1 Samuel 13

ፕልስጼማቱዋና ደንዴዳ ኦላ

1 ሳኦል እስራኤልያ ቦላ ላኡ ላይ ካተ ግዶዋፐ ጉይያን፥ 2 እስራኤላቱ ግዶፐ ሄዙ አሳ ዶሬዳ፤ ላኡ ሻአይ ምክማሳን፥ ቤቴለ ገዝያን ሳኦላና ደኤ፤ እት ሻአይ ቃይ ቢንያማን ደእያ ግብአን ዮናታናና ደኤ፤ አቴዳ አሳ ሳኦል ኡንቱንቱ ሶ ሶ የዴዳ።

3 ዮናታን ገባአን ደእያ ፕልስጼማ ኦላንቻቱ ጭታ ቦላ ዎራጄዳ፤ ፕልስጼማ አሳቱ ሄዋ ስሴድኖ። ሄዋፐ ጉይያን ሳኦል፥ "እብራዌቱ ሀዋ ስሲኖ" ጊደ፥ ቢታ ኡባን ማላካታ ፑንሴዳ። 4 እስራኤልያ አሳይ ኡባይ፥ "ሳኦል ፕልስጼማ ኦላንቻቱ ጭታ ቦላ ዎራጄዳ፤ ሀእ እስራኤልያ አሳይ ፕልስጼማ አሳዉ ሸነይያባ ግዴዳ" ያግያ ኦዱዋ ስሴዳ። አሳይ ሳኦላኮ ገልጋላ ጼሰቲደ ሺቄዳ።

5 ፕልስጼማ አሳቱ እስራኤላቱዋ ኦላናዉ ሀታሙ ሻአ ፓራ ጋረቱዋና፥ ኡሱፑን ሻአ ፓራ አሳቱዋናነ አባ ዶናን ደእያ ሻፍያ ኬሻ ኦላንቻቱዋና ሺቄድኖ፤ ኡንቱንቱ ፑደ ቢደ፥ ቤት-አዌናፐ አዋይ ዶልያ ባጋና ደእያ ምክማሳን ሺቄድኖ። 6 እስራኤልያ ኦላንቻቱ ባረንቶ ሌሌዳዋነ ኡንቱንቱ ጭታይካ ሎይ ኡንኤቴዳዋ በኢደ፥ ጎንጎሉዋ ግዶን፥ ቡራ ግዱዋን፥ ዛላቱ ግዱዋን፥ ካካ ግዶንነ ሃዉ ቦኮ ኦላ ግዶን ቆሰቴድኖ። 7 እብራዋቱዋፐ አማሬዳዋንቱ ዮርዳኖሳ ሻፋ ፕኒደ፥ ጋዳነ ጋላኣደ ጋድያ ቤድኖ። ሽን ሳኦል ገልጋላን አቴዳ፤ አናና ደእያ ኦላንቻቱ ኡባይ ያሻዉ ኮኮሬድኖ።

8 ሳኦል ሳመል ኬሬዳ ላፑን ጋላሳ ጋምኤዳ፤ ሽን ሳመል ገልጋል ይቤና፤ ያትና፥ ሳኦላ አሳይ ላለትያዋ ዶሜዳ።✝13:8 1 ሳሜላ 10:8 9 ሄዋ ድራዉ፥ ሳኦል፥ "ጹግያ ያርሹዋነ እትፐተ ያርሹዋ ታዉ ሀምተ" ያጌዳ፤ አህና ሳኦል ጹግያ ያርሹዋ ያርሼዳ። 10 ሳኦል ጹግያ ያርሹዋ ፖሎ ሳናካ ሳመል ጋክ ዎዳ። ያትና፥ ሳኦል ሳመላ ሞካናዉ ካረ ከሴዳ።

