1 መና ጎዳይ ናታና ዳዊታኮ ኪቴዳ፤ ናታን አኮ ዪደ፥ ሀዋዳን ያጌዳ፤ "እት ካታማን ላኡ አሳቱ ደኢኖ፤ ኡንቱቱፐ እቱ ዱረ፤ ቃይ እቱ ማንቁዋ።✝ 2 ዱረ ብታንያዉ ዳሮ ዶርሳይነ ሚዛይ ደኤ፤ 3 ሽን ማንቆ ብታንያዉ እ ሻሚደ ሄምያ እት ዶርሳ ማራትፐ ሀራባይ አያይነ ባዋ። ሄ ዶርሳታ አናናነ አ ናናቱዋና ድጫዱ፤ እዛ አ ቁማፐ ማዉ፤ አ ዋንጫፐ ኡሻዉነ አ ክዉዋን ግሳዉ። ሄ ዶርሳታ አዉ ማጫ ናኣ ማላ።

4 "እት ጋላስ እት እማይ ሄ ዱረ ብታንያ ሶ ዬዳ፤ ሽን ዱሪ ባረ ዶርሳፐ ዎይ ባረ ሚዛፐ አኪደ ሹኪደ፥ ባረ ሶ ዬዳ እማ ሞካናዉ ኮይቤና። እ ሄ ማንቆ ብታንያ ዶርሳቶ አኪደ፥ ሄ ሶ ዬዳ እማ ምዝያዋ ካዳ" ያጌዳ።

5 ዳዊተ ሄ ዱረ ብታንያ ቦላ ሀንቁዋ ኤጽ ከሲደ ናታና፥ "መና ጎዳይ ኤሮ! ሀዋ ኦዳ ብታኒ ሀይቃናዉ በሰ። 6 ቃይ እ ሄ ዶርሳ ማራት ድራዉ ኦይዱ ኩሽያ አደ ጭጋናዉ ኮሼ፤ አያዉ ጎፐ፥ ቃረታ ዪደ እ ሄዋ ኦዳ" ያጌዳ።

7 ናታን ዳዊታ፥ "ሄ ብታኒ ኔና! መና ጎዳይ እስራኤልያ ጾሳይ ሀዋዳን ያጌ፤ ‘ታን ኔና እስራኤልያ ቦላ ኦካደ ካተያድ፤ ሳኦላ ኩሽያፐካ ታን ኔና አሻድ፤ 8 ታን ነ ጎዳ ጎልያ ነዉ እማድ፤ ነ ጎዳ ማጫ አሳቱዋካ ነ ክዉዋን የጋድ፤ እስራኤልያ ጎልያ አሳነ ይሁዳ ጎልያ አሳ ታን ነዉ እማድ። ሀዌ ኡባይካ ጉጾፐ፥ ታን ነዉ ሀራካ ጉጃ እማና ሽን። 9 ሀዋ ማላ ኢታባ አ ስንን ኦደ፥ አያዉ መና ጎዳ ቃላ ካዲ? ሂትያ ኦርዮና ማሻን ዎዳ፤ ያታደ አ ማቻቶ ነዉ አካዳ። ኤ፥ አሞና አሳቱዋ ማሻን አ ዎዳ። 10 ኔን ታና ካደ፥ ሂትያ ኦርዮና ማቻቶ ነዉ አኬዳ ድራዉ፥ ነ ዛርያፐ ማሻይ ኡባካ ሻከተና’ ያጌ።

11 "ሄዋ ድራዉ መና ጎዳይ፥ ‘ታን ነ ሶ አሳ ግዶፐ ነ ቦላ ኢታባ አሀና፤ ነ ማቻቱዋ ኔን ጼልሽን ደንደ፥ ነዉ ማታትያ ኡራዉ እማና፤ ሴታ ጋላሳን ሄ ብታኒ ነ ማጫ አሳቱዋና ግሳናዋ።✝ 12 ኔን ሄዋ ጌማን ኦዳ፤ ሽን ታን ሀዋ ሴታ ጋላስ እስራኤልያ አሳ ኡባ ስንን ኦና’ ያጌ" ያጌዳ።

13 ዳዊተ ናታና፥ "ታን መና ጎዳ ቦላ ናጋራ ኦ ክቻድ" ያጌዳ።

ናታን፥ "መና ጎዳይካ ነ ናጋራ አቶ ግ ድጌዳ፤ ኔን ሀይቃካ። 14 ኔን ሀዋ ኡዳደ፥ መና ጎዳ ሞርከቱ አ ካናዳን ኦዳ ድራዉ፥ ነዉ የለቴዳ ናአይ ሀይቃና" ያጌዳ።

15 ናታን ባረ ሶ ቤዳዋፐ ጉይያን፥ ኦርዮና ማቻታ ዳዊታዉ የሌዳ ናኣ መና ጎዳይ ሾጭና እ ሀርጌዳ። 16 ዳዊተ ሀ ናአዉ ጾሳ ዎሴዳ፤ ዳዊተ ካ ሜናን ጾሜዳነ ባረ ሶ ገሊደ፥ ቃማ ቃማ ቢታን ግስ አቄዳ። 17 አ ሶ ጭማቱ አ ቢታፐ ደንናዉ አ ማታን ኤቄድኖ፤ ሽን ቢታፐ ደንደናን እጼዳ፤ እ ኡንቱንቱና ቁማ ምቤና።

