1 Samuel 25

ሳመላ ሀይቁዋ

1 ሳመል ሀይቂና እስራኤልያ አሳቱ ኡባይ ሺቂደ፥ አዉ ዬኬድኖ፤ ራማ ካታማን ደእያ አ ሶን ሞጌድኖ።

ዳዊታ፥ ናባላነ አብጋሎ

ሄዋፐ ጉይያን፥ ዳዊተ ፓራና ባዙዋ ቤዳ። 2 ማኦናን እት ብታኒ ደኤ፤ ሄ ብታንያዉ አቁ ቃርመሎሳን ደኤ፤ እ ዳሮ ዱረ፤ እት ሻአ ዴሻቱነ ሄዙ ሻአ ዶርሳቱ አዉ ደኢኖ። እ ኡንቱንቱ እስክያ ቃርመሎሳ ካታማን ሜዴ። 3 ሄ ብታንያ ሱንይ ናባላ፤ አ ማቻት ሱንይ አብጋሎ። እዛ ኤራንቻነ ማላ ሎአ ማቻቶ፤ ሽን እ አስናይ መቀ ባይና ኢታ አሳ። እ ካሌባ ያራ።

4 ዳዊተ ዎራን ደኢደ፥ ዶርሳ እስክያ ናባል ሜድያዋ ስሴዳ። 5 ዳዊተ ታሙ ዎዳላቱዋ ሀዋዳን ያጊደ ኪቴዳ፤ "ናባላኮ ቃርመሎሳ ካታማ ቢደ፥ ታ ሱንን አ ሳሮትተ፤ 6 ሳሮ ደአይ! ኔንካ ነ ጎልያ አሳይካ ሳሬ! ነዉ ጌዳዌ ኡባይ ሳሮ ደኢ!

7 "ኔን ዶርሳ እስክያ ሜድያዋ ታን ስሳድ፤ ነ ዶርሳ ሄምያዋንቱ ኑናና እትፐ ደኤዳ ዎደ፥ ኑን ኡንቱንታ ገንበይኮ፤ ኡንቱንቱ ቃርመሎሳ ካታማን ኡቴዳ ዎደ ኡባን ኡንቱንቱባፐ አያይነ ፓጭቤና። 8 ሄዋ ኔን ነ ቆማቱዋ ኦቾፐ፥ ኡንቱንቱ ነዉ ኦዳና። ኑን ሀቼ ሾብያ ጋላስ ኔኮ ዬዳ ድራዉ፥ ታ ዎዳላ አሳቶ ሀያና ሎአ፤ ነ ኩሽያን ደእያባፐ ነ ቆማቶነ ነ ናኣ ዳዊታዉ ሀያና እማ ያግተ" ያጊደ አዛዜዳ።

9 ዳዊታ አሳቱ ናባላኮ ጋኪደ፥ ዳዊታ ኪታ አዉ ኦዴድኖ፤ ሄዋን ናጌድኖ።

10 ናባል ዳዊታ ቆማቱዋ፥ "ዳዊተ ኦኔ? እሰያ ናአይ ኦኔ? ሀ ዎድያን ዳሮ ቆማቱ ባረንቱ ጎዳቱዋፐ ባቃቲኖ። 11 ታ ኡክ፥ ታ ሃነ ታ ዶርሳ ሜድያዋንቶ ሹከቴዳ አሹዋ ደንደ፥ ሀ ኦነንቶነ ዬዳ ሳአይ ኤረተና አሳቶ አያዉ እሞ?" ያጌዳ።

12 ዳዊታ አሳቱ ስሚደ ጉየ ቤድኖ። ብ ጋኪደ ናባል ጌዳዋ ኡባ ዳዊታዉ ኦዴድኖ። 13 ዳዊተ ባረ አሳቱዋ፥ "ህንተንቱ ማሻ ማሻ ዳንጭተ" ያጌዳ፤ ሄዋፐ ጉይያን ኡባቱካ ባረንቱ ማሻ ማሻ ዳንጬድኖ፤ ዳዊተካ ባረ ማሻ ዳንጬዳ። ዳዊተ ኦይዱ ጼቱዋ ግድያ አሳቱዋና ፑደ ቤዳ፤ ላኡ ጼቱ አሳይ ኡንቱንቱዋ ናጊደ አቴዳ።

