1 Samuel 15

ሳኦል አማሌቃ አሳ ቦላ ደንዳ ኦላ

1 ሳመል ሳኦላ፥ "ባረ አሳ እስራኤልያ ቦላ ኔን ካተታናዳን ኦካናዉ መና ጎዳይ ኪቴዳዌ ታና፤ መና ጎዳ ቃላ ስሳ።✝15:1 1 ሳሜላ 10:1 2 ኡባፐ ዎልቃማ መና ጎዳይ ሀዋዳን ያጌ፤ ‘እስራኤላቱ ግብጼፐ ከሲደ ይያ ዎደ አማሌቃ አሳቱ ኦግያን ኡንቱንቱና ኤቀቴዳ ድራዉ፥ ታን አማሌቃ አሳቱዋ ሙራና።✝15:2 ከሳ 17:8-14፤ ዛረ. 25:17-19 3 ሀእ ባ፤ አማሌቃ አሳቱዋ ሾጫ፤ ኡንቱንቶ ደእያዋ ኡባ ኡባና ይሳ፤ ኡንቱንታ አሾፓ፤ ኡንቱንታ ማጫዋ አቱማዋ፥ ምያዋ ቁጭያዋ፥ ሚዛ ዶርሳ፥ ጋሉዋነ ሀርያ ዎ’ ያጌ" ያጌዳ።

4 ሳኦል አሳ ጼጊደ፥ ጸሌማ ግያ ሳኣን ፓይድያ ዎደ እስራኤልያ ላኡ ጼቱ ሻአ፤ ይሁዳፐ ታሙ ሻአ አሳይ ደኤ። 5 ሳኦል አማሌቃቱዋ ካታማ ቢደ፥ እት ዛንጋራ ግዶን ጌመት ኡቴዳ። 6 ሳኦል ቄና አሳቱዋ፥ "ታን ህንተንታ አማሌቃ አሳቱዋና እትፐ ይሰና ማላ፥ ደንድተ! ኡንቱንቱ ግዶፐ ከስተ! ሀዋፐ ክችተ! አያዉ ጎፐ፥ እስራኤላቱ ግብጼፐ ከስያ ዎደ፥ ህንተንቱ ኡንቱንታ ኡባዉ ሎይ ዴጻ" ያጌዳ። ቄና አሳቱ አማሌቃ አሳቱዋ ግዶፐ ከሲደ ቤድኖ።

7 ሳኦል አማሌቃ አሳቱዋ ሀዊላፐ ዶሚደ፥ ግብጼ ስንን ደእያ ሹራ ጋካናዉ ሾጬዳ። 8 አማሌቃቱዋ ካትያ አጋጋ ፓጻ ደእሽን፥ ሳኦል ኦሞዴዳ፤ አ አሳ ኡባ ቃራ ማሻን ዎ ዉርሴዳ። 9 ሽን ሳኦልነ አ ኦላንቻቱ፥ አጋጋነ ኡባፐ ሎእያ ዶርሳቱዋ፥ ሚዛቱዋ፥ ቦልትቦልታ ማራቱዋ፥ ጋሎቱዋነ ሀራ ሎኦባቱዋ ኡባ አሸድኖ፤ ኡንቱንቱ ሀዋንታ ኡባና ዎ ዉርሳናዉ ዶስበይክኖ፤ ሽን ኡንቱንቱ ላፋባነ ካቴዳዋ ኡባና ይሴድኖ።

ሳኦል ካትያ ግድያዋ ጾሳይ እጼዳ

10 መና ጎዳ ቃላይ ሳሜላኮ ሀዋዳን ያጊደ ዬዳ፤ 11 "ታን ሳኦላ ካትያ ከሴዳዎ ካዮታይ፤ አያዉ ጎፐ፥ ሳኦል ታና ካልያዋ አጌዳ፤ ታ አዛዙዋ ኦቤና" ያጌዳ። ሄዋፐ ጉየ ሳመል መቶቴዳ፤ ሄ ቃማ ኩመን መና ጎዳኮ ዋሴዳ።

12 ዎንታ ጉራን ሳመል ደንዲደ፥ ሳኦላና ጋከታናዉ ቤዳ፤ ሽን አሳይ አዉ፥ "ሳኦል ቃርመሎሳ ካታማ ቤዳ፤ ያን ባረና ሀሳይስያ ሀዉልትያ ኤሴዳ፤ ሄዋፐ ስሚደ፥ ገልጋላ ዎዳ" ያጊደ ኦዴዳ።

13 ሳመል ሳኦላኮ ጋኬዳ፤ ሳኦል ሳመላ፥ "መና ጎዳይ ኔና አንጆ፤ ታን መና ጎዳ አዛዙዋ ኦድ" ያጌዳ።

14 ሽን ሳመል ሳኦላ፥ "ሀ ታን ስስያ ዶርሳ ዋሱነ ሚዛ ዋሱ አዬ?" ያጌዳ።

15 ሳኦል፥ "ኦላንቻቱ ሀዋንታ አማሌቃቱዋፐ አሄድኖ፤ ኡንቱንቱ መና ጎዳዉ፥ ነ ጾሳዉ ያርሻናዉ፥ ኡባፐ ሎእያ ዶርሳቱዋነ ሚዛቱዋ አሸድኖ፤ ሽን ሀራቱዋ ሙልያካ ይሴዶ" ያጌዳ።

