ጎዳይ፥ ካቲ ዳዊተ መናዉ ደኦ!" ያጋዱ።
32 ሄዋፐ ጉይያን ካቲ ዳዊተ፥ "ታዉ ቄስያ ሳዶቃ፥ ትምቢትያ ኦድያ ናታናነ ዮዳሄ ናኣ ባናያ ጼሲደ ገልስተ" ያጌዳ። ኡንቱንቱ ገሊደ፥ ካትያ ስን አድኖ። 33 እ ኡንቱንታ፥ "ታ ቆማቱዋ ህንተናና አክ ቢደ፥ ታ ናኣ ሶሎሞና ታን ቶግያ ባቁሉዋ ቶግሲደ፥ ዱገ ግዮነ ፑልትያ አፍተ። 34 ቄስያ ሳዶቅነ ትምቢትያ ኦድያ ናታን አ ኦኪደ እስራኤልያ አሳ ቦላን ካዉኖ። ሄዋፐ ጉይያን ማላካታ ፑኒደ፥ ህንተንቱ ቃላ ቁ ኦደ፥ ‘ካቲ ሶሎሞነ መናዉ ደኦ!’ ያግተ። 35 ሄዋፐ ጉይያን ህንተንቱ አ ገደኒደ አናና ፑደ ቢተ፤ እ ዪደ ታ ካዉተ አራታን ኡቲደ፥ ታ ሳኣን ካተቶ። ታን እስራኤላነ ይሁዳ ሞድያዋ ኡዳደ አ ሱንድ" ያጌዳ።
36 ዮዳሄ ናኣ ባናይ ካትያዉ ዛሪደ፥ "አመንእ! መና ጎዳይ፥ ታ ጎዳ ካትያ ጾሳይካ ሄዋ ጎ! 37 መና ጎዳይ ታ ጎዳና ካትያና ግዴዳዋዳን ሶሎሞነናካ ግዶ፤ ያትና፥ አ ካዉተ አራታ ታ ጎዳ ካትያ ዳዊታ ካዉተ አራታፐካ አደ ግታዮ" ያጌዳ።
38 ሄዋ ድራዉ፥ ቄስያ ሳዶቀ፥ ትምቢትያ ኦድያ ናታን፥ ዮዳሄ ናአይ ባናይነ ካትያ ናግያዋንቱ ሶሎሞና ካቲ ዳዊተ ቶግያ ባቁሉዋ ቶግሲደ፥ ግዮነ አፌድኖ። 39 ቄስያ ሳዶቀ ጾሳ ዱንካንያፐ ዛይትያ ካጭያን ትግ አኪደ፥ ሶሎሞና ኦኪደ ካተዬዳ። ሄዋፐ ጉይያን ኡንቱንቱ ኡሉዱድያ ፑንና፥ አሳይ ኡባይ ባረ ቃላ ቁ ኦደ፥ "ካትያ ሶሎሞነ መናዉ ደኦ!" ያጌዳ። 40 አሳይ ኡባይካ አ ካሊደ ፑደ ቤዳ፤ ኡንቱንቱ ሱሱሊያ ፑን ፑኒደ ካኢደ ሎይ ናሸቴድኖ። ሄ ሆምቦጨን ቢታይ ቃጼዳ።
41 አዶንያስነ አናና ደእያ እማቱ ባላ ም ዉርሲደ ሀዋ ስሴድኖ። ኡሉዱድያ ፑኑዋ ስሲደ ዮኣበ፥ "ሀ ካታማን ኮሹምያ ዋላሳይ ኡባይ አይባቤ?" ያጊደ ኦቼዳ።
42 እ ብሮ ሃሳይሽን ቄስያ አብያታራ ናአይ ዮናታን ጋክ ዎዳ። አዶንያስ፥ "አነ ሃ ገላ። ነ ማላ ሎኦ አሳይ ሎኦ ኦዱዋ አሄናን አገና" ያጌዳ።
43 ዮናታን፥ "ቱይት፥ ታን ሎኦ ኦዱዋ አሀበይከ! ኑ ጎዳይ ካቲ ዳዊተ ሶሎሞና ካተዬዳ። 44 አ ገደናና ማላ ካቲ ቄስያ ሳዶቃ፥ ትምቢትያ ኦድያ ናታና፥ ዮዳሄ ናኣ ባናያነ ካትያ ናግያዋንታ አናና የዴዳ፤ ኡንቱንቱ ካቲ ቶግያ ባቁሉዋ አ ቶግሴድኖ። 45 ቄስያ ሳዶቅነ ትምቢትያ ኦድያ ናታን፥ ግዮነ ሻፋን አ ኦኪደ ካተዬድኖ፤ ሄዋፐካ ኡንቱንቱ ሆምቦጪደ ፑደ ቤድኖ፤ ሄዎ ካታማይካ ኮሹሜ። ሀእ ህንተንቱ ስስያ ዋላሳይ ሄዋ። 46 ሄዋ ቦላካ ሶሎሞነ ካዉተ አራታን ኡቴዳ። 47 ቃይ ካትያ ኦሳንቻቱካ ኑ ጎዳ ካትያ ዳዊታ፥ ‘ነ ጾሳይ ሶሎሞና ዋርያ ነዋፐካ አ ዋረዮ! አ ካዉተ አራታ ነዋፐካ አ ግታዮ!’ ያጊደ አንጄድኖ። ካቲ ባረ አርሳን ደኢደ ሆኪደ ጾሳዉ ጎይኒደ፥ 48 ‘ታ ካዉተ አራታን ኡቲደ ታ ሳኣን ካተትያዋ ታና ሀቼ ታ አይፍያን በሴዳ መና ጎዳይ እስራኤልያ ጾሳይ ጋላተቶ!’ ያጌዳ" ያጌዳ።
49 ሄዋ ስሲደ፥ አዶንያስ እማቱ ኡባይ ዳጋም ደንዲደ፥ ላለቴድኖ። 50 አዶንያስ ሶሎሞናዉ ያይ ቢደ፥ ያርሽያ ሳኣ ካጨቱዋ ኦይቄዳ። 51 አሳይ ሶሎሞና፥ "አዶንያስ ካትያ ሶሎሞናዉ ያዪደ፥ ያርሽያ ሳኣ ካጨቱዋ ኦይቂደ፥ ካቲ ሶሎሞነ ታና ባረ ቆማ ማሻን ዎናዳን ታዉ ሀቼ ጫቆ ያጌ" ያጊደ ኦዴድኖ።
52 ሶሎሞነ ዛሪደ፥ "እ ባረ ሀኑዋ ሎይናዋ ግዶፐ፥ ሀራይ አትና አ ሁጲያፐ እት ብናናይነ ቦሸተና፤ ሽን አን ኢታተይ ቤትንቶ፥ እ ሀይቃና" ያጌዳ። 53 ሄዋፐ ጉይያን ካቲ ሶሎሞነ አሳ ኪትና፥ ኡንቱንቱ ያርሹዋ ያርሽያ ሳኣፐ ዱገ አ ዎድኖ። አዶንያስ ዪደ፥ ሶሎሞናዉ ጎይኔዳ፤ ያትና፥ ሶሎሞነ አ፥ "ነ ሶ ባ" ያጌዳ።