18 ላፑን ጋላስ ናአይ ሀይቄዳ። ዳዊታ ቆማቱ ናኣ ሀይቁዋ ኦዳናዉ ያዬድኖ፤ "ናአይ ፓጻ ደእሽን ኑን ዳዊታ ሃሳይሴዶ፤ ሽን ስሰናን እጼዳ። ያትና፥ ናአይ ሀይቄዳዋ ኑን አዉ ዋቲደ ኦዳናዉ ዳንዳየቶ? ኦን ኤሪ፥ እ ባረና ቆሀነንቶነ" ያጌድኖ።

19 ባረ ቆማቱ እቱ እቱዋና ሳሱከትያዋ ዳዊተ በኤዳ ዎደ፥ ቄር ናአይ ሀይቄዳዋ ኤሬዳ። ዳዊተ ኡንቱንታ፥ "ቄር ናአይ ሀይቄዴ?" ያጊደ ኦቼዳ።

ኡንቱንቱ፥ "ኤ ሀይቄዳ" ያጌድኖ።

20 ዳዊተ ቢታፐ ደንድ ኤቄዳ። ሜጨቲደ፥ ኦከቲደነ ባረ ማዩዋ ላሚደ፥ መና ጎዳ ጎልያ ገሌዳ፤ ጎይኔዳ። ሄዋፐ ጉይያን ባረ ሶ ቢደ፥ ቁማ ኦችና ኡንቱንቱ አ ስን አድኖ፤ ቁማ ሜዳ።

21 አ ቆማቱ አ፥ "ኔን ሀዋዳን አያዉ ሀናድ? ናአይ ፓጻ ደእሽን ጾማዳነ ዬካዳ፤ ሽን ናአይ ሀይቂና ደንዳደ፥ ቁማ ማዳ!" ያጌድኖ።

22 ዳዊተ ኡንቱንታ፥ "ናአይ ፓጻ ደእሽን ታን ጾማድነ ዬካድ፤ አያዉ ጎፐ፥ ‘ኦን ኤሪ፥ መና ጎዳይ ታና ማርና፥ ናአይ ፓጻነንቶነ’ ያጋደ ቆፓድ። 23 ሽን ናአይ ሀእ ሀይቂና፥ ታን አያዉ ጾሞ? ታን ናኣ ጉየ ዛራና ዳንዳያይታ? ታን አኮ ባናፐ አትና፥ እ ታኮ ስመና" ያጌዳ።

24 ሄዋፐ ጉይያን፥ ዳዊተ ባረ ማቻቶ በርሳቤሆ ምንዳ። ዳዊተ ኢኮ ገሊደ እዝና አቄዳ፤ ያትና፥ አ አዉ አቱማ ናኣ የላዱ፤ ናኣ ሶሎሞና ሱንዳ፤ መና ጎዳይ ሄ ናኣ ሲቄዳ። 25 መና ጎዳይ ናኣ ሲቄዳ ድራዉ፥ ናኣ "ይዲድያ" ጊደ ሱንና ማላ፥ ትምቢትያ ኦድያ ናታና ቦላ ኪቴዳ።

26 ሄ ዎደ ዮኣበ አሞናቱዋ ካታማ ራባ ኦለቲደ፥ ካትያ ጌሱዋ ኦይቄዳ። 27 እዮኣበ ዳዊታኮ ኪታ የዲደ፥ "ታን ራባ ካታማ ኦላደ፥ ሃ ዱቂያ ሳኣ ኦይቃድ። 28 ሄዋ ድራዉ፥ አቴዳ ኦላንቻቱዋ ሺሻደ ካታማ ኦላደ ኦይቃ። ሄዌ ዮፐ፥ ታን ካታማ ኦይቃይ። ያቶፐ፥ እ ታ ሱንን ጼገታና" ያጌዳ።

29 ዳዊተ ባረ ኦላንቻቱዋ ኡባ ሺሺደ፥ ራባ ካታማ ቢደ፥ ኦለቲደ ኦይቄዳ። 30 ኡንቱንቱ ካትያ ካላቻካ አ ሁጲያፐ አኬዳ። ሄ ዎርቃ ካላቻይ ሀታማነ ኦይዱ ኪሎ ግራምያ ዴጼ፤ አ ግዶን አልኦ ሹቻይ ደኤ። ሄ ካላቻ ዳዊታ ሁጲያን ዎዳ። ካታማፐ ሎይ ዳሮ ኦሞዱዋ ዳዊተ ኦሞዲደ አሄዳ። 31 ሄ ካታማ አሳ ያፐ ከሲደ፥ ማጋዝያን፥ ብራታ ሻልክያንነ ብራታ ካልታን ኦናዳን ኦዳ፤ ቃይ ኡንቱንታ ኡርቃፐ ጹብያ መናዳን ኦዳ። አሞናቱዋ ካታማቱዋ ኡባን ደእያ አሳ እ ሄዋዳን ኦዳ። ሄዋፐ ጉይያን፥ ዳዊተነ አ ኦላንቻቱ ኡባይ የሩሳላመ ስሜድኖ።