ዛረዋ 18

ግሹዋን ቄሳቱ ዋ ጋክያዋ

1 "ቄሰተን ኦያ ኩመን ሌዊያ ዛረቶ እስራኤልያ ግዶን ቢታ ላታይ ባዋ። ኡንቱንቱ አሳይ መና ጎዳዉ ሺሽያ ታማን ጹግያ ያርሹዋፐ ሚደ ደእያዌ ኡንቱንቶ ላታ። 2 ኡንቱንቶ ኡንቱንቱ እሻንቱ ግዶን ላታይ ደኤና፤ መና ጎዳይ ኡንቱንቶ ገፔዳዋዳንካ እ ኡንቱንቱ ላታ።✝18:2 ፓይ. 18:20

3 "ኮሩማ ዎይ ዶርሳ አሳይ ያርሾ ሺሼዳዋፐ ቄሳቶ በስያዌ ሀዋ: ምሳ፥ ላኡ ባጋ ጎጎንጩዋነ ኡሉዋ ግዶ አሹዋ ኡንቱንቶ እምኖ። 4 ህንተ ካፐ፥ ዎይንያፐነ ዛይትያፐ ኮይሮ ጋኬዳ አይፍያነ ህንተ ዶርሳ እክስያፐ ባይራቱዋ ቄሳቶ እሚታ። 5 አያዉ ጎፐ፥ ኡንቱንቱነ ኡንቱንቱ ናናይ መና ጎዳ ሱንን ኤቂደ፥ መናዉ ቄሴ ግዲደ ኦና ማላ፥ ህንተ ዛርያ ኡባ ግዶፐ መና ጎዳይ ህንተ ጾሳይ ኡንቱንታ ዶሬዳ።

6 "ሌዊያ ዛረ ግድያ እት አሳይ እስራኤልያ ጋድያን አይ ካታማፐነ ደንዲደ፥ መና ጎዳይ ዶርያ ሳአዉ ዮፐ፥ 7 እ ብያሳን ደእያ ሌዋቱ መና ጎዳ ስንን ኤቂደ ኦያዋዳን፥ እካ መና ጎዳ ባረ ጾሳ ስንን ኤቂደ ኦ። 8 ቃይ ባረ አዉዋ አቁዋ ባይዝና፥ ባረና ጋክያዋ አኬዳዋ ግዶፐካ፥ ሌዋቱ ጎኤትያዋ ኡባ ኡንቱንቱና ልከ ሻኪደ አኮ።

ኢታ ሜዝያፐ ናገታናዳን እመቴዳ ሴራ

9 "መና ጎዳይ ህንተ ጾሳይ ህንተንቶ እሜዳ ቢታ ገልያ ዎደ፥ ሄ ጋድያን ደእያ አሳይ ኦያ ቱና ኦሱዋ ኦፕተ። 10 ባረ አቱማ ናኣ ዎይ ማጫ ናቶ ያርሾ ጊደ፥ ታማን ጹግያ አይ አሳይነ ህንተ ግዶን ቤቶፖ። ብትያዌ፥ ማራጭያ ጼልያዌ፥ ሙሩንያዌነ ካጫ ኦድያዌ ቃይ ህንተ ግዶን ደኦፖ።✝18:10 ዎጋ 19:26፤ ከሳ 22:18 11 አያንቲያዌ፥ አያናቱዋ ጼግያዌ፥ ሻሬችያዌነ ሀይቄዳ አሳ አያና ጼግያዌ ህንተ ግዶን ደኦፖ።✝18:11 ዎጋ 19:31 12 ሄዋ ማላባ ኦያ አይ አሳይነ መና ጎዳ ማታን እጸቴዳ አሳ። ኡንቱንቱ ሄዋ ማላ ቱና ኦያ ድራዉ፥ መና ጎዳይ ህንተ ጾሳይ ሄ ካዉተ ህንተ ስንፐ የደርሳና። 13 ሽን ህንተ መና ጎዳ ህንተ ጾሳ ስንን ኩመን ፖኮባይ ባይናዋንታ ግድተ።✝18:13 ማቶሳ 5:48

ጾሳይ ናብያ ኪታና ጌዳዋ

14 "ሀ ህንተ ላታናዉ ብያ ጋድያን ደእያ ካዉተቱ ሙሩንያዋንቱነ ማራጭያ ጼልያዋንቱ ኦድያዋ ስስያዋንታ። ሽን ህንተ ሄዋ ኦናዳን መና ጎዳይ ህንተ ጾሳይ ህንተና ተኤዳ። 15 መና ጎዳይ ህንተ ጾሳይ፥ ህንተ ዛርያ ግዶፐ፥ ታ ማላ ትምቢትያ ኦድያዋ ህንተንቶ ደንና። ህንተ እ ግያዋ ስስተ።✝18:15 ኪታ 3:22፤ 7:37 16 ህንተ ሲና ደርያ ቦላን ሺቄዳ ዎደ፥ መና ጎዳ ህንተ ጾሳ ሀዋዳን ያጊደ ኦቼድታ፤ ‘ኑን ሀይቀናዳን፥ መና ጎዳ ኑ ጾሳ ኮሻ ዛር ስሶኮ፤ ቃይ ሀ ዎልቃማ ታማካ ላኤን በኦኮ’ ያጌድታ።

17 "መና ጎዳይ ታዉ ሀዋዳን ያጌዳ፤ ‘ኡንቱንቱ ጌዳዋ ኡባ ልከ ጌድኖ። 18 ታን ኡንቱንቱ ዛራቱ ግዶፐ፥ ነ ማላ ትምቢትያ ኦድያዋ ኡንቱንቶ ደንና፤ ታ ቃላ አ ዶናን ዎና፤ እካ ታን አ አዛዝያ ኡባ ኡንቱንቶ ኦዳና። 19 እ ታ ሱንን ኦድያ ታ ቃላ ስሰና ኦስነ ሀሉዋ ታን ከሳና።✝18:19 ኪታ 3:23 20 ሽን ታ አዛዛቤናዋ ጻሊደ ታ ሱንን ኦድያዌ ዎይ ሀራ ጾሳቱዋ ሱንን ኦድያ ሄ ትምቢትያ ኦድያዌ ሀይቆ’ ያጌዳ።

21 "ህንተ፥ ‘ትምቢትያ ኦድያዌ ኦድያ ቃላይ መና ጎዳፐ ግደናዋ አያን ሻክ ኤራኔ?’ ያጎፐ፥ 22 ሄ ትምቢትያ ኦድያዌ መና ጎዳ ሱንን፥ እ ኦዴዳ ቃላይ ፖለተናን እጾፐ፥ ሄዌ መና ጎዳይ ኦድቤና ቃላ ግድያዋ ኤሪታ። ሄ ትምቢትያ ኦድያዌ ዎርዱዋን ኦዴዳ ድራዉ፥ አዉ ያዮፕተ።