14 ቆማቱዋፐ እቱ ናባላ ማቻቶ አብጋሎ ሀዋዳን ያጌዳ፤ "ዳዊተ ዎራን ደኢደ ኑ ጎዳ፥ ‘ሳሮ’ ጋናዉ አሳ ኪቴዳ፤ ሽን እ ኡንቱንታ ቦሬዳ። 15 ግዶፐካ፥ ሀ አሳቱ ኑዉ ሎይ ሎአ፤ ኡንቱንቱ ኑና ገንበይክኖ፤ ኑን ኡንቱንቱና እትፐ ደምባን ፔሼዳ ዎደ ኡባን ኑባፐ አያይነ ፓጭቤና። 16 ኑን ኑ ዶርሳ ዉድያ ኡንቱንቱ ማታን ሄምያ ዎደ፥ ቃማነ ጋላስ ኡንቱንቱ ኑዉ ድርሳ ግዴድኖ። 17 ሀያና ሀ የዉዋ ዋታነንቶነ ቆፓ፤ አያዉ ጎፐ፥ ኑ ጎዳ ቦላነ አ ሶ አሳ ቦላ ኮባባይ ከሳና ሀኔ። ኑ ጎዳይ ሄዋ ማላ መቀ ባይና ኢታ አሳ ግዴዳ ድራዉ፥ ኦንነ አዉ ሃሳያናዉ ዳንዳየና" ያጌዳ።

18 አብጋላ ኤለካ ላኡ ጼቱ ኮምፖ ኡክነ ላኡ ኦጎሩዋ ዎይንያ ኤሳ፥ ጺጸቴዳ ዶርሳቱዋ እቼሻቱዋ፥ ታማነ ላፑን ኪሎ ግራመ ትሻ ጺጻ፥ እት ጼቱ ዉርጮ ዎይንያ ቴራነ ባላስያ ባቀ መላፐ ላኡ ጼቱዋ አካደ፥ ሀርያን ጫናዱ። 19 ያታደ ቆማቱዋ፥ "ህንተንቱ ታፐ ስንዉ አደ ቢተ፤ ታን ህንተንቱ ጌዱዋ ካላና" ያጋዱ፤ ሽን ባረ አስና ናባላዉ አይነ ኦዳበይኩ። 20 ባረ ሀርያ ቶጋደ ደርያና ዱገ ዛንጋራ ዎያ ዎደ፥ ዳዊተነ አ አሳይ ኢኮ ስሚደ ዱገ ዎኖ፤ እዛ ኡንቱንቱና ጋከታዱ።

21 ዳዊተ ባረ ዎዛናን፥ "አባፐ አያይነ ፓጨናዳን ታን ሀ ብታንያ አቁዋ ኡባ ናጌዳዌ ጮ መላ፤ ታን ሎኤዳዋ ኩሽያ እ ታዉ ኢታ ዛሬዳ። 22 ዎንታ ጉራ ጋካናዉ፥ ታን አባ ግዴዳ ኡባፐ እት አቱማዋነ ፓጻ አጎፐ፥ ጾስ ታና ፓጻ አጎፖ" ያጌዳ።

23 አብጋላ ዳዊታ በኤዳ ዎደ፥ ሀርያፐ ኤለካ ዎአደ፥ ዳዊታ ስንን ቢታን ጉፋናደ አዉ ዉትሻዱ። 24 እዛ አ ገድያን ኩንዳደ፥ "ሀይ ታ ጎዳዉ፥ ሀ ባይዙ ታ ጻላላሳ ግዶ! ታና ነ ቆማቶ ሃሳይሳርኪ፤ ታን ነ ቆማታ ሃሳይያዋ ስሳርኪ። 25 ሀ መቀ ባይና ኢታ ብታንያባ፥ ናባላባ ስሶፓ፤ ‘ናባላ’ ጉሳይ ‘ኤያ’ ግያዋ፤ እ ባረ ሱንዳንካ ኤያ። ታ ጎዳዉ፥ ኔን ኪቴዳ አሳቱዋ ታን ነ ቆማታ በአበይከ።

26 "መና ጎዳይ ኤሮ! ነ ሸምፑ ኤሮ! ኔን ሱ ጉሰናዳንነ ነ ኩሽያን ነ ሀሉዋ ከሰናዳን፥ ኔና ታ ጎዳ ተኤዳዌ መና ጎዳ። ነ ሞርከቱነ ኔና ታ ጎዳ ቆሀናዉ ኮይያዋንቱ ናባላዳን ሀንኖ። 27 ሀ እሞታይ ታን ነ ቆማታ ነዉ ታ ጎዳዉ አሄዳዌ ኔና ካልያ አሳቶ እመቶ። 28 ሀይ ታ ጎዳዉ፥ ታን ነ ቆማታ ባሌዳ ባላ አቶ ያጋ! ኔን መና ጎዳ ኦላ ኦለትያ ድራዉ፥ መና ጎዳይ ኔናነ ነ ዘረ ካተያና። ኔን ደኤዳ ላይ ኡባን ኢታተይ ነ ቦላ ቤቶፖ።