16 ሳመል ሳኦላ፥ "አነ ኤቃ፤ መና ጎዳይ ዝኖ ቃማ ታዉ ኦዴዳዋ ታን ነዉ ኦዳይ" ያጌዳ።

ሄዋፐ ጉየ ሳኦል፥ "ኦዳ" ያጌዳ።

17 ሳመል ሳኦላ ያጌዳ፤ "ኔን ኔና ጼልና ጉ ግዶፐነ፥ እስራኤልያ ዛረቶ ካትያ ግዳበይኪ? እስራኤልያ ቦላ ካተታና ማላ፥ መና ጎዳይ ኔና ኦኬዳ። 18 ጾሳይ ኔና፥ ‘ባደ አማሌቃ አሳቱዋ ኢታቱዋ ኡባና ይሳ፤ ኡንቱንቱ ዉራና ጋካናዉ ኡንቱንታ ኦላ’ ያጊደ ኪቴዳ። 19 ያትና፥ አያዉ መና ጎዳዉ አዛዘታበይኪ? አያዉ ኦሞዶ ያረታደ መና ጎዳ ጾሳ ስንን ኢታባ ኦዲ?" ያጌዳ።

20 ሳኦል፥ "ታን መና ጎዳ ቃላዉ አዛዘታድ! መና ጎዳይ ታና ኪቴዳዋዳን ባድ፤ አማሌቃ አሳቱዋ ዎ ዉርሳድ፤ ኡንቱንቱ ካትያ አጋጋ አሃድ። 21 ሽን ኦላንቻቱ ኦሞዱዋፐ ዶርሳነ ሚዛ ኡባፐ ሎእያዋንታ፥ መና ጎዳዉ፥ ነ ጾሳዉ፥ ገልጋላን ያርሻናዉ አኪደ ዬድኖ" ያጌዳ።

22 ሳመል ሳኦላ፥ "መና ጎዳይ ባረ ቃላዉ አዛዘትያዋን ናሸትያዋ ኬሻ ጹግያ ያርሹዋንነ እሞታን ናሸቲ? በአ፤ አዛዘትያዌ ያርሽያዋፐ አ፤ ቃይ ስስያዌ ዶርሳ ሞዋፐ አ። 23 አያዉ ጎፐ፥ ብያዌ ሻሬችያ ናጋራ ማላ፤ ቃይ ኦቶረትያዌ ኤቃዉ ጎይንያ እታተ ማላ። ኔን መና ጎዳ ቃላ እጼዳ ድራዉ፥ እ ኔን ካትያ ግድያዋ እጼዳ" ያጌዳ።

24 ሳኦል ሳመላ፥ "ታን ናጋራ ኦድ፤ መና ጎዳ አዛዙዋነ ነ ቃላ ቶቻድ። ታን አሳዉ ያዬዳ ድራዉ፥ ኡንቱንቱ ጌዳዋ ኦድ። 25 ሀይ ታ ናጋራ አቶ ጋርኪ፤ ታን መና ጎዳዉ ጎይናና ማላ፥ ታናና ገልጋላ ደንዳርኪ" ያጌዳ።

26 ሳመል ሳኦላ፥ "ታን ኔናና ስማደ ቢከ! ኔን መና ጎዳ ቃላ እጼዳ ድራዉ፥ ኔን እስራኤልያ ቦላ ካትያ ግድያዋ መና ጎዳይ እጼዳ" ያጌዳ።

27 ሳመል ሳኦላ ማታፐ ባናዉ ደንድና፥ ሳኦል አ ማዩዋ ማጫራ ኦይቂና ማዩ ፔቴዳ። 28 ሳመል ሳኦላ፥ "መና ጎዳይ ሀቼ እስራኤልያ ካዉተ ኔፐ ፔደ ኔፐ ሎእያ ነ ሾሮ እሜዳ።✝15:28 1 ሳሜላ 28:17፤ 1 ካታ. 11:30-31 29 እስራኤልያ ቦንቹ ዎርዶተና፥ ዎይ ባረ ቆፋ ላመና፤ አያዉ ጎፐ፥ ባረ ቃላ ላማናዉ እ አሳ ግደና" ያጌዳ።

30 ሳኦል ሳመላ፥ "ታን ናጋራ ኦድ፤ ሽን ታ ጋድያ ጭማቱዋ ስንንነ እስራኤልያ አሳ ስንን ሀይ ታና ካዉሾፓርኪ፤ ታን መና ጎዳዉ፥ ነ ጾሳዉ ጎይናናዳን፥ ኔን ታናና ደንዳርኪ" ያጊደ ዛሬዳ።

31 ሄዋ ድራዉ፥ ሳመል ሳኦላና እትፐ ገልጋላ ቤዳ፤ ሳኦል መና ጎዳዉ ጎይኔዳ።

32 ሄዋፐ ጉይያን ሳመል፥ "አማሌቃቱዋ ካትያ አጋጋ ታኮ አህተ" ያጊደ አዛዜዳ።

አጋግ ኮኮሪደ ሳሜላኮ ዬዳ፤ "ቱሙ ሀይቁ ሀዋዳን ጫሚ!" ያጌዳ።

33 ሳመል አጋጋ፥ "ነ ማሻይ ማጫዋንታ መላ አሾዋዳን፥ ነ ዳያካ ማጫዋንቱ ግዶን መላ አታና" ያጌዳ። ሳመል አጋጋ መና ጎዳ ስንን ገልጋላን ሲፌዳ።

34 ሄዋፐ ጉይያን፥ ሳመል ደንዲደ፥ ራማ ካታማ ቤዳ፤ ሳኦለካ ባረ ሶ ግብኣ ቤዳ። 35 ሳመል ሀይቃና ጋካናዉ፥ ሳኦላ በአናዉ ስሚደ ላኤን ብቤና፤ ግዶፐነ፥ ሳመል ሳኦላ ድራዉ ዬኬዳ። ሳኦላ እስራኤልያ ቦላ ካተዬዳዎ መና ጎዳይ ካዮቴዳ።