ኤልቃናነ አ ሶይ አሳ
1 ኤፍሬማ ገዝያን፥ ራማ ጌተትያ ካታማን ደእያ፥ ኤፍሬማ ዛረነ ጹፋ ያራ ግዴዳ፥ ኤልቃና ጌተትያ እት ብታኒ ደኤ፤ እ ይሮሃማ ናኣ፤ ይሮሃም ኤልሁ ናኣ፤ ኤልሁ ቶሁ ናኣ፤ ቶሁ ጹፋ ናኣ። 2 ኤልቃናዉ ላኡ ማቻቱ ደኢኖ፤ እትን ሱንይ ሃኖ፤ የንኮር ሱንይ ፕኒኖ። ፕኒናዉ ናናይ ደኢኖ፤ ሽን ሃንዉ እት ናእካ ባዋ።
3 ኡባፐ ዎልቃማ መና ጎዳዉ ጎይናናዉነ ያርሻናዉ ኤልቃን ላይን ላይን ባረ ካታማፐ ሴሎ ቤ። ኤልያ ናናይ ላኡ፥ ሆፍኒንነ ፒንሃስ ያን መና ጎዳ ቄሳቱ ዋ። 4 ኤልቃን ያርሹዋ ያርሽያ ዎደ አዉደነ አሹዋፐ እት ኩሽያ ባረ ማቻት ፕኒንዉ፥ ቃይ እት እት ኩሽያ እ አቱማ ናናዉነ ማጫ ናናቶ ሁጲያን ሁጲያን እሜ። 5 መና ጎዳይ ሃኖ የሉዋ ድግንቶካ፥ ኤልቃን እዞ ዶስያ ድራዉ፥ እዝዉ ላኡ ኩሽያ እሜ። 6 መና ጎዳይ ሃንዉ ኡባና የሉዋ ድጌዳ ድራዉ፥ እዝ ላጋታ እዞ ሀንቀዉነ ይሎያዉ። 7 ሀዌ ላይፐ ላይን ሀንያዋ፤ ሃና መና ጎዳ ጎለ ቤዳ ዎደ አዉደነ እዝ ላጋታ እዞ ዬካና ጋካናዉ ቁማ ሙሳ እጻና ጋካናዉ ይሎያዉ። 8 እዝ አስናይ ኤልቃን እዞ፥ "ሃኔ፥ ኔን አያዉ ዬካይ? አያዉ ቁማ ሚኪ? ነ ዎዛናይ አያዉ ካዮቲ? ታን ነዉ ታሙ ናናቱዋፐ አክታየ?" ያጌ።
ሃን ዎሳ
9 እት ጋላስ ኡንቱንቱ ሴሎን ሜዳዋፐነ ኡሼዳዋፐ ጉይያን፥ ሃና ደንዳ ኤቃዱ። ኤቂያ ዎደ፥ መና ጎዳ ጎልያ ፐንግያ ማታን ደእያ ኦይድያን ቄስያ ኤል ኡቴዳ። 10 ሃና ሎይ ሴለታደ፥ ጫሞ ዬኩዋ ዬካደ መና ጎዳ ዎሳዱ። 11 እዛ ሀዋዳን ያጋደ ቃንገ ቃንገታዱ፤ "ኡባፐ ዎልቃማ መና ጎዳዉ፥ ታና ነ ቆማቶ ጼላ! ታ ምሹዋ በኣደ፥ ታና ሀሳያ፤ ታና ነ ቆማቶ ዶጎፓ። ኔን ታዉ ነ ቆማትዉ አቱማ ናኣ እሞፐ፥ አ ደኡዋ ላይ ኡባን ታን አ ነዉ እማና፤ አ ሁጲ ኡባካ ሜደተና" ያጋዱ።1:11 ፓይ. 6:5
12 ሃና መና ጎዳ ዎሳ አዱሴዳ ዎደ፥ ኤል እ ዶና ጼሌ። 13 ሃና ባረ ዎዛና ግዶን ጾሳ ዎስያ ዎደ፥ እ መተርሻይ ቃጽያዋፐ አትና፥ እዝ ቃላይ ስሰተና፤ ሄዋ ድራዉ፥ ኤል እዞ ማቴዳዋዳን ቆፔዳ። 14 ሄዋፐ እዞ፥ "ኔን አዉደ ጋካናዉ ማታይ? ዎይንያ ኤሳ ነ ዶናፐ ድጋ" ያጌዳ።
15 ሄዋፐ ጉየ ሃና ሀዋዳን ያጋደ አዉ ዛራዱ፤ "ቱይት፥ ታ ጎዳዉ፥ ታን ሎይ መቶታንቻ ማጫ አሳ፤ ታን ታ ሸምፑዋፐ መና ጎዳ ዎሳይፐ አትና፥ ዎይንያ ኤሳ ዎይ ማይያ ኡሻ ኡሻበይከ። 16 ታን ታ ቱጋነ ታ ምሹዋ ዳሩዋ ሀዋን ሃሳዬዳ ድራዉ፥ ታና ነ ቆማቶ ‘ፓና ማጫ አሳ’ ጋደ ቆፖፓ" ያጋዱ።
17 ሄዋፐ ጉየ ኤል እዝዉ ዛሪደ፥ "ሳሮተን ባ፤ ኔን አ ዎሴዳዋ እስራኤልያ ጾሳይ ነዉ እሞ" ያጌዳ።
18 ሄዋፐ ጉየ ሃና፥ "ነ ቆማታ ነ ስንን ናሹዋ ደሙ" ያጋዱ። ሄዋፐ ጉይያን፥ አ ባረ ኦግያ ባደ፥ ቁማ ማዱ፤ ሄዋፐ ስምና ሙለካ ካዮታበይኩ።
ሃና ሳመላ የላዱ
19 ዎንተ ጋላስ ጉራና ደንዲደ፥ ኤልቃንነ አ ሶ አሳይ መና ጎዳዉ ጎይኔዳዋፐ ጉይያን፥ ባረንቱ ሶ፥ ራማ ካታማ ስሜድኖ። ኤልቃን ባረ ማቻት ሃንና አቄዳ፤ መና ጎዳይ እዞ ቆፔዳ፤ 20 አ ሻሃሮ ዎደ ዎዲ ዉርና አቱማ ናኣ የላዱ። ሃና፥ "ታን መና ጎዳ ዎስና ስሴዳ" ጋደ አ ሱን ሳሙኤኤላ ሱንዱ።1:20 ሳሙኤኤላ፦ ሀ ሱን ብለይ "ጾሳይ ስሴዳ" ግያዋ።
21 ኤልቃን ባረ ሶ አሳ ኡባና ላይ ያርሹዋ መና ጎዳዉ ያርሻናዉነ ቃንጌዳዋ ጋናዉ ሴሎ ቤዳ፤ 22 ሽን ሃና ባበይኩ። አ ባረ አስና፥ "ታ ናአይ ን ዱዳዋፐ ጉይያን፥ ታን አ አፋደ፥ መና ጎዳዉ እማና፤ መናዉ እ ያን ደአናዋ" ያጋዱ።
23 እ አስናይ ኤልቃን፥ "ኔና ሎኦዋ ኦ፤ አ ኔን ን ዱና ጋካናዉ ሶን ጋምአሻ፤ ያንናካ መና ጎዳይ ባረ ቃላ ፖሎ" ያጌዳ። ሄዋፐ ጉየ ሃና ን ዱና ጋካናዉ ባረ ናኣ ንደ ሶን ጋምኣዱ።
24 ሃና እዝ ናአይ ን ዱዳዋፐ ጉይያን፥ ሳመላነ ሄዙ ላይ ኮሩማ፥ ታሙ ኪሎ ግራመ ልያነ ኦጎሩዋ ኩመን ዎይንያ ኤሳ አካደ መና ጎዳ ጎልያ ሴሎ ባዱ፤ ናአይ ሄ ዎደ ጉ። 25 ኡንቱንቱ ኮሩማ ሹኬዳዋፐ ጉይያን፥ ናኣ ኤልያኮ አፌድኖ። 26 ሃና ኤልያ፥ "ታ ጎዳዉ፥ ነ ደኡ ኤሮ! ነ ስንን ኤቃደ መና ጎዳ ዎሴዳ ምሽራታ ቱሙ ታናቴ። 27 ታን ሀ ናኣ የላናዉ ዎስና፥ መና ጎዳይ ታን አ ዎሴዳዋ እሜዳ። 28 ሄዋ ድራዉ፥ ታን መና ጎዳዉ አ እማድ፤ እ ባረ ደኦ ላይ ኡባን መና ጎዳዉ እመቴዳ" ያጋዱ። ሄዋፐ ጉይያን፥ ኡንቱንቱ መና ጎዳዉ ያት ጎይኔድኖ።