ዮሃንሳ ሳፃ 21

10 ኪታንቻይ ታና ዳሮ ቃ ደርያ ሁጲያ አያናን ከሲደ ጌሻ ካታማታ፥ የሩሳላማ ሳሉዋፐ ጾሳ ማታፐ ዱገ ዎዉኖ ታና በሴዳ።✝21:10 ህዝ. 40:2 11 ሄ ካታማታ ጾሳ ቦንቹዋን ፖአዉ። ሄ ካታማት ፖኡ ያስጲድያ ጌተትያ አልኦ ሹቻ ማላ፤ ብርሊያዳን ጶላዉ። 12 ሄ ካታማትዉ ታማነ ላኡ ፐንገቱነ ሄ ፐንገቱዋን ታማነ ላኡ ኪታንቻቱ ናግያ ዎልቃማ አዱሳ ድርሳይ ደኤ። ፐንገቱዋን ታማነ ላኡ እስራኤልያ ዛራቱዋ ሱንይ ጻፈት ኡቴዳ።✝21:12-13 ህዝ. 48:30-35 13 አዋይ ዶልያ ባጋና ሄዙ ፐንገቱ ደኢኖ። ቃይ ህርክ ባጋና ሄዙ ፐንገቱነ ሁጲሳ ባጋና ሄዙ ፐንገቱ ደኢኖ። አዋይ ዉልያ ባጋናካ ሄዙ ፐንገቱ ደኢኖ። 14 ካታማት ድርሳይ ዶርሳይ ኪቴዳ ታማነ ላአቱዋ ሱንይ ጻፈቴዳ ታማነ ላኡ ሹቻቱዋ ቦላ ግምበቴዳ።