11 ሳመል ሳኦላ፥ "ሀዌ ኔን ኦዳዌ አዬ?" ያጌዳ።

ሳኦል፥ "አሳይ ላለትያዋ፥ ኔንካ ጌዳ ዎደ ያቤናዋነ ፕልስጼማቱ ምክማሳን ሺቄዳዋ ታን በኣደ፥ 12 ‘ፕልስጼማቱ ታናና ኦለታናዉ ሀእ ገልጋላ ዎናዋንታ፤ ታን መና ጎዳ ማዱዋ ኦቻበይከ፤ ሄዋ ድራዉ፥ ጹግያ ያርሹዋ ታን ያርሻናዉ ኮሸ’ ጋደ ቆፓድ" ያጊደ ዛሬዳ።

13 ሳመል ሳኦላ፥ "ኔን ኤያባ ኦዳ፤ መና ጎዳይ ነ ጾሳይ ነዉ እሜዳ አዛዙዋ ናጋባካ። እ ሀቼ ነ ካዉተ እስራኤልያ ቦላ መናዉ ምንሳናዋሽን። 14 ስም ሀእ ነ ካዉተይ ጋምኤና፤ ኔን መና ጎዳ አዛዙዋ ናጋቤና ድራዉ፥ መና ጎዳይ ባረ ዎዛናዳን ኦያ አሳ ኮዬዳ፤ አ ባረ አሳ ሞዳናዳን ሱንዳ" ያጌዳ።✝13:14 ኪታ 13:22

15 ሄዋፐ ጉይያን፥ ሳመል ገልጋላፐ ደንዲደ፥ ቢንያማን ደእያ ግብኣ ቤዳ። ሳኦል ባረናና ደእያ አሳ ፓይዴዳ፤ አሳይ ኡሱፑን ጼቱ ኬሻ ግዴዳ። 16 ሳኦል፥ አ ናኣ ዮናታንነ ኡንቱንቱና ደእያ አሳይ ቢንያማን ደእያ ገባአን ሺቄድኖ፤ ፕልስጼማ አሳቱካ ምክማሳን ሺቄድኖ። 17 ፕልስጼማቱ ሺቄዳ ሳኣፐ ዎራጅያዋንቱ ሄዙ ጩጎ ግዲደ ከሴድኖ፤ ኡንቱቱፐ እት ጩጉ ሹኣላ ቢታን ደእያ ኦፍራኮ ስሚደ ቤዳ፤ ላኤን ቤት-ሆሮን ቤዳ፤ 18 ሄዘን ጩጉ ባዙዋ ስንዬዳ፥ ጻቦኢማ ዎምባ ዱገ ጼልያ ዛዋ ኦግያ ኦይቂደ ቤዳ።

19 ፕልስጼማ አሳቱ፥ "እብራዌቱ አዳነ ቶራ ቆጾፕኖ" ጌዳ ድራዉ፥ እስራኤልያ ቢታ ኡባን ብራታ ቆጽያዌ ቤትቤና። 20 ሄዋ ድራዉ፥ እስራኤልያ ኡባይ ባረንቱ ማራሻ ጼራ፥ ጎማ፥ ካልታነ ባጫ ፖሽሳናዉ ፕልስጼማ አሳቱዋኮ ቢኖ። 21 ማራሻ ጼራነ ሻልክያ ፖሽሳናዉ ሆስፑን ግራመ ዴጽያ ብራ ቃንጺኖ፤ ካልታ፥ ጎማነ ጲልጹዋ ፖሽሳናዉ ሄዎ ባጋ ቃንጺኖ። 22 ሄዋ ድራዉ፥ ሳኦላናነ ዮናታናና ደእያ አሳ ኡባ ኩሽያን ኦላ ጋላስ ቶራይነ ማሻይ ባዋ፤ ሽን ሳኦላዉነ አ ናኣ ዮናታናዉ ደኤ። 23 ፕልስጼማቱዋ ጩጉ ምክማሳ ፕኑዋ ባናዉ ከሴዳ።