29 "አያ አሳይነ ኔና ዎናዉ ኮዮፐ፥ እት ኡራይ ባረ አልኦ ሚሻ ናግያዋዳን፥ መና ጎዳይ ነ ጾሳይ ኔና ሳሮ ናጋና። ሽን ሹቻ ያምባርሻን ኦልያዋዳን፥ እ ነ ሞርከቱዋ ደኡዋ ኦላና። 30 መና ጎዳይ ታ ጎዳዉ ኦናዉ ሃሳዬዳ ኬካተ ኡባ ኦያ ዎደነ እስራኤልያ ቦላ ካተይያ ዎደ፥ 31 ጋሱ ባይናን ሱ ጉሴዳዋን ዎይ ባረ ሀሉዋ ከሴዳዋን ታ ጎዳ ዎዛናይ ዳጋመናነ ህርገና። መና ጎዳይ ነዉ ኬኬዳ ዎደ፥ ታና ነ ቆማቶ ዶጎፓ" ያጋዱ።

32 ዳዊተ አብጋሎ፥ "ኔና ታናና ጋከታናዉ ሀቼ ኪቴዳ መና ጎዳይ፥ እስራኤልያ ጾሳይ ጋላተቶ። 33 ኔን ሎኦ ቆፔዳ ድራዉነ ታን አሳ ሱ ጉሰናዳን ታ ኩሽያ ጭገተናዳን ድጌዳ ድራዉ፥ አንጀታ። 34 ሄዌ ባይናዋ ግዶፐ፥ ታን ኔና ቆሄናዳን ተኤዳ ደኡዋ መና ጎዳይ፥ እስራኤልያ ጾሳይ ኤሮ! ኔን ታናና ጋከታናዉ ኤሌላደ ዬነንቶ፥ ሳአይ ዎንታና ጋካናዉ፥ ናባላባ ግድያ እት አቱማ አስነ ፓጻ አተና" ያጌዳ። 35 አብጋላ አዉ አሄዳዋ እ ኩሽያፐ ዳዊተ አኪደ፥ "ነ ሶ ሳሮ ጋካ። ታን ነ ቃላ ስሳድ፤ ነ ኦሻካ አካድ" ያጌዳ።

36 አብጋላ ስማደ ናባላኮ ይያ ዎደ፥ ካትያ ሶን ጊግያ ባላ ማላ ባላ ምዚደ ሶን ኡቴዳ፤ ናባል ሎይ ማቲደ፥ ባረ ዎዛናን ናሸቴ። ሄዋ ድራዉ፥ ሳአይ ዎንታናዉ፥ አብጋላ አዉ አያነ ቃታበይኩ። 37 ዎንታ ናባል ማዋ ዛሬዳዋፐ ጉይያን፥ አ ማቻታነ ሀ የዉዋ ኡባ አዉ ኦዳዱ፤ ናባላ ዎዛናይ ዳቡርና እ ጆሉ ጌዳ። 38 ታሙ ጋላሳፐ ስምና፥ መና ጎዳይ ናባላ ሾጭና፥ እ ሀይቄዳ።

39 ናባል ሀይቄዳዋ ዳዊተ ስሴዳ ዎደ፥ "መና ጎዳይ ጋላተቶ! ናባል ታና ሸቄዳዋ ሀሉዋ እ ከሴዳ፤ ታን አ ቆማይ ኢታባ ኦናዳን ተኤዳ፤ ናባል ኦዳ እታተ መና ጎዳይ አ ሁጲያን ዛሬዳ" ያጌዳ።

ሄዋፐ ጉይያን፥ ዳዊተ አብጋሎ አካናዉ ኪታ የዲደ ኦሽሴዳ። 40 ዳዊታ ቆማቱ ቃርመሎሳ ካታማ አብጋልኮ ቢደ፥ "ኔን ዳዊታ ገላናዳን ኔና አኪደ ባናዉ እ ኑና ኔኮ ኪቴዳ" ያጌድኖ።

41 አብጋላ ቢታን ጉፋና ዉቱሻደ፥ "ታን ነ ቆማታ ነዉ ኪተታናዉነ ነ ቆማቱዋ ገድያ ሜጫናዉ ጊጋ ኡታድ" ያጋዱ። 42 አብጋላ ኤለካ ደንዳደ ባረ ሀርያ ቶጋዱ፤ እ ዳንጋጽረቱ እቼሻቱ እዞ ካሊደ ቤድኖ፤ ዳዊታ ቆማታ ባደ፥ ዳዊታ ገላዱ።

43 ዳዊተ ሀዋፐ ካሰ እዝራኤልያ አህኖኣሞካ አኬዳ፤ ኡንቱንቱ ላአቱካ አ ማቻቱዋ። 44 ሳኦል ዳዊታ ማቻቶ፥ ባረ ናቶ ሚካሎ ጋሊማ ካታማን የለቴዳ ላውሻ ናኣ ፓልጽኤላዉ እሜዳ።✝25:44 2 ሳሜላ 3